بھارتی اداکار سوشانت سنگھ دی خُد کشی دا معاملاسنجے لیلا بھنسالی تے آدتیہ چوپڑاں دے بیان وچ  فرق ساہمنے آ گیا……٭رویل نیوز٭

لاہور (نمایندا رویل) بالی ووڈ دے نوجوان اداکار سوشانت سنگھ دی خُد کشی دے معاملے وچ ممبئی پولیس نے فلم ساز آدتیہ چوپڑا دا بیان وی قلمبند کر لیا اے‘ ایس توں پہلے ایس معاملے وچ سنجے لیلا بھنسالی تے آدتیہ چوپڑا دے بیاناں وچ کافی فرق اے۔ بھارتی میڈیا رپورٹاں دے مطابق سوشانت سنگھ خُد کشی معاملے وچ ممبئی پولیس نے کجھ دن پہلاں ”یش راج فلمز“ دے آدتیہ چوپڑا توں پُچھ گِچھ کیتی سی۔ وسیلیاں دا کہنا اے کہ آدتیہ چوپڑا توں پولیس سٹیشن وچ صبح ساڈھے 8 وجے توں 12 وجے تک پُچھ گِچھ کیتی گئی۔ ایس توں پہلے ممبئی پولیس نے ایس معاملے وچ سنجے لیلا بھنسالی دا بیان ریکارڈ کیتا سی‘ جہدے وچ بھنسالی نے دَسیا سی کہ اوہ سوشانت نُوں اپنی فلم ”رام لیلا“ تے ”باجی راؤ مستانی“ وچ لینا چاہندے سن پر سوشانت اوس ویلے یش راج فلمز دے نال کنٹریکٹ وچ سن تے ایس لئی اوہ فلم نہیں کر پائے سن‘ یش راج پروڈکشن نال گل وی کیتی سی پر گل نہیں بن پائی دوجے پاسے اپنے بیان وچ یش راج فلمز دے آدتیا چوپڑا نے ایس گل توں صاف انکار کر دِتا کہ سنجے لیلا بھنسالی نے اوہناں نال رابطا کیتا سی۔