امریکا غیر ضروری جنگاں وچ اپنا کردار ادا نہیں کرے: جوبائیڈن ۔۔۔٭رویل نیوز٭

نیو یارک (نیٹ نیوز) امریکا دے نویں منتخب صدر جوبائیڈن نے کہیا اے کہ امریکا بحرالکاہل تے بحراوقیانوس دے سمندراں وچ عالمی قیادت دا کردار ادا کرے گا تے غیر ضروری جھیڑیاں وچ ایہدا کوئی کردار نہیں ہووے گا۔ بائیڈن نے کہیا کہ امریکا اپنی قومی سلامتی دی ٹیم متعارف کروان لئی غیر ضروری جنگاں وچ اپنا کردار ادا نہیں کرے گا تے نہ ای اپنے وسایل نُوں بے مقصد جنگاں اُتے ورتے گا۔ بائیڈن نے اپنی خارجا پالیسی دیاں خصوصیات دے بارے وچ گل کردیاں ہویاں کہیا کہ اوہناں دا ملک ایشیا پیسیفک دے خطے وچ عالمی سطح اُتے قائدانا کردار ادا کرن تے ایکے نُوں مضبوط بنان دی کوشش کرے گا۔ امریکی صدارتی چوناں وچ اپنی فتح دا اعلان کرن والے ڈیمو کریٹک امیدوار بائیڈن نے ہور کہیا کہ امریکا دنیا دی قیادت کرن لئی تیار اے۔ اوہ اِک ایہو جہی ٹیم پیش کر رہے نیں جہڑی امریکا تے ایہدی لوکائی دی سلامتی تے حفاظت نُوں برقرار رکھے گی۔ اِک ایہو جہی انتظامیا جہڑی اپنے اتحادیاں نُوں نظر انداز کیتے بغیر اپنے مخالفین دا مقابلا کرن لئی تیار ہووے گی۔ جوبائیڈن نے کہیا کہ مینوں خُشی اے کہ انٹیلی جنس اداریاں ولوں انتقال اقتدار دی پرامن منتقلی دی یقین دہانی کروائی گئی اے۔ ساڈی ٹیم ملک نُوں درپیش چیلنجز دے مقابلے دی تیاری دے نال نال وباء نُوں قابو کرن‘ بہتر طور اُتے تعمیر نو تے ملک د ی حفاظت تے سلامتی دے تحفظ لئی مؤثر اقدامات کرے گی۔ نومنتخب امریکی صدر نے کہیا کہ بھاویں امریکی ریاستاں نے نتیجے دی توثیق کر دِتی اے تے اقتدار دی منتقلی دا عمل شروع ہو چکیا اے پر صدر ٹرمپ نے نتیجے نُوں منن توں انکار کر کے غیر جمہوری روایت قایم کیتی اے۔