علیم خان،  فواد حسن فواد تے احسن اقبال سنے 11بندیاں دے خلاف بدعنوانی دے ریفرنسز دایر کرن دی منظوری ۔۔۔٭رویل نیوز٭

اسلام آباد (نیوز ڈیسک) نیب ایگزیکٹو بورڈ نے پچھلے وزیراعظم نواز شریف‘ اوہناں د ے پچھلے پرنسپل سیکرٹری فواد حسن فواد تے احسن اقبال سنے 11بندیاں دے خلاف بدعنوانی دے ریفرنسز دایر کرن دی منظوری دے دِتی اے۔ وسیلیاں مطابق چیئرمین نیب جاوید اقبال دی صدارت ہیٹھ نیب ایگزیکٹو بورڈ دا اہم اجلاس ہویا‘ جہدے وچ اہم فیصلیاں دی منظوری دے دِتی گئی۔ اجلاس وچ پچھلے وزیراعظم نواز شریف‘ اوہناں دے پرسنل سیکرٹری فواد حسن فواد‘ اعزاز احمد چودھری تے آفتاب سلطان دے خلاف بدعنوانی دا ریفرنس دایر کرن دی منظوری دِتی گئی‘ نیب اعلامیے وچ کہیا گیا اے کہ ملزماں اُتے غیر ملکیاں دی سیکیورٹی لئی غیر قانونی طور اُتے 73 گڈیاں خریدن دا الزام اے‘ پچھلے وزیراعظم تے ایہناں دے سنگیاں دے ایس اقدام نال قومی خزانے نُوں 1952.74 ملین رُپئے دا نقصان پہنچیا۔ نیب اعلامیے دے مطابق اجلاس وچ مسلم لیگ (ن) دے جنرل سیکرٹری احسن اقبال‘ آصف شیخ‘ اختر نواز گنجیر تے ہوراں دے خلاف بدعنوانی دا ریفرنس دایر کرن دی منظوری دِتی گئی‘ ملزماں اُتے نارووال سپورٹس سٹی دا سکوپ 3 کروڑ توں 3 ارب رُپئے تک ودھان دا الزام اے۔ اجلاس وچ پچھلے وزیر اعلا بلوچستان نواب اسلم رئیسانی‘ لشکری رئیسانی تے ہوراں دے خلاف ریفرنس دایر کرن دی منظوری دِتی گئی۔ مسلم لیگ (ن) دے آگو رانا ثناء اللہ دے خلاف کرپشن کیس دی تحقیقات دی منظوری دِتی گئی‘ پی ٹی آئی آگو علیم خان دے خلاف کرپشن کیس دی تحقیقات دی منظوری دِتی گئی۔ نیب اعلامیے وچ دَسیا گیا اے کہ پچھلے چیئرمین سی ڈی اے فرخند اقبال تے ہوراں دے خلاف بدعنوانی دا ریفرنس دایر کرن دی منظوری دِتی گئی‘ ملزماں اُتے کلینک دے پلاٹ دے کمرشل استعمال دا الزام اے۔ صاف پانی منصوبا دے پچھلے پروجیکٹ ڈائریکٹر سکندر جاوید تے ہور‘ پچھلے سیکرٹری داخلا شاہدخان تے ہور‘ پچھلے سی ای او این ٹی ایس ہارون رشید تے ہور‘ پچھلے ڈی جی آڈٹ سندھ غلام اکبر سہو تے ہوراں دے خلاف بدعنوانی‘ جد کہ پچھلے ڈی جی سپورٹس عثمان انور تے ہوراں دے خلاف وی ریفرنس دایر کرن دی منظوری دِتی گئی۔ چیئرمین نیب جسٹس (ر) جاوید اقبال دا کہنا سی کہ نیب دا ایمان کرپشن فری پاکستان اے‘ میگا کرپشن کیسز نُو منطقی انجام تک پہنچانا پہلی ترجیح اے‘ نیب دا تعلق کسے سیاسی جماعت‘ گرُپ تے بندے نال نہیں صرف ریاست نال اے‘ مفرور تے اشتہاری ملزماں دی گرفتاری لئی قانون دے مطابق اقدامات چُکے جان‘ بدعنوان عناصر نُوں انصاف دے کٹہرے وچ کھڑا کیتا جاوے جتھے قانون اپنا راہ آپ بنائے گا۔