غزل۔۔۔۔۔٭رویل شاعری٭

غزل۔۔۔۔۔٭رویل غزل٭

احسن بھٹی

کمبلا اِنج کسریج گیا

گھر دی بُھل دہلیج گیا

ویلا ساڈا ہتھ پھڑ لئیسی

ساتھوں جے سنبھلیج گیا

اُتلا وی مُڑ تھلے اَوسی

پاسا جے پرتیج گیا

مَنجی سمجھو اُنئی گئی

سَگّھا جے اُنویج گیا

تَتّا تأ تے جھلنا ہَیسوں

آٹا جِسل گُنھیج گیا

جھٹ ہِک پاہلوں میرا ہا

جھٹ دے وچ بدلیج گیا

دِل سُکھاں دا کھوجی ہا

پر دُکھاں نال بھریج گیا

ہاہ ویلے نوں ٹنگن ٹُریا

بندا آپ ٹنگیج گیا

یار نوں لبھدا لبھدا لوکو

احسن آپ کھڑیج گیا

٭٭٭٭٭