لوکائی دی فلاح و بہود لئی ہر طرحاں دے وسایل فراہم کر رہے آں تے کردے رہواں گے: عثمان بزدار۔۔۔٭رویل نیوز٭

لاہور (نمایندا رویل) وزیر اعلا پنجاب سردار عثما ن بزدار نے کہیا اے کہ اپوزیشن جماعتاں مایوسی دا شکار نیں۔ قومی مفادات نُوں نقصان پہنچان دی کوشش کرن والے عناصر عقل و دانش توں عاری نیں۔ اپوزیشن آگوواں نُوں کوئی سُجھ بُجھ نہیں۔ اوہناں نے کہیا کہ غیر فطر اپوزیشن ایکے دی شکست و ریخت دا اغاز ہو چکیا اے۔ اپوزیشن ایکے دے پَیر اُکھڑ گئے‘ حالے وی ویلا اے ہوش د ے ناخن لوے۔ وزیر اعلا عثمان بزدار نے کہیا کہ اقتدار دی ہوس وچ اداریاں خلاف گلاں کرن والے ملک و قوم دے خیر خواہ نہیں۔ سیاست وقار تے متانت دا ناں اے‘بدتہذیبی دی سیاست نہیں چلے گی۔ پاکستان دے ادارے ساڈا وقار نیں‘ اداریاں دی عزت تے احترام اُتے حرف نہیں آن دواں گے۔ ایس توں وکھ وزیر اعلا دی ہدایت اُتے دارالسلام لائبریری باغ جناح لاہور تے علاما اقبال میموریل ہسپتال سیالکوٹ لئی خصوصی فنڈز دے اجراء دی منظوری دِتی گئی۔ کابینا سٹیڈنگ کمیٹی برائے فنانس اینڈ ڈویلپمنٹ دے اجلاس وچ دارالسلام لائبریری لئی 40 لکھ رُپئے دی گرانٹ ان ایڈ جاری کرن دی منظوری دِتی گئی جد کہ علامااقبال میموریل ہسپتال سیالکوٹ لئی سی ٹی سکین مشین خریدن دی منظوری دِتی گئی۔ وزیر اعلا عثمان بزدار نے کہیا کہ لوکائی دی فلاح و بہود لئی ہر طرحاں دے وسایل فراہم کر رہے آں تے کردے رہواں گے۔