آٹے دی سمگلنگ روکن لئی مانیٹرنگ نُوں ہور سخت  کیتا جاوے: سردار عثمان بزدار ……٭رویل نیوز٭

لاہور (نمایندا رویل) وزیر اعلا پنجاب سردار عثمان بزدار دی صدارت ہیٹھ سول سیکرٹریٹ وچ اعلا سطح دا اجلاس ہویا جہدے وچ صوبے وچ آٹے تے کھنڈ دے بھاء تے سٹاک دا تفصیلی جایزا لیا گیا۔ وزیر اعلا عثمان بزدار نے اجلاس نال خطاب کردیاں ہویاں کہیا ک پورے صوبے وچ 20 کلو آٹے دا تھیلا متھی قیمت 860 رُپئے وچ وادھو دستیاب اے تے پنجاب کلّا صوبا ا جتھے لوکائی نُوں متھی قیمت اُتے آٹے دا تھیلا مل رہیا اے۔ وزیر اعلا عثمان بزدار نے آٹا تھیلا سرکاری ریٹ اُتے لوکائی نُوں فراہم کرن دے حوالے توں کیتے گئے اقدامات اُتے اطمینان دا اظہار کیتا۔ اجلاس وچ صوبا پنجاب توں آٹے دی سمگلنگ روکن لئی مانیٹرنگ نُوں ہور سخت کرن لئی ہر ممکن انتظامی اقدام چُکن دا فیصلا کیتا گیا۔ وزیر اعلا عثمان بزدار نے کہیا کہ پنجاب سرکار خیبر پختونکوا دے بھین بھراواں لئی وی روزانا دی بنیاد اُتے کنک فراہم کر رہی اے۔ پنجاب سرکار لوکائی نُوں مقرر کردا قیمت اُتے آٹا مہیا کرن لئی ارباں رُپئے دی سبسڈی دے رہی اے۔ سبسڈی غریب لوکائی دا حق اے جد کہ اشرافیا نُوں آٹے اُتے سبسڈی ملناغریب دا حق مارن وانگوں اے۔ وزیر اعلا عثمان بزدار نے آٹے دی سبسڈی نُوں ٹارگٹڈ بنان لئی مؤثر میکانزم تشکیل دین دی ہدایت کردیاں ہویاں محکما خوراک توں ٹارگٹڈ سبسڈی لئی حتمی پلان منگ لیا۔ اوہناں نے کہیا کہ پنجاب سرکار ہُن تک 6 لکھ 69 ہزار ٹن کنک فلور ملاں نُوں ریلیز کر چکی اے تے پنجاب دے کول تقریبن 37 لکھ ٹن کنک دے ذخیرے موجود نیں۔ پنجاب سرکار روزانا 17 ہزار ٹن توں ودھ کنک فلور مِلاں نُوں ریلیز کر رہی اے جہدے نال مارکیٹ وچ آٹے دی قیمت وچ استحکام آیا اے۔ وزیر اعلا عثمان بزدار نے آٹے دی قیمت وچ استحکام برقرار رکھن لئی سخت مانیٹرنگ دی ہدایت کیتی۔ اجلاس وچ کھنڈ دے بھاء وچ استحکام لئی سارے ضروری انتظامی اقدامات چُکن دا فیصلا کیتا گیا۔ وزیر اعلا عثمان بزدار نے کہیا کہ آٹے تے کھنڈ دی قیمت وچ خُد ساختا وادھا برداشت نہیں کراں گا۔ انتظامی افسران آپ مارکیٹاں تے بازاراں دے دورے کرن تے قیمتاں دا جایزا لے کے رپورٹ وزیر اعلا آفس پیش کرن جد کہ میں آپ وی مارکیٹاں تے بازاراں دے دورے کر کے صورتحال دا جایزا لواں گا۔ کسے نُوں لوکائی دا استحصال کرن دی اجازت نہیں دِتی جا سکدی۔