kraamaat@gmail.com
+ +92 333-430-6384


 سمارٹ لاک ڈاؤن دا فیصل،صوبے دی لوکائی دیاں زندگیاں دے تحفظ لئی ہر ضروری اقدامات چُکاں گے:عثمان بزدار۔۔۔٭رویل نیوز٭


نمائندا رویل November 10, 2020


لاہور (نمایندا رویل) وزیر اعلا پنجاب سردار عثمان بزدار دی ہدایت اُتے وزیر اعلا آفس وچ کابینا کمیٹی برائے انسداد کرونا دا خصوصی اجلاس منعقد ہویا‘ جہدے وچ کرونا دی دوجی لہر توں لوکائی نُوں بچان تے حفاظتی اقدامات اُتے عملدرآمد لئی اہم فیصلے کیتے گئے۔ کابینا کمیٹی برائے انسداد کرونا نے اجلاس وچ صوبے وچ روگیاں دی گنتی وچ وادھے اُتے تشویش د ا اظہار کیتا تے کرونا کیساں والے علاقیاں وچ سمارٹ لاک ڈاؤن دا فیصلا کیتا گیا۔ اجلاس وچ کئی مارکیٹاں تے بازاراں وچ کرونا ایس او پیز دی خلاف ورزی دا سخت نوٹس لیا گیا تے انسداد کرونا ایس او پیز دی خلاف ورزی کرن والیاں مارکیٹاں تے بازاراں نُوں بند کرن دا فیصلا کیتا گیا۔ اجلاس نال خطاب کردیاں ہویاں وزیر اعلا پنجاب سردار عثمان بزدار نے کہیا کہ کرونا دے ودھدے ہوئے کیساں دے پیش نظر متاثرا علاقیاں وچ شہریاں دے وسیع تر مفاد وچ لاک ڈاؤن دا فیصلا کیتا گیا اے۔ باہر نکلن ویلے ماسک دی پابندی ہر شہری لئی لازم اے‘ مارکیٹاں تے بازاراں وچ ماسک دی پابندی اُتے سختی نال عملدرآمد کروان لئی ہدایتاں جاری کر دِتیاں نیں۔ وزیر اعلا نے کہیا کہ صوبے دی لوکائی دیاں زندگیاں دے تحفظ لئی ہر ضروری اقدامات چُکاں گے‘ کرونا دی دوجی لہر اُتے قابو پان لئی انتظامیا تے پولیس نُوں ہدایتاں جاری کر دِتیاں نیں۔ شہریاں دی زندگی سبھ توں عزیز اے۔ ایس او پیز اُتے عملدرآمد وچ کوتاہی برداشت نہیں۔ اوہناں نے کہیا کہ پنجاب وچ کرونا دے ایکٹیو روگیاں دی گنٹے 6,876 ہو گئی اے۔ 24 گھنٹیاں دے دوران کرونا دے 345 کنفرم کیسز ساہمنے آئے تے 1 روگی چلانا کر گیا۔ صوبائی وزیر صحت ڈاکٹر یاسمین راشد نے اجلاس نال خطاب کردیاں ہویاں کہیا کہ پنجاب وچ پازیٹو کیساں دی گنتی وچ وادھا ہو رہیا اے تے کرونا ٹیسٹاں دے مثبت آن دی شرح وی ودھی اے۔ اوہناں نے کہیا کہ پنجاب دے سرکاری ہسپتالاں وچ 418 روگی علاج ہیٹھ نیں تے 76 روگیاں دی حالت تشویش جوگ اے۔ صوبائی وزیر صحت نے کہیا کہ وزیر اعلا عثمان بزدار دی ہدایت اُتے ضروری دوائیاں تے پی پی ایز دا وادھو سٹاک موجود اے۔