چار لکھ توں ودھ بندے کرونا وایرس دا شکار ہو چکے نیں، نیشنل کمانڈ اینڈ اپریشن سینٹر ولوں آنکڑے جاری۔۔۔٭رویل نیوز٭

اسلام آباد (نمایندا رویل) پورے ملک وچ کرونا وباء دے روگیاں وچ ہر لنگھد ے دن نال وادھا ہوندا جا رہیا اے پچھلے 24 گھنٹیاں دے دوران ایس خطرناک وایرس نے ہور 39 بندیاں دیاں جاناں لے لئیاں جد کہ 4 لکھ توں ودھ بندے کرونا وایرس دا شکار ہو چکے نیں۔ نیشنل کمانڈ اینڈ اپریشن سینٹر ولوں جاری کردا آنکڑیاں دے مطابق پچھلے 24 گھنٹیاں وچ پورے ملک وچ 42 ہزار 904 کرونا ٹیسٹ کیتے گئے‘ جہدے بعد مجموعی کووڈ 19 ٹیسٹس دی گنتی 56 لکھ 27 ہزار 539 ہو گئی اے۔ پچھلے 24 گھنٹیاں دے دوران پورے ملک وچ ہور 3 ہزار 499 بندیاں وچ کرونا دی تشخیص ہوئی اے‘ ایس طرحاں پاکستان وچ کرونا دے تصدیق شدا روگیاں دی گنتی 4 لکھ 6 ہزار 810 ہو گئی اے۔ سرکاری آنکڑیاں دے مطابق ایس ویلے پورے ملک وچ کرونا دے فعال روگیاں دی گنتی ودھ کے 51 ہزار 654 ہو گئی اے‘ جہناں وِچوں 2 ہزار 469 دی حالت ماڑی اے۔ پچھلے 24 گھنٹیاں دے دوران پورے ملک وچ کرونا نال ہور 39 بندے چلانا کر گئے نیں جہدے بعد ہُن ایس وباء نال واصل ہون والے بندیاں دی گنتی 8 ہزار 205 ہو گئی اے جد کہ 1 ہزار 586 بندیاں نے کرونا نُوں شکست دے دِتی اے جہدے بعد ایس وباء خلاف جاری جنگ جتن والے بندیاں دی گنتی 3 لکھ 46 ہزار 951 ہو گئی اے۔