مولانا فضل الرحمان تے نواز شریف دے وچکار سیاسی صورتحال اُتے وچار وٹاندرا ……٭رویل خبر٭

اسلام آباد (نیوز ڈیسک) حکومت مخالف ایکے (پی ڈی ایم) دے آگو مولانا فضل الرحمان تے مسلم لیگ (ن) دے تاحیات قائد نواز شریف دے وچکار ٹیلی فونک رابطا ہویا اے جہدے وچ ملک دی مجموعی سیاسی صورتحال اُتے وچار وٹاندرا کیتا گیا۔ وسیلیاں دا کہنا اے کہ نواز شریف نے مولانا فضل الرحمان دی صحت بارے پُچھیا‘ دوہاں قائدین نے اِک دوجے نُوں رمضان المبارک دی مبارکباد وی دِتی‘ ٹیلیفونک رابطے وچ دوہاں آگوواں نے ملکی سیاسی صورتحال اُتے وچار وٹاندرا کرن دے نال نال پی ڈی ایم دی اگے دی حکمت عملی اُتے وی گلبات کیتی تے پی ڈی ایم دی تحریک نُوں تیز کرن تے ضمنی الیکشن وچ حکومت دی لوکائی وچ غیر مقبولیت اُتے تفصیلی وچار وٹاندرا کیتا گیا۔ وسیلیاں دا کہنا اے کہ نواز شریف نے پیپلز پارٹی تے اے این پی دا معاملا مولانا اُتے چھڈ دِتا اے تے کہیا اے کہ تہاڈے اُتے پوری طرحاں اعتماد اے اسیں ہُن وی پی ڈی ایم نُوں متحد ویکھنا چاہندے آں۔شاہد خاقان عباسی اپنے بیان دی وضاحت کر چکے نیں ط۔ پی ڈی ایم دے آگو مولانا فضل الرحمان نے کہیا کہ پی ڈی ایم نُوں متحد رکھن لئی پیپلز پارٹی دی قیادت نال وی رابطے وچ آں‘ مسلم لیگ ن تے پیپلز پارٹی دے آگوواں ولوں اِک دوجے خلاف بیان بازی نہیں ہونی چاہیدی۔