یو نیورسٹیاں وِچ پنجابی شعبے…….٭رویل کالم٭

یو نیورسٹیاں وِچ پنجابی شعبے…….٭رویل کالم٭

پنجاب بھر وچ پبلک سیکٹر دِیاں درجناں یونیورسٹیاں نیں جہناں وچ ہر قسم دے شعبے نیں۔ ساینس دے مضموناں دی گل نہ کریے تاں اسلامیات تے سیاسیات توں لے کے انگریزی تے فارسی تیکر دے مضمون یونیورسٹیاں وچ پڑھائے جاندے نیں۔ پنجابی شعبے دی گل کریے تاں لاہوراندر3 یونیورسٹیاں‘ پنجاب یونیورسٹی‘گورنمنٹ کالج یونیورسٹی تے لاہور کالج فار ویمن یونیورسٹی توں سوا پنجاب دی کسے ہور یونیورسٹی وچ پنجابی دا باقاعدا آپ مختیار شعباموجود نہیں۔ گورنمنٹ کالج یونیورسٹی فیصل آباد وچ ایہدے بارے کم اجے شروعات وچ اے۔ ایہ سارا پنجاب دے وچکارلے علاقے تک محدود اے۔ سوال پیدا ہوندا اے جے پنجاب دے شمالی تے جنوبی علاقیاں وچ کوئی پنجابی نوں یونیورسٹی دی پدھر اُتے ریگولر پڑھنا چاہوے تاں اوہ کیہ کرے؟ ملکی دستور مطابق ہر بندے نوں اپنی من مرضی تے من پسند پدھر تیکر تعلیم حاصل کرن دا حق حاصل اے پر لاہور توں سوا دُوجے شہراں دیاں یونیورسٹیاں وچ‘ لوکاں دی پُرزور منگ دے باوجود‘ پنجابی دے شعبے نہیں کھولے جا رہے۔

حقیقت وچ پنجاب اندرساری آبادی پنجابی بولدی تے سمجھدی اے۔ خاص دِھراں تے سازشیاں ولوں سر توڑ کوششاں تے پنجابی زبان نوں لہجیاں وچ ونڈن دِیاں سٹھ سالاسازشاں دے باوجود پورے پنجاب اندر اوہناں لوکاں دی گنتی 15 فیصد توں نہیں ودھ سکی جہڑے پنجابی دا ای کوئی لہجا بولن دے باوجود اپنی مادری زبان پنجابی توں سوا کوئی ہور لکھواندے نیں۔ اوہناں لوکاں نوں نہ گن کے وی پنجاب اندر پنجابیاں دی گنتی 85 فیصد دے لگ بھگ اے۔

ملتان دی اک یونیورسٹی وچ پنجابی دا شعبا کھلوان واسطے بہت جدوجہد کیتی گئی۔ عدالتی حکم دے بعدجدوں شعبا کھل

V دے آرڈر جاری ہو گئے تاں اوہناں وچ لکھ دِتا گیا کہ ایہ شعبا‘ کسے ہور شعبے دی عمارت وچ کھلے گا۔ ایہدے پاروں متعلقا شعبے دے لوکاں نوں اعتراض ہویا تے اوہناں نے ہنگاما کر کے پنجابی شعبا کھلن توں رکوا دتا۔ شعبا اجے تیکر نہیں کھل سکیا۔ عدالتی حکم دی کھلم کھلا خلاف ورزی ہو رہی اے۔ پر ایہ پاکستان اے۔

اسلامیا یونیورسٹی بہاولپور دا وی ایہو حال اے۔آل دوال دا سارا علاقا پنجابی بولیندڑ اے۔ لوکائی منگ کر رہی اے کہ سانوں ایم اے/ بی ایس کرن لئی لاہورجانا پیندا اے جو ممکن نہیں۔ ساڈے علاقے دی یونیورسٹی وچ پنجابی دا شعبا کھول کے سانوں سہولت دتی جاوے پر کجھ مفاد پرست تے متعصب حلقے ایہ نہیں ہون دیندے پئے۔

پنجابی دا راہ جویں جویں بند کیتا جا رہیا اے‘ ایہدے پاروں پنجابیاں وچ احساس محرومی جنم لے رہیا اے جوبنگالیاں دے احساس محرومی توں گھٹ نہیں۔ اوتھے وی اکثریت نوں کندھ نال لایا گیا‘ ہُن پنجاب وچ ایہو کجھ ہو رہیا اے۔ حکومت ہوش کرے تے کوئی وڈا دھماکا ہون توں پہلاں پہلاں حقیقت من کے‘ سارے پنجاب دِیاں یونیورسٹیاں وچ پنجابی دے شعبے کھولن دا پربندھ کرے۔