ن لیگ تے پیپلز پارٹی دے ہور بُرے حالات آ رہے نیں:شیخ رشید ……٭رویل نیوز٭

راولپنڈی (نمایندا رویل) وزیر ریلوے شیخ رشید نے پیشن گوئی کیتی اے کہ ن لیگ توں ش لیگ وکھری ہو جاوے گی۔ نواز شریف نے نہیں آنا سی تے اوہناں نے ایہ ثابت وی کر دِتا۔ ن لیگ تے پیپلز پارٹی دے ہور بُرے حالات آ رہے نیں۔ 30 دسمبر تک اپوزیشن دے حالات خراب ہون گے۔ اوہناں نے کہیا کہ ن لیگ توں ش لیگ وکھری ہو جاوے گی تے شہباز شریف لیگ وکھری ہون نال وی عمران خان دی حکومت نُوں کوئی خطرا نہیں۔ راولپنڈی وچ میڈیا نال گلبات کردیاں ہویاں آل پارٹیز کانفرنس بارے وزیر ریلوے نے کہیا کہ اے پی سی تے رہبر کمیٹی دی ناکامی دا اعلان کردا آں‘ حزب اختلاف دیاں جماعتاں متفق نہیں نیں نہ ایہ حکومت دے خلاف کوئی وڈا قدم چُک سکدے نیں۔ ایہ عمران خان دا کجھ وی نہیں وگاڑ سکدے‘ مولانا فضل الرحمان صرف جلسا جلسا کر رہے نیں تے اپوزیشن دی اے پی سی ٹائیں ٹائیں فش اے۔ ن لیگ تے پیپلز پارٹی دے حالات ہور وی بُرے ہون والے نیں۔ مریم نواز دی سیاست صرف لندن جان تک دی گل اُتے اے۔ اوہناں دا کہنا سی کہ مریم نواز دی کوشش اے کہ باہر جان دتا جاوے۔ نواز شریف نے نہیں آنا سی نہ آئے۔ شیخ رشید نے کہیا کہ عمران خان دی حکوت دا کجھ نہیں وِگڑے گا‘ پی ٹی آئی سرکار 3 سال ہور لوکائی دی خدمت کرے گی۔ اوہناں نے کہیا کہ نواز شریف پچھلے 10 مہینیاں توں سیرو تفریح کر رہے نیں پر واپس نہیں آ رہے‘ اوہناں نے نہیں آنا سی تے اج اوہناں نے ثابت کر دِتا۔ شیخ رشید نے ہو رکہیا کہ کراچی وچ وزیراعظم نے اوہی کیتا جو وزیراعظم نُوں کرنا چاہیدا سی‘ مرکز تے صوبے نُوں رَل کے کم کرنا چاہیدا اے‘ ایہ بحث نہیں کرنی چاہیدی کہ اِک رُپیا کہنے دِتا تے دو رُپئے کہنے دِتے۔