اجوکے سائنسی دور وچ رویت ہلال کمیٹی دی کوئی لوڑ نہیں،مُفتی وکھ وکھ راہواں اُتے کھلوتے نیں:وفاقی وزیر برائے سائنس و ٹیکنالوجی فواد چودھری۔۔۔٭رویل نیوز٭

اسلام آباد (نمایندا رویل) وفاقی وزیر برائے سائنس و ٹیکنالوجی فواد چودھری نے اِک واری فیر رویت ہلال کمیٹی ختم کرن دی منگ کیتی اے۔ فواد چودھری دا کہنا اے کہ عید الفطر 24 مئی نُوں ہووے گی پر رویت ہلال کمیٹی پیر نُوں عید کرنا چاہندی اے۔ اوہناں نے ہور کہیا کہ اوہ کل پریس کانفرنس وچ ضروری امور ساہمنے لیان گے۔ پریس کانفرنس وچ دَسن گے کہ عید 24 مئی نُوں کویں بن جائے اے۔ فواد چودھری دا کہنا سی کہ جدید سائنسی دور وچ رویت ہلال کمیٹی دی کوئی لوڑ نہیں اے۔ پچھلے دن فواد چودھری سمندر پار مقیم پاکستانی صحافیاں نال ویڈیو لنک راہیں میٹنگ کر رہے سن جدوں اوہناں نے ایس حوالے توں گل کیتی۔ اوہناں نے ہور کہیا کہ مفتی منیب الرحمان تے مفتی پوپلزئی وکھرے وکھرے راہ اُتے کھلوتے نیں کیوں جے چن کسے دے کہن اُتے اپنا مدار تبدیل نہیں کردا اے تے ایسے صورت وچ رویت ہلال کمیٹی دی کوئی عملی اہمیت باقی نہیں اے۔ اوہناں دا کہنا سی کہ ناسا نے کہیا چن اُتے لما عرصا رہن لئی مشن گھلاں گے‘مستقبل وچ مولوی صاحبان لئی عید اُتے چن کرنا وڈا چیلنج ہووے گا۔ فواد چودھری دا کہنا سی کہ حکومت ہمیشا کہندی اے کہ جہڑا ویلا لنگھ جاوے اوہ چنگا اے‘ کرونا وایرس بارے پاکستان وچ حالات کنٹرول وچ نیں‘ ملک وچ ایس ویلے 47 روگی وینٹی لیٹر اُتے نیں‘ ابادی بُہتی اے جے وایرس نے شدت اختیار کیتی تے مشکل ہو سکدی اے۔ اوہناں نے کہیا کہ وڈی گنتی وچ لوکاں نُوں بیرون ملک توں لیا کے آئسولیشن وچ رکھنا مسئلا اے ایہدے لئی ہور اقدامات کیتے جا رہے نیں۔ترک ڈرامے ارطغرل دے حوالے توں گل کردیاں ہویاں اوہناں نے کہیا کہ سانوں اپنے ہیروز اُتے وی ڈرامے بنانے چاہیدے نیں‘ ترک تے اسلامی تواریخ نُوں سمجھنا وی ساڈے لئی بہت ضروری اے۔