شوگر مافیا تے حکومت آہمنے ساہمنے،وڈا فیصلاشوگر کمیشن رپورٹ دی بنیاد اُتے ہویا……٭رویل نیوز٭

اسلام آباد (نمایندا رویل) حکومت نے شوگر مافیا خلاف کریک ڈاؤن دا وڈا فیصلا کر لیا اے‘ شوگر کمیشن رپورٹ دی بنیاد اُتے ایف بی آر‘ نیب‘ ایس ای سی پی تے ایف آئی اے نُوں تحقیقات دا حکم دے دِتا گیا‘ وزیراعظم عمران خان دی ہدایت اُتے مشیر برائے احتساب و داخلا بیرسٹر شہزاد اکبر نے گورنر سٹیٹ بینک‘ مسابقتی کمیشن تے 3 صوبیاں نُوں وی خط لکھ دِتے نیں۔ خطاں دے نال شوگر کمیشن رپورٹ وی گھل دِتی گئی اے۔ وزیراعظم عمران خان نے کہیا اے کہ کرپٹ عناصر نُوں منطقی انجام تک پہنچایا جاوے گا‘ حکمران آپ ملوث نہ ہون تے کرپٹ عناصر معاشرے وچ پنپ نہیں سکدے۔ خطاں وچ وفاقی حکومت نے اداریاں نُوں 90 دن وچ عملدرآمد رپورٹ پیش کرن دی وی ہدایت کیتی اے‘ حکومت نے ایف بی آر نُوں پورے ملک دیاں ساریاں شوگر ملاں دا آڈٹ کرن دے احکامات جاری کر دِتے نیں‘ ایف بی آر نُوں شوگر مِلاں دیاں بے نامی ٹرانزیکشنز دی تحقیقات کرن دا وی حکم دِتا گیا اے۔ اداریاں نُوں گھلے گئے خطاں وچ کہیا گیا اے کہ نیب شوگر کمیشن دے نتیجیاں دی روشنی وچ ذمے داراں دا تعین کرے‘ سٹیٹ بینک چینی ذخایر دے غلط استعمال تے مشکوک برآمدات دی تحقیقات کرے‘ خطاں وچ شوگر ملز نُوں سبسڈی دی ادائیگی دے باوجود گنا کاشتکاراں نُوں گھٹ ادائیگی دی تحقیقات دے احکامات جاری کیتے گئے نیں‘ سٹیٹ بینک نُوں ساریاں شوگر مِلاں بارے جامع رپورٹ پیش کرن دی وی ہدایت کیتی گئی اے۔ ایف آئی اے تے ایس ای سی پی نُوں کارپوریٹ فراڈ دی تحقیقات دی ہدایت کر دِتی گئی اے۔ ایس ای سی پی نُوں ذمے داراں دے تعین تے قانون دے مطابق عملدرآمد دی ہدایت کیتی گئی اے۔ خط وچ مسابقتی کمیشن توں شوگر مافیا خلاف اقدامات وچ دیر اُتے وضاحت منگی گئی اے تے ہور کہیا گیا اے کہ مسابقتی کمیشن وجھاں دا تعین کرے کہ شوگر کارٹل خلاف کوئی ایکشن کیوں نہیں لیا گیا۔ مسابقتی کمیشن نُوں شوگر کارٹل ولوں ذخیرا اندوزی تے یوٹیلٹی سٹوراں اُتے کھنڈ دی عدم فراہمی دی تحقیقات دا حکم دِتا گیا اے۔ وفاقی حکومت نے پنجاب‘ خیبر پختونخوا تے سندھ دے چیف سیکریٹریز نُوں گھلے گئے خطاں وچ کہیا اے کہ صوبائی حکومتاں شوگر کمیشن رپورٹ دے پیش نظر مختلف شوگر ملاں دیاں تحقیقات کرن تے گنا کاشتکاراں توں گھٹ قیمت اُتے گنا خریدن والیاں شوگر مِلاں خلاف قانونی چارا جوئی کرن‘ خط وچ کہیا گیا اے کہ مختلف شوگر مِلاں دا معاملا صوبائی محکما اینٹی کرپشن دے دایرا اختیار وچ آندا اے‘ صوبائی حکومتاں نُوں شوگر ملاں ولوں گنا کاشتکاراں نُوں سود اُتے قرض دین دی تحقیقات دے وی احکامات جاری کیتے گئے نیں۔ خط وچ کہیا گیا اے کہ شوگر ملز مالکان ولوں تاخیری حربے اپنائے گئے‘ شوگر مافیا ولوں بلیک میل کرن دی کوشش ناکام بنا دِتی گئی اے۔