kraamaat@gmail.com
+ +92 333-430-6384


اپوزیشن اپنی کرپشن بچان لئی کجھ وی کر سکدی اے: عثمان بزدار۔۔۔٭رویل نیوز٭


نمائندا رویل November 06, 2020


لاہور (نمایندا رویل)وزیر اعلا پنجاب سردار عثمان بزدار نے کہیا اے کہ ایس او پیز اُتے عمل نہ کرن دے کارن کرونا دے روگیاں وچ دن بدن وادھا ہو رہیا اے۔ کرونا نال مَوتاں دی شرح وی ودھ رہی اے۔ شہریاں توں اپیل اے کہ اوہ گھر توں باہر نکلن ویلے ماسک دا استعمال لازمی کرن کیوں جے کرونا توں محفوظ رہن لئی سماجی فاصلیاں نُوں برقرار رکھنا ضروری اے۔ اوہناں نے کہیا کہ پنجاب وچ کرونا دے ایکٹیو روگیاں دی گنتی 5618 ہو گئی اے۔ 24 گھنٹیاں دوران کرونا دے 338 کنفرم کیسز ساہمنے آئے تے 5 روگی چلانا کر گئے۔ ایس توں وکھ وزیر اعلا پنجاب سردار عثمان بزدار نال وزیر اعلا شکایت سیل دے وائس چیئرمین ناصر سلمان نے ملاقات کیتی۔ ناصر سلمان نے وزیر اعلا عثمان بزدار نُوں وزیر اعلا شکایت سیل دی کمکاری توں اگاہ کیتا۔ ملاقات وچ آپسی دلچسپی تے سیاسی امور اُتے وی گلبات کیتی گئی۔ وزیر اعلا عثمان بزدار نے ایس موقع اُتے گلبات کردیاں ہویاں کہیا کہ اپوزیشن اپنی کرپشن بچان لئی پاکستان دی سالمیت نال کھیڈ رہی اے۔ اپوزیشن جماعتاں ملک دشمن عناصر دے ایجنڈے اُتے عمل پیرا نیں۔ اداریاں خلاف کرپٹ ٹولے دا بیانیا لوکائی نے بلکل رَد کر دِتا اے۔ اوہناں نے کہیا کہ وزیر اعلا شکایت سیل وچ آن والیاں شکایتاں دا فوری ازالا لوکائی نُوں ریلیف پہنچا رہیا اے تے وزیر اعلا سکایت سیل دی کمکاری تحسین جوگ اے۔ ناصر سلمان نے ادارے دی بہتری لئی دن رات محنت کیتی۔ وزیر اعلا عثمان بزدار نے زیر التوا شکایتاں دے چھیتی ازالے دی ہدایت کیتی۔