ساڈا مقابلا  عمران نال نہیں‘ سٹیبلشمنٹ نال وی اے‘ پارٹی نُوں مضبوط کرنا اے،حکومت نوں 31جنوری تک مہلت: مریم  نواز۔۔۔٭رویل نیوز٭

لاہور (نیوز ڈیسک) پاکستان ڈیمو کریٹک موومنٹ (پی ڈی ایم) نے حکومت نُوں 31 جنوری تک مستعفی ہون دی مہلت دے دِتی اے۔ لاہور وچ اگوائی اجلاس دے بعد آگو پی ڈی ایم مولانا فضل الرحمان نے بلاول بھٹو زرداری تے مریم نواز دے نال جاتی امراء وچ میڈیا نال گلبات کردیاں ہویاں کہیا کہ 31 دسمبر تک پی ڈی ایم دیاں ساریاں جماعتاں دے منتخب اراکین اسمبلی اپنے اپنے استعفے اپنی اپنی قیادت نُوں جمع کروا دین گے۔ حکومت 31 جنوری تک مستعفی ہو جاوے۔ جے حکومت نے دِتی گئی مہلت تک استعفا نہیں دِتا تے پہلی فروری نُوں پی ڈی ایم دا اگوائی اجلاس ہووے گا جہڑا لانگ مارچ دی تاریخ دا اعلان کرے گا۔ پر لوکائی توں اپیل کیتی جاندی اے کہ اوہ لانگ مارچ دیاں تیاریاں شروع کر دین۔ اوہناں نے کہیا کہ مینار پاکستان دے تواریخی تے مثالی جلسے دے بعد پی ڈی ایم نے اعلامیا وی جاری کیتا اے۔ پی ڈی ایم دی سٹیئرنگ کمیٹی دا صوبیاں نُوں لانگ مارچ دی تیاری دے سلسلے وچ جاری کتیا گیا شیڈول بدستور برقرار اے۔ ہر صوبے وچ مجمانی کمیٹیاں صوبائی قیادت نال رَل کے لانگ مارچ دی حتمی تیاری کرن گیاں۔ اوہناں دا کہنا سی کہ سیاسی جماعتاں اپنے اپنے منشور اُتے چوناں لڑدیاں نیں۔ اسیں ساریاں جماعتاں ایہو جہے کوئی اقدامات نہیں کراں گئیاں کہ جہد ے نال جمہوریت نُوں نقصان ہووے۔ جے موجودا حکمران استعفے دے دین تے اسمبلیاں تحلیل کر دیندے نیں تے فیر پی ڈی ایم دی مشاورت نال مذاکرات دا فیصلا ہوسکدا اے۔ نائب صدر مسلم لیگ ن مریم نواز نے کہیا کہ ن لیگ دے اجلاس وچ جلسے دی ناکامی اُتے ناراضگیاں دیاں غلط خبراں چلوائیاں گئیاں جہدی اسیں تردید کردے آں۔ میں جلسا گاہ چھوٹا رکھن دی گل ضرور کیتی کیوں جے کئی لوک رَش دی وجھا توں اندر ای نہیں آ سکے سن۔ لوک گھنٹیاں کھلوتے رہے تے رَش دی وجھا توں کرسیاں پتا نہیں کتھے غایب ہو گئیاں سن۔ اوہناں نے کہیا کہ شدید سردی دے باوجود لوکائی دا جوش وخروش بہت زیادا سی۔ کرونا‘ حکومتی پروپیگنڈے‘ پانی چھڈن دے باوجود لاہور نے کسے شے دی پرواہ نہیں کیتی۔ حکومت نُوں وی حقیقت دا پتا لگ گیا اے تے ایہناں گھر صف ماتم وچھی ہوئی اے۔ اسیں ہُن لوکائی دی عدالت وچ جا چکے آں‘ ہُن سلیکٹڈ تے سلیکٹرز نُوں پچھے ہٹنا ای پوے گا۔ مریم نواز نے اِک سوال دے جواب وچ کہیا کہ پی ڈی ایم نُوں انتخابی ایکے وچ بدلنا ویلے تو ں پہلاں ہووے گا۔ اسیں سانجھے عوامی ایجنڈے اُتے متفق آں۔ عمران خان دے استعفے دے بعد اسیں انتخابی حریف ای آں۔ بلاول بھٹو زرداری نے کہیا کہ اسیں سارے اِک آں تے پی ڈی ایم دے پلیٹ فارم توں فیصلے کراں گے۔ ہُن مذاکرات نہیں سگوں عمران خان دے استعفے دا ویلا اے۔ اِک سوال دے جواب وچ اوہناں نے کہیا کہ شہباز شریف نال تعزیت لئی جیل جا رہیا آں۔دوجے پاسے مسلم لیگ نون دی سی ای سی‘ سی ڈبلیو سی‘ ایم این اے تے سینیٹرز دے اجلاس دی اندرونی کہانی ساہمنے آ گئی‘ وسیلیاں دے مطابق خواجا سعد رفیق نے تنظیمی خامیاں اُتے سوال چُکدیاں ہویاں کہیا کہ جہناں لوکاں نے جلسے دے حوالے توں ذمے داریاں نہیں نبھائیاں اوہناں توں سوال ہونا چاہیدا اے۔ مریم نواز دا کہنا سی کہ جہناں لوکاں نے ذمے داری نہیں چُکی اوہناں توں پُچھیا جاوے گا‘ پارٹی وچ جزا تے سزا دا عمل وی ہووے گا۔ وسیلیاں دے مطابق مریم نواز دا کہنا سی کہ ساڈا مقابلا صرف عمران نال نہیں‘ سٹیبلشمنٹ نال وی اے‘ پارٹی نُوں مضبوط کرنا اے‘ پی ڈی ایم دے فیصلے دے بعد استفے کدوں استعمال کرنے نیں ایہدے اُتے تہانوں کسے مُشکل وچ نہیں پاواں گے مشاورت کراں گے۔ وسیلیاں دے مطابق خواجا آصف نے کہیا کہ مریم صاحبہ جلسا کامیاب ہون دا کریڈٹ دوجیاں دے نال تہانوں جاندا اے‘ لاہور دے لوکاں نُوں جلسے لئی تُسیں جویں موبلائز کیتا سیا وہ تعریف جوگ اے۔ شاہد خاقان عباسی نے کہیا کہ کامیاب جلسا منعقد کرن لئی مریم نواز نے بہت متحرک کردار ادا کیتا۔ ایس توں وکھ مریم نواز نے ہور کہیا کہ مینار پاکستان دے جلسے نال ووٹ چور گھبرا گئے نیں تے ایہناں نُوں ہُن گھبرانا ای چاہیدا اے‘ مینار پاکستان دے تواریخی جلسے دے انعقاد اُتے اللہ تعالیٰ تے لوکائی دا شکریا ادا کردے آں‘ جلسے دے دوران پتا لگ گیا سی کہ میڈیا نُوں ہدایتاں کتھوں آ رہیاں نیں پر سانوں ہُن ایہدے نال فرق نہیں پیندا‘ جلسا ویکھن والے جاندے نیں کہ جنا وڈا جلسا میدان وچ سی‘ اوس توں وڈا جلسا باہر سی‘ ایہناں ساریاں نُوں شامل کیتا جاوے تے شاید لاہور دی تواریخ وچ ایہو جہیا کامیاب جلسا نہیں ہویا ہووے گا۔ ایہ خالصتن لوکائی دا جلسا سی‘ میں اوتھے کھلوتی سوچ رہی سی کہ جلسے دی تھاں چھوٹی پے گئی اے۔ مریم نواز نے کہیا کہ پاکستان دی تواریخ وچ کوئی ایہو جہی جماعت نہیں جہنوں اینیاں اوکڑاں تے مصیبتاں دا ساہمنا کرنا پیا ہووے‘ پارٹی نال وابستا سارے بندیاں دی جرات نُوں سلام پیش کردی آں‘ تُسیں سٹیبلشمنٹ‘ حکومت‘ کرونا تے موسم دیاں ساریاں اوکڑاں دا جرات تے بہادری تے ثابت قدمی نال مقابلا کیتا۔ وسیلیاں مطابق پاکستان مسلم لیگ ن نے اپنے قومی تے صوبائی اسمبلیاں سنے سینٹ دے اراکین نُوں 31 دسمبر تک اپنے استعفے پارٹی قیادت نُوں پیش کرن بارے مہلت دے دِتی اے۔