سرکار دیاں غلط  پالیسیاں دی وجھا توں کرونا وایرس تیزی نال کھلریا:پاکستان مسلم لیگ ن دے دعوے۔۔۔۔۔٭رویل نیوز٭

اسلام آباد (نمایندا رویل) پاکستان مسلم لیگ ن دے پارلیمانی لیڈر خواجا آصف نے کہیا اے کہ موجودا حکومت دیاں غلط پالیسیاں دی وجھا توں کرونا وایرس تیزی نال کھلر رہیا اے‘ پہلے حکومت ولوں دَسیا گیا کہ پاکستان وچ زیادا تر کیسز زائرین دی وجھا توں ساہمنے آئے نیں جد کہ ہُن ایہدی تردید کیتی جا رہی اے‘ سندھ کرونا دے حوالے توں چنگا کم کر رہیا اے‘ پورے ملک وچ سارے ہسپتال مسلم لیگ نے بنائے نیں‘ تحریک اناصف دی حکومت 7 سالاں وچ اِک بی آر ٹی نہیں بنا سکی اے۔ پیر والے دن قومی اسمبلی اجلاس نال خطاب کردیاں ہویاں خواجا آصف نے کہیا کہ اپوزیشن لیڈر شہباز شریف ایس بحث دا اغاز کرنا چاہندے سن پر بیماری کارن اوہ نہیں آ سکے۔ اوہناں نے کہیا کہ پاکستان وچ 26 فروری نُوں پہلا کیس ساہمنے آیا‘ ایس بارے وچ وزیر خارجا نے ایوان نُوں دَسی اکہ جدوں کجھ مَوتاں سن تے گھٹ کیسز سن تے اسیں لاک ڈاؤن سخت کر دِتا سی تے آپ وزیراعظم نے کہیا سی کہ مئی چ کرونا ٹیسی اُتے ہووے گا پر اسیں لاک ڈاؤن تقریبن ختم کر دِتا۔ اوہناں نے کہیا کہ مشیر صحت ڈاکٹر ظفر مرزا نے سانوں بریفنگ وچ دَسیا کہ 78 فیصد کیسز زائرین راہیں آئے تے باقی شرح عمرہ یاں بیرون ملک والیاں دی اے۔ اوہناں نے کہیا کہ وزیر خارجا کہند ے نیں امیگریشن دے حوالے توں صحت دے معاملات صوبائی اے ایہ ریکارڈ درست کر لین‘ امیگریشن دے ملازمین وفاقی ہوندے نیں تے امیگریشن حکام نے تفتان بارڈر توں 292 بندیاں نُوں بغیر کسے چیک اپ دے روانا کیتا تے تفتان بارڈر اُتے مرغی خانے ورگی تھاں اُتے ہزاراں بندیاں نُوں رکھیا گیا تے فیر اوہناں نُوں پنجاب دے مختلف شہراں وچ گھل دِتا گیا۔ اوہناں نے کہیا کہ سانوں یورپ دی مثال نہ دوو کیوں جے ساڈے ایتھے حالے پیک آنی اے اوتھے صورتحال بہتر ہو چکی اے‘ اوہناں نے کہیا کہ حکومت دے اقدامات ابہام دا شکار نیں‘ جے لاک ڈاؤن ہوندا تے چنگا ہوندا۔ اوہناں نے کہیا کہ وزیر خارجا کہندے نیں 20 ہزار ٹیسٹنگ دی سہولت اے جد کہ 2 ہفتے پہلے دَسیا گیا کہ 50 ہزار دی سہولت حاصل کر لئی اے‘ موجودا دور وچ شعبا صحت نُوں بحران دا شکار کیتا گیا اے جدکہ پی ایم ڈی سی نوں وی غیر فعال کر دِتا گیا۔ خواجا آصف نے کہیا کہ وزیراعظم صرف اِک ویڈیو بیان دے کے غایب ہو گئے اوہناں نے کہیا کہ شاہ محمود قریشی نُوں سندھ کارڈ دا لفظ استعمال نہیں کرنا چاہیدا سی‘ سندھ نے بہترین کم کیتا اے‘ ایہ سمارٹ لاک ڈاؤن کیہ ہوندا اے؟ سانوں واضح دَسّو تے سمجھاؤ۔ اوہناں نے کہیا کہ 18 ویں ترمیم 2010 وچ منظور ہوئی‘ وزیر خارجانے اپنی تقریر وچ 8 توں ودھ وار ایہدا ذکر کیتا جے صوبائی خُد مختاری دا مسئلا پہلے حل کر لیا جاندا تے بنگلا دیش وکھرا نہ ہوندا تے ہُن جدوں ساریاں اکائیاں نے رَل کے جہڑیاں گلاں طے کر لئیاں نیں اوہناں نُوں نہ جھیڑیا جاوے‘ اوہناں نے کہیا کہ جے سندھ نے کوئی اقدام چُکیا اے یاں جی بی تے ازاد کشمیر نے کوئی کامیابی حاصل کیتی اے تے اوہدی تقلید کرو۔ اوہناں نے کہیا کہ 100 کیساں اُتے ملک لاک ڈاؤن پر 600 توں ودھ مَوتاں تے 31 ہزار توں ودھ کیسز اُتے لاک ڈاؤن ختم‘ ایہ ابہام توں ودھ کیہ اے‘ ہُن تک 59 ہزار کرونا کیسز کرن والے سارے ہسپتالاں نُوں مسلم لیگ ن نے بنایا اے‘ حکومت دَسے کہ پچھلے 7 سالاں دے دوران خیبر پختونخوا وچ پی ٹی آئی دی حکومت کیہ کر رہی اے اوتھے کہڑے ہسپتال توں کنے ٹیسٹ ہوئے نیں تے ایہناں 7 سالاں دی کمکاری دے طور اُتے پشاور وچ بی آر ٹی منصوبے دا مقبرا کھلوتا اے۔ اوہناں نے کہیا کہ اوکڑاں دے باوجود 4 توں 6 ہفتیاں دا مکمل لاک ڈاؤن ہو جاندا تے اج پیک آن دیاں گلاں نہ ہوندیاں۔ اوہناں نے کہیا کہ ن لیگ دے حوالے توں شاہ محمود قریشی نے 10 سال حکومت دی گل کیتی اے‘ پنجاب وچ 59 ہزار 167 کیسز ٹیسٹ ہوئے نیں تے جنے کیسز ٹیسٹ کیتے گئے نیں اوہ سارے 10 ادارے ن لیگ نے قایم کیتے سن‘ کرونا وایرس توں بچاء دا کوئی پلان ساڈے کول نہیں اے تے ہُن ایہ رولا پیا اے کہ بھارت توں وی ارباں رُپئے دی دوا منگوائی گئی اے۔