عمران خان 2 وار الیکشن ہارے‘ اوہ ذاتیات اُتے اُترآئے نیں: ایاز صادق ۔۔۔٭رویل نیوز٭

لاہور (نیوز ڈیسک) مسلم لیگ (ن) دے آگو تے پچھلے سپیکر قومی اسمبلی ایاز صادق نے کہیا اے کہ جہڑی گل کیتی ایس حکومت بارے کیتی تے ٹھیک کیتی‘ ایس لئی اینا نہ اُکسایا جاوے کہ کوئی ہور ایہو جہی گل ہو جاوے۔ ماڈل ٹاؤن لاہور و چ میڈیا نال گلبات کردیاں ہویاں ایاز صادق نے کہیا کہ وزیراعظم عمران خان 2 وار الیکشن ہارے‘ اوہ ذاتیات اُتے اُترآئے نیں‘ ہندستان دا جھنڈا تے مودی دی تصویر لان دا کوئی جواز نہیں بندا‘ ایہ افسوسناک گل اے۔ اوہناں نے کہیا کہ میں ایس حکومت تے وزیراں دے بارے وچ جہڑی گل کہنی سی کَہ دِتی تے وضاحت وی کر دِتی‘ ہُن مینوں وضاحت دین دی لوڑ نہیں اے‘ میں 2002 توں کدی ایہو جہی گل نہیں کیتی۔ ایاز صادق دا کہنا سی کہ جے تہانوں روز ایہ کہیا جاوے کہ مودی دی روح تہاڈے وچ آ گئی اے‘ تُسیں ہندستان دے او تے غدار او تے کیہ تہاڈا دِل نہیں دُکھے گا‘ کیہ تُسیں کدی جذبات وچ آ کے کوئی ایہو جہی گل نہیں کرو گے‘ میں جہڑی گل کیتی ایس حکومت بارے کیتی تے ٹھیک کیتی۔ پچھلے سپیکر نے ہور کہیا کہ سیاسی ایشو نُوں سیاسی رہنا چاہیدا اے تے اسیں اوہ گل کریے جہڑی قومی مفاد دی ہووے‘ اینا نہ اکساؤ کہ کوئی ہور ایہو جہی گل ہو جاوے‘ ایس لئی ایہنوں ایتھے چھڈ دینا چاہیدا اے۔