کالا دھن ہنڈی‘ حوالے نال باہر گھل کے ٹی ٹیز راہیں منگوایا جاندا  رہیا،اجہے ثبوت ملے نیں جس نال شہباز شریف دا بچنا مشکل اے:شہزاد اکبر۔۔۔۔۔٭رویل نیوز٭

اسلام آباد (نیوز ڈیسک)وزیراعظم دے معاون خصوصی برائے احتساب شہزاد اکبر دا کہنا اے کہ پاکستان مسلم لیگ (ن) دے صدر میاں محمد شہباز شریف خلاف جہڑے ثبوت ملے نیں اوہناں نال بچنا مشکل اے۔بدھ والے دن وفاقی دارلحکومت وچ پریس کانفرنس وچ شہزاد اکبر نے کہیا کہ شہباز شریف دی وطن واپسی ہو چکی‘ اوہ نیب دے ساہمنے وی پیش ہو رہے نیں‘ قومی اسمبلی وچ ا پوزیشن لیڈر عجیب و غریب فرمودا ت نال لوکاں نُوں گمراہ کر رہے نیں۔ شہباز شریف خلاف جہڑے شواہد نیں اوہناں توں بچنا سوکھا نہیں۔ نیب شہباز شریف خلاف 10 سالا دور اقتدار دی تحقیقات کیتی۔شہزاد اکبر دا ہور کہنا سی کہ10 سال دے دوران شریف خاندان دے اثاثیاں وچ وادھا ہویا۔ اثاثیاں وچ انھے وادھے دی وجھا ٹی ٹیز نیں۔ غریب ملازم جہے کدی کراچی نہیں گئے اوہناں نُوں کروڑاں رُپئے گھلے گئے۔ کدی پاپڑ والے تے کدی سیکریٹری دے اکاؤنٹ وچ پیسے آئے۔ وزیراعظم دے معاون خصوصی برائے احتساب دا کہنا سی کہ کالا دھن ہنڈی‘ حوالے نال باہر گھل کے ٹی ٹیز راہیں منگوایا جاندا سی‘ لیگی صدر میں نہ مناں دی رِٹ لا لین پر حقیقت نہیں لُک سکدی۔ مسلم لیگ ن دے صدر شہباز شریف نے کہیا کہ اوہ اپنے بچیاں دے معاملات دے ذمے دار نہیں‘ شہباز شریف نے متعدد کمپنیاں اپنے ملازماں دے ناں بنوائیاں‘ رمضان شوگر ملز دے ملازم دے اکاوئنٹ وچ 480 ملین رُپئے (48 کروڑ رُپئے)منتقل ہوئے۔ شہزاد اکبر دا کہنا سی کہ ملازماں دے ناں اُتے بنائیاں گئیاں کمپنیاں وچ ارباں رُپئے منتقل ہوئے جہناں دے ناک اُتے کمپنیاں بنائیاں گئیاں اوہناں دی تنخاہ 18 توں 60 ہزار تک اے‘ شہباز شریف دیاں کمپنیاں دا اِک فرنٹ نیٹ ورک اے‘ شریف فیڈ ملز دے ملازم دے ناں اُتے وی کمپنی بنائی گئی۔