دیس وچ کرونا دے روگی اک وار فیر ودھن لگے اک دن وچ666نویں روگی۔۔۔٭رویل نیوز٭

اسلام آباد (نمایندا رویل) پورے ملک وچ کرونا وایرس دے فعال کیسز وچ وادھا ہویا اے‘ روگیاں دی گنتی 8 ہزار 904 ہو گئی۔ نیشنل کمانڈ اینڈ اپریشن سینٹر دے تازا آنکڑیاں دے مطابق پچھلے 24 گھنٹیاں وچ کرونا دے 666 نویں کیسز رپورٹ ہوئے جہدے بعد پورے ملک وچ مجموعی کیساں دی گنتی 3 لکھ 18 ہزار 932 ہو گئی۔ این سی او سی دے مطابق فعال کیساں دی گنتی 8 ہزار 904 ہو گئی جد کہ ہُن تک کرونا وایرس وچ مبتلا 3 لکھ 3 ہزار 458 روگی صحت یاب ہو چکے نیں۔ پچھلے 24 گھنٹیاں وچ ہور 12 مَوتاں رپورٹ ہوئیاں جہدے بعد مجموعی مَوتاں دی گنتی 6 ہزار 570 ہو گئی اے۔ دوجے پاسے اسلام آباد وچ سمارٹ لاک ڈاؤ ن لا دِتا گیا‘ اسلام آباد وچ کرونا کھلرن دے دھرکو دے کارن 3 سیکٹرز دیاں مختلف گلیاں سیل کر دِتیاں گئیاں‘ ایس او پیز دی خلاف ورز اُتے 2 سکول‘ 32 ریسٹورنٹس تے 47 دُکاناں وی سیل کر دِتیاں گئیاں۔ اسلام آباد وچ سیکٹر سیکٹر جی 10/4، گلی نمبر 38،44،45،46،47تے 48 نُوں سیل کر دِتا گیا۔ چٹھی مطابق سیکٹر آئی 2/8 دی گلی نمبر 25 تے 29نُوں سیل کیتا گیا جد کہ سیکٹر جی 4/9 دی 89`85 نمبر گلیاں وی سیل کیتیاں گئیاں نیں‘ ایہناں علاقیاں توں کرونا ٹیسٹ لئی نمو نے حاصل کیتے جا رہے نیں‘ ویلے سر لاک ڈاؤن نال کرونا کیسز دے کھلار وچ کمی لیاندی جا سکدی اے۔