kraamaat@gmail.com
+ +92 333-430-6384


نوازشریف چُپ نہیں رہ سکدے،گوجرانوالا جلسے وچ حکومت نے گرفتاریاں کیتیاں فیر  شدید ردءِ عمل آوے گا:تنویر حسین۔۔۔٭رویل نیوز٭


نمائندا رویل October 12, 2020


شیخوپورا (نمایندا رویل) چیئرمین پبلک اکاؤنٹ کمیٹی رانا تنویر حسین ایم این اے نے کہیا اے کہ گوجرانوالا جلسا تواریخی ہووے گا‘ مریم نواز بلاول بھٹو تے ہور قیادت خطاب کرے گی‘ گوجرانولا جلسے اُتے حکومت نے گرفتاریاں کیتیاں تے شدید رد عمل دواں گے‘ گوجرانوالا جلسے وچ شاید میاں نواز شریف خطاب نہ کرن‘ میاں نواز شریف ڈیڈھ سال جیل وچ رہے ملک دے حالات جتھے پہنچ گئے نوا ز شریف چُپ نہیں رہ سکدے‘ اسیں چاہندے آں حکومت 5 سال پورے کرے پر لوکائی دا جینا اوکھا نہ کرے۔ ایہناں خیالاں دا اظہار اوہناں نے اپنے فارم ہاؤس وچ میڈیا دے نمایندیاں نال گلبا کردیاں ہویاں کیتا۔ رانا تنویر حسین نے کہیا کہ جلیل شرقپوری سنے 5`6 ارکان ڈیڈ ھ سال توں حکومت نال رابطے وچ سن‘ اختلاف رائے جمہوریت دا حسن اے‘ پارٹی وچ بَہ کے مؤقف بیان کردے‘ ایہناں لوکاں نُوں پارٹی ڈسپلن دی خلاف ورزی اُتے نوٹس دے دِتا اے۔ آرمی چیف نے درست کہیا اے بھارت ہائبرڈ وار شروع کیتی ہوئی اے‘ بھارت جاندا اے پاک فوج دنیا دی سبھ توں چنگی فوج اے‘ بھارت فوج دی طاقت تے مہارت کئی محاذ اُتے ویکھ چُکیا اے‘ پوری قوم پاک فوج دے نال کھلوتی سی تے کھلوتی اے‘ کشمیر دے مسئلے اُتے حکومت دی خارجا پالیسی ناکام اے‘ مودی دے منشور وچ شامل سی کشمیر کویں ہڑپ کرنا اے‘ عمران خان مودی دے آن دی دُعا کردیسن‘ میاں نواز شریف دی بیماری اُتے حکومت دی گل کرنا کھسیانی بلی کھمبا نوچے والی گل اے۔