لیلۃ القدر دا ثواب اک ہزار مہینیاں دی عبادت توں افضل اے

لیلۃ القدر دا ثواب اک ہزار مہینیاں دی عبادت توں افضل اے

شیخ محمد انور

روزے رکھنا اک اہم اسلامی رُکن اے ایہدے وچ بہت سارے جسمانی، روحانی، اخلاقی، معاشی تے سماجی راز لُکے ہوئے نیں۔ کجھ ناشُکرے تے رب ولوں ردے ہوئے ناں دے مسلماناں توں علاوا سارے مسلمان ایس لئی رمضان دی آمد نوں شوق نال اُڈیک رہے ہوندے نیں تے ایہدا دل دی گہرائی توں احترام وی کردے نیں۔ پہلا عشرا رحمت، دوجا مغفرت تے تیجا دوزخ توں نجات دا فرمایا گیا اے۔ تیجے عشرے وچ جدوں اسیں شبِ قدر دی شمولیت دا جایزا لیندے ہاں تے ایہ حکمت آشکار ہوندی اے کہ تنے عشریاں وچوں جے انسانی وجود نوں کسے پاروں دوزخ دی اگ توں نجات حاصل کرن وچ کمی رہ وی گئی اے تے اک رات نفسانی خاہشاں دا قلع قمع کرکے اتھرواں دی برسات لا کے توبا دی جستجو نوں غالب کرکے ذوق طہارت پیدا کرکے تے اپنے پچھلے گناہواں نوں ساہمنے رکھدے ہوئے بندا اپنے رب نوں منان لئی سجدے وچ جھک جاوے رضائے الہی لئی کیتی جان والی اک رات دی گریا زاری ہزاراں مہینیاں دی عبادت تے ریاضت اتے فضلیت رکھدی اے۔ لیلتہ القدر خاص کر 27 ویں دی رات ای سمجھی جاندی اے۔ آخری عشرے وچ اک رات ایہو جہی اے جہدے وچ قرآنِ پاک دا نزول ہویا تے اوہنوں ای لیلتہ القدر آکھیا جاندا اے۔قرآن و سنت وچ ایس رات دا تعین تے نہیں کہ ایہ کہڑی رات اے پر ایس امر اتے لگ بھگ اتفاق اے کہ اوہ قدرو منزلت والی رات رمضان المبارک دے آخری عشرے وچ آوندی اے تے آخری عشرے وچ وی طاق راتاں وچ ایہدا زیادا امکان ہوندا اے۔ نبی کریمؐ نے شعبان تے رمضان نوں رب تعالی دا مہینا قرار دتا اے۔ رمضان دنیا دے سارے مسلماناں لئی تریبتی کورس دی حیثیت رکھدا اے۔ ایہ مہینا اصل وچ تزکیا نفس دی مشق دا مہینا اے دنیا دے تقریبن سارے جرایم نفس دی سرکشی دا نتیجا ہوندے نیں۔ غصا جہدے پاروں قتل تے دوجے جرایم ہوندے نیں جنسی جراہم تے دوجے سارے جرایم نفس دی سرکشی دا نتیجا نیں ایس لئی ربِ کریم نے سارے مسلماناں لئی اک مہینا نفس کشی لئی متھیا اے۔ روزا رکھ کے زندگی دے سارے معاملات انجام دینے چاہیدے نیں کیوں کہ روزا نفس کشی لئی فرض کیتا گیا اے روزا رکھن کے اپنے آپ نوں ائیر کنڈیشنڈ کمریاں وچ ارام اپڑان نال روزے دی اصل روح مر جاندی اے۔ روزا ناں اے اپنے آپ نوں مکمل طور تے پابند کرن دا، کھان پین دے معاملات وچ گلبات دے معاملات وچ، جنسی معاملے وچ تے دوجے سارے کماں لئی اپنے آپ نوں مکمل طور تے پابند کرن دا نان روزا اے۔ جے روزا رکھ کے کسے اک فعل دی وی پابندی نہ کیتی جاوے تے روزا ای مکروہ ہوجاندا اے۔ اصل روزا اپنے نفس نوں اپنے ذہن نوں کنٹرول کرن دا ناں اے۔ ایس گل وچ کوئی شک نہیں کہ جے روزے نوں اوہدی صحیح روح نال پورا مہینا رکھیا جاوے تے منشیات دے عادی دی منشیات توں، جھوٹھے دی جھوٹھ توں، جنسی بندیاں دی جنس توں تے غصا کرن والیاں دی غصے توں نجات بہت حد تیکر ممکن ہوجاندی اے۔ اکثر ویکھیا گیا اے کہ رمضان دا مہینا نماز دی تے تلاوت قرآن پاک دی لذت توں ہمکنار ہوکے بہت سارے بندے ہمیشاں لئی نماز تے تلاوت قرآن پاک دے پابند ہو گئے۔ سارے مسلماناں نوں تزکیا نفس دے ایس مہینے توں پورا فایدا چکنا چاہیدا اے تاں جے اوہناں دیاں زندگیاں صحیح اسلامی سانچے وچ ڈھل سکن تے رب دی رحمت دے طلبگار ہو سکن۔ روزیاں دا دوجا وڈا فایدا اپنی بھکھ تے پیاس اتے قابو پانا اے۔ کئی لوک بھکھ تے پیاس اگے ایس حد تیکر بے وسے ہوجاندے نیں کہ روٹی دے اک ٹوٹے لئی انسانیت توں ڈگ جاندے نیں کئی بندے ایس مہینے دی پابندی کرن نال ان گنت بیماریاں توں نجات پا لیندے نیں۔ ایس لئی جے روزے نفس لئی معالج نیں تے وجود لئی روزے رکھن نال نادر بندیاں دی بکھکھ تے پیاس دا احساس ہوندا اے۔آکھیاجاندا اے کہ انسان آپ بھکھا ہووے تے اوہنوں دوجے دی بھکھ دا احساس ہوندا اے۔ ساڈا مذہب سانوں جو پیار تے احساس دا درس دیندا اے روزے ایہدے وچ اہم کردار ادا کردے نیں۔ ہر مسلمان دے دل وچ نادر بندیاں دا درد آپے ای پیدا ہوجاندا اے تے اوہنوں دوجے انسان دی بھکھ دا احساس ہوندا اے۔ رمضان دا مہینا ایس لئی وی مسلماناں لئی انتہائی متبرک اے کہ ایس مہینے وچ مسلماناں لئی قرآن مجید نازا کیتاگیا جو حالات مطابق بنی پاک تیکر اپڑایا گیا مسلماناں لئی ایس دنیا وچ قرآن مجید ای سبھ توں وڈی رشد تے ہدایت والی کتاب اے جو قیامت تیکر مسلماناں دی رہنمائی دا فریضا انجام دیوے گا۔

ایس مہینے وچ ساریاں راتاں توں افضل رات لیلتہ القدر اے ایس رات عبادت دا ثواب اک ہزار مہینیاں دی عبادت توں وی ودھ اے۔ اللہ رب العزت دا ایہ مسلماناں اتے کس قدر وڈا انعام اے اللہ تعالی اپني بندیاں نوں کس کس طریقے نال اپنیاں رحمتاں توں نوازدا اے کس قدر افضل مہینا اے۔ رمضان المبارک وچ ایہ مبارک رات آوندی اے رمضان دے مہینے وچ عباداتاں دا ثواب وی دوجے مہینیاں نوں کئی ودھ اے ایس مہینے دیاں راتاں وچ قیام دا ثواب وی دوجیاں ساریاں راتاں توں زیادا اے۔ تراویح نماز آخری راتاں وچ نماز، شبینا تے دوجیاں عبادتاں وی اک خاص اہمیت دی حامل نیں الغرض ایس مہینے اللہ دا فضل تے عنایتاں بے پناہ نیں تے ایہ مہینا اللہ رب العزت دا خاص انعامات وچوں اک وڈا انعام اے پر المیا ایہ اے کہ ساڈے وچوں بہت سارے مسلمان ایس مہینے دیاں برکتاں توں وی صحیح فایدا نہیں چک سکدے سگوں ایس مبارک مہینے وچ وی اللہ دے فضل دی بجائے اوہدے غضب نوں اواز دیندے نیں۔ ذخیرا اندوزی کیتی جاندی اے تے رمضان دی تقدس دے تقاضے پورے نہیں کیتے جاندے۔ سانوں ایس مبارک مہینے وچ ایس گل دا جایزا لینا چاہیدا اے کہ کیہ اسیں ایس مقدس مہینے دے تقاضے پورے کررہے ہاں یا نہیں؟ دن دے روزے تے راتاں نوں جاگ کے عبادتاں کرنا ساڈے اتے بھار نہیں اے سگوں اپنیاں غلاظتاں دھون دا موقع اے پتا نہیں اسیں کنے لوک اگلے سال نہیں ہوواں گے فیر اسیں کیوں نہ اپنے نفساں تے دل دیاں غلاظتاں نوں دھو لویئے۔

روزا ساڈیاں جسمانی تے روحانی بیماریاں دا سبھ توں بہترین علاج تے رللہ دی رحمت دا بہترین وسیلا اے۔ اللہ سانوں ایس منہینے دیاں برکتاں توں فیض یاب ہون دا بھرپور موقع دیوے آمین۔ حقیقتن ایہ دن بہت مشکل نال لنگھ رہے نیں۔ راقم الحروف اتے رب دا ایہ احسان عظیم اے کہ اک لمے عرصے توں ہر سال آخری عشرے وچ اعتکاف مسجد نبوی وچ کردا اے تے مسجد نبویؐ دیاں رحمتاں تے برکتاں سمیٹدا اے پر بدقسمتی نال کرونا وبا پاروں اج گھر وچ بہہ کے اللہ رب العزت توں گناہواں دی معافی دا طالب بنیا بیٹھا واں۔ اللہ رب العزت رحم فرمائے تے امت مسلما نوں ایس وبا توں محفوظ فرمائے۔ آمین۔