سانجھے چارٹر دی منظوری تے مبارک،پاکستان تے تاجکستان دے وچکار تجارت بہت اُچیچ رکھدی اے،دنیا وچ ملک نہیں خطے ترقی کردے نیں: عمران خان……٭رویل خبر٭

اسلام آباد (نیوز ڈیسک) وزیراعظم عمران خان نے اقتصادی تعاون تنظیم (ای سی او) دی پارلیمانی اسمبلی وچ سانجھے چارٹر دی منظوری اُتے مبارکباد دیندیاں ہویاں کہیا کہ دنیا وچ ممالک نہیں خطے ترقی کردے نیں تے ایہدے نال ساڈے خطے نُوں موقعے ملن گے۔ اسلام آباد وچ اقتصادی تعاون تنظیم (ای سی او) دی پارلیمانی اسمبلی دے اختتامی اجلاس نال خطاب کردیاں ہویاں وزیراعظم عمران خان نے کہیا کہ رکن ملکاں دے سارے نمایندیاں تے پاکستان آئے ہوئے پارلیمنٹیرینز نوں خُش آمدید کہندا آں۔ اوہناں نے کہای کہ مینوں خُشی ہوئی کہ اسلام آباد چارٹر اُتے دستخط کر کے منظور کیتا‘ جہدے اُتے ساریاں نُوں خراج تحسین پیش کرد ا آں کیوں جے ایہدے وچ تُسیں کجھ اہم گلاں کیتیاں نیں۔ اوہناں دا کہنا سی کہ سبھ توں پہلے تُسیں کمیٹیاں بنائیاں جہڑیاں ایہناں 10 ملکاں دے وچکار رابطیاں نُوں ہور ودھان گیاں‘ دنیا وچ ملک نہیں خطے ترقی کردے نیں تے ایہ اینا وڈا خطّا اے کہ میرے خیال وچ ترکی دے سپیکر نے کہیا کہ ساڈی مجموعی ابادی 45 کروڑ اے۔ وزیراعظم نے کہیا کہ 45 کروڑ دی ابادی اِک بہت وڈی ہیومینٹی دا ناں اے تے ایہدے وچ پوٹینشل ہے‘ جے اسیں اینی گنتی نُوں صحیح معنیاں وچ جویے تے تجارت ودھا لئیے تے اپنے مسئلے حل کر لئیے تے ایہ پورا پاور ہاؤس بن جاندا اے۔ اوہناں نے کہیا کہ ایہدے وچ مختلف ملکاں دیاں مختلف خاصیت نیں کہ کسے کول نوجوان ابادی اے تے مختلف وسائل نیں‘ جدوں ایہ اکٹھے ہون تے ایس صلاحیت دا استعمال کرن تے سبھ دا فایدا ہووے گا۔اوہناں دا کہنا سی کہ یورپی یونین ساڈے ساہمنے بنی تے ویکھدیاں ای ویکھدیاں سبھ دا معیار زندگی اُتے چلا گیا کیوں جے جدوں تُسیں معاشی تعاون ودھاندے او تے کسٹم اُتے اِک دوجے دیاں شیواں اُتے رکاوٹاں گھٹ کردے او تے ڈیوٹیز ختم کردے او تے تجارت نال سارے علاقے نُوں فایدا ہوندا اے۔ اوہناں نے کہیا کہ ساڈے کول سارے خطے دے اندر زبردست موقع اے کہ رابطا کاری ودھا کے بُہتا تعاون کر کے اِک دوجے دے نُوں بُہتا فایدا پہنچا سکدے آں۔وزراعظم نے ہور کہیا کہ پارلیمنٹ اِک ایہو جہی تھاں جتھے وڈے مسئلیاں دے فیصلے ہوندے نیں تے مذاکرے ہوندے نیں تے جدوں تُہاڈیاں کمیٹیاں فعال ہون گیاں تے ایدھر ایہ وی گل ہووے گی کہ کہناں شعبیاں وچ مسئلے آ رہے نیں تے ایہناں مسئلیاں نُوں دور کراں گے۔ عمران خان نے کہیا کہ مینوں خُشی ہوئی اے کہ تُسیں تجارت تے رابطا کاری دے نال نال سیاسی مسئلیاں اُتے واضح سٹینڈ لیا کیوں جے دومسئلیاں نال ساڈی جذباتی وابستگی اے کیوں جے اوتھے نا انصافی دی وجھا توں لوکاں اُتے ظلم ہو رہیا اے تے اوہناں نُوں حق نہیں مل رہیا جو بین الاقوامی قانون نے دِتا تے اقوام متحدا دی سلامتی کونسل دیاں قرار داداں ایہناں دے حق وچ نیں پر ایہدے اُتے عمل نہیں ہو رہیا اے۔ اوہناں نے کہیا کہ اِک فلسطین تے دوجا کشمیر وچ لوک بڑی تکلیف وچ نیں‘ تُسیں ایہدے اُتے واضح طور اُتے قرار داد پاس کیتی‘ انصاف لئی اواز شروع تھوڑی ہووے پر جدوں ودھدی اے تے ہر تھاں کھلر جاندی اے۔ اوہناں داکہنا سی کہ میری اج تاجکستان دے صدر امام علی نال ملاقات ہوئی تے احساس ہویا کہ خطے وچ ہور مسئلے نیں‘ اِک تے گلوبل وارمنگ دا مسئلا اے‘ جے درجا حرارت ایسے طرحاں اُتے جاندا گیا تے گلیشیئرز والے ملکاں نُوں بُہتا خطرا اے کیوں جے اوہناں لئی پانی دا مسئلا ودھدا جاوے گا۔ اوہناں نے کہیا کہ جے اسیں ہُن توں سخت اقدامات نہ کیتے تے کوشش نہ کیتی تے تاجکستان‘ کرغزستان‘ ازبکستان تے قازقاستان سبھ نُوں مسئلے آن گے۔ اوہناں دا کہنا سی کہ دنیا وچ موسمیاتی تبدیلی روکن لئی مہم چل رہی اے‘ ایس تحریک دا حصا بن کے سانوں ہُن توں کوشش کرنی چاہیدی اے کہ ایہدے اثرات گھٹ کریے۔ وزیراعظم دا کہنا سی کہ تاجکستان تے پاکستان نے طے کیتا اے کہ جدوں افغانستان توں امریکی فوج واپس جاوے تے اسیں پوری کوشش کریے کہ پرامن انخلاء تے سیٹلمنٹ ہووے‘ جے افغانستان وچ حالات ٹھیک نہ ہوئے تے اسیں سارے ایہدے نال متاثر ہوواں گے۔ اوہناں نے کہیا کہ سانوں سی ای ا ملکاں نُوں اپنے ولوں زور لاناچاہیدا اے کہ امریکی تے نیٹو فورساں افغانستان توں جار رہیاں نیں تے ایہ انخلاء پرامن ہووے‘ اوہ نہ ہووے جو 1988 وچ ہویا جدوں سویت یونین افغانستان توں نکلی تے کیہ ہویا اسیں سارے جاندے آں۔ وزیراعظم نے اسلام آباد چارٹر جاری کرن اُتے ای سی او پارلیمانی اسمبلی دا شکریا ادا کیتا تے توقع ظاہر کیتی کہ ایہدے نال خطے نُوں فایدا ہووے گا۔ ایس توں وکھ وزیراعظم عمران خان تے تاجکستان دے صدر امام علی رحمان وچکار ملاقات ہوئی‘ ملاقات وچ پاکستان تے تاکستان وچکار مختلف شعبیاں وچ تعاون لئی 12 معاہدیاں اُتے دستخط ہوئے۔ ایس موقع اُتے وزیراعظم نے کہیا کہ دنیا نُوں اسلامو فوبیا دی وجھا توں اسلام دی حقیقت توں دور کیتا جا رہیا اے‘ پاکستان تے تاجکستان دے وچکار تجارت بہت اہمیت رکھدی اے تے تجارت دے شعبے وچ دوہاں ملکاں دے رابطے مضبوط ہون گے‘ افغان امن عمل کامیاب نہ ہویا تے انتشار دا دھڑکُو اے‘ تے ایس انتشار نال پاکستان تے تاجکستان متاثر ہون گے تے دہشتگردی ودھن دا دھڑکُو اے۔ معاہدیاں دی تقریب بعد تاجکستان دے صدر امام علی رحمان نال سانجھی پریس کانفرنس کردیاں ہویاں وزیراعظم نے کہیا کہ تاجکستان دے صدر نُوں پاکستان آمد اُتے خُش آمدید کہندا آں‘ تاجکستان نال تعلیم تے دفاع دے شعبے وچ وی معاہدے کیتے نیں‘ تاجکستان نال تجارت تے کنیکٹیوٹی ودھان لئی افغانستان وچ امن بہت ضروری اے دوہاں ملکاں نُوں ایہ دھڑکُو اے کہ امریکا دے انخلاء تک افغانستان وچ سیاسی تصفیا نہ ہویا تے کدھرے سوویت یونین دے چھڈ کے جان دے بعد والی صورتحال نہ پیدا ہو جاوے جو دوہاں ملکاں لئی بہت نقصان دہ ہووے گی‘ افغانستان وچ انتشار کھلرن دی صورت و چ ساڈی تجارت وی متاثر ہووے گی تے دہشتگردی ودھن دا دھڑکو اے۔ ایس موقع اُتے تاجک صدر امام علی رحمان دا کہنا سی کہ پاکستان وچ پرتپاک استقبال اُتے شکریا ادا کردا آں‘ وزیراعظم عمران خان نال ملاقات خشگوار رہی‘ اسیں دوہاں ملکاں وچکار بہتر تعلقات سنے ہور امور اُتے گل کیتی اے‘ تاجکستان پاکستان دے نال تجارتی تعلقات دا چاہیوان اے‘ پاکستان تے تاجکستان وچ مختلف شعبیاں وچ یاداشتاں اُتے دستخط خُش آیند نیں‘ پاکستان نے کرونا صورتحال وچ بہترین اقدامات کیتے‘ توانائی‘ ٹرانسپورٹ‘ تجارت‘ ثقافت‘ تعلیم تے ہور شعبیاں وچ تعاون وچ ودھا دے چاہیوان آں‘ گوادر منصوبا اہمیت دا حامل اے۔ خطے وچ امن لئی کوششاں اُتے پاکستان دی تعریف کردیاں ہویاں اوہناں نے کہیا کہ جغرافیائی حوالے نال پاکستان خطے دا اہم ملک اے‘ دہشتگردی دے خاتے لئی سارے ملکاں نُوں اقدامات کرن دی ضرورت اے‘ افغانستان وچ امن خطے وچ امن نا ل مشروط اے‘ پاکستان نے افغان امن عمل لئی اہم کردار ادا کیتا‘ پاکستان نال ٹیکنالوجی سنے ہور شعبیاں و چ تعاون جاری رکھاں گے۔