جولائی توں شیواں  سستیاں، مہنگائی گھٹ جائے گی: وزیر خزانا شوکت ترین……٭رویل خبر٭

اسلام آباد (نیوز ڈیسک) وزیر خزانا شوکت ترین نے کہیا اے کہ جولائی توں مہنگائی وچ کمی آنا شروع ہو جاوے گی۔ وزیر خزانا شوکت ترین نے نجی ٹی وی نُوں انٹرویو دیندیاں ہویاں کہیا کہ کنک‘ دالاں درآمد کرن دی وجھا توں شیواں دیاں قیمتاں بُہتیاں نیں‘ مہنگائی دی اِک وجھا کسان تے ہول سیل مارکیٹ وچ قیمتاں دا فرق وی اے‘ جد کہ عالمی مارکیٹ وچ فوڈ آئٹمز دیاں قیمتاں وچ کمی دا اثر پاکستان وچ وی آئے گا۔ شوکت ترین دا کہنا سی کہ حکومت بجٹ وچ نویں ٹیکسز لان دا ارادا نہیں رکھدی سگوں حکومت ٹیکنالوجی دے استعمال نال ٹیکس بیس ودھائے گی‘ آئی ایم ایف نال ساڈی گلبات جاری اے‘ سٹیٹ بینک تے آئی ایم ایف نُوں کہیا اسیں تہاڈا ہدف پورا کراں گے پر ٹیکس اُتے ٹیکس نہیں لاواں گے‘ ایس ویلے اوہ شے کراں گے جو ساڈے مفاد وچ اے‘ میری کوشش اے کہ کوئی وی بُہتا ٹیکس نہ دیوے۔ اوہناں نے ہور کہیا کہ کرونا دی صورتحال نے ٹیکس وصولیاں نُوں متاثر کیتا اے۔ شوکت ترین نے دَسیا کہ حفیظ شیخ تے وزیراعظم دی پالیسی دی وجھا توں معیشت دا گراف اُتے گیا‘ جی ڈی پی گروتھ دا کریڈٹ حفیظ شیخ نُوں وی جاندا اے‘ آئی ایم ایف دا پروگرام بہت سخت سی جہدی وجھا توں معیشت دا بیڑا غرق ہویا‘ ساڈے کول کوئی راہ نہیں سی تے آئی ایم ایف نے ساڈے نال زیادتی کیتی۔ ایس توں وکھ سینیٹ وچ وزارت خزانا دے تحریری جواب وچ دَسیا گیا اے کہ موجودا دور حکومت وچ کل سرکاری قرضیاں وچ 12.5 کھرب رُپئے دا وادھا ہویا اے‘ دسمبر 2020 تک بیرونی قرضیاں دا کل حجم 82.4 ارب ڈالر ہو گیا اے۔