اِک دن وچ ریکارڈ موتاں،2603کرونا روگی ودھ گئے،بازاراں وچ بھِیڑ گھٹ نہ ہو سکی،احتیاطی تدبیراں دا ناں نشان وی نہیں۔۔۔٭رویل نیوز٭

اسلام آباد (اُچیچا نمایندا) ملک وچ کرونا دے تصدیق شدا کیساں دی گنتی 50 ہزار توں ٹپ گئی جد کہ وایرس نال 1 دن دے دوران 50 مَوتاں ریکارڈ کیتیاں گئیاں جہدے بعد ملک وچ ایس وایرس نال واصل ہون والیاں دی گنتی 1 ہزار 67 ہو گئی اے‘ پچھلے24 گھنٹیاں وچ 2603 نویں کرونا کیس وی رپورٹ ہوئے جہدے نال کرونا وایرس نال متاثرین دی گنتی 51 ہزار653 ہو گئی اے۔ تفصیلات دے مطابق وزیراعظم دے اُچیچے صلاحکار برائے صحت ڈاکٹر ظفر مرزا نے اِک دن وچ 2603 کیسز رپورٹ تے 50 مَوتاں اُتے تشویش دا وکھالا کردیاں ہویاں پوری قوم توں اپیل کیتی اے کہ لاک ڈاؤن وچ نرمی دے دوران بازاراں‘ بھیڑوالیاں تھاواں‘ شاپنگ مالز تے دُکاناں وچ ماسک دا استعمال لازمی‘ سماجی فاصلا برقرار رکھو‘ دوجی صورت صورتحال ہور وِگڑ سکدی اے‘ ایہ عید پچھلیاں ساریاں عیداں توں مختلف ہووے گی‘ عید الفطر دے موقع اُتے گلے نہ ملو‘ سماجی فاصلا برقرار رکھو‘ 50 سال توں ودھ عمر دے لوک گھراں وچ ای رہن۔ اوہ جمعے نُوں نیشنل کمانڈ اینڈ اپریشنل سینٹر (این سی او سی) وچ میڈیا نُوں بریفنگ دے رہے سن۔ اُچیچے صلاحکار ڈاکٹر ظفر مرزا نے کہیا کہ پاکتان وچ پچھلے 24 گھنٹیاں وچ 50 مَوتاں سبھ توں ودھ نیں‘ اینے کیسز 24 گھنٹیاں وچ ہُن تک ساہمنے نہیں آئے‘ جہڑی ٹیسٹنگ پچھلے 24 گھنٹیاں وچ ہوئی اوہ اِک ریکارڈ اے‘ جے اسیں 24 گھنٹیاں دے کیسز تے مَوتاں نُوں ساہمنے رکھیے تے صورتحال تشویشناک اے۔ اوہناں نے کہیا کہ ایہ اوہدوں ہو رہیا اے جدوں اسیں صورتحال نُوں ساہمنے رکھدیاں ہویاں لاک ڈاؤن وچ نرمی کیتی‘ رمضان دے شروع وچ اسیں ایس او پیز بنائے‘ اوہناں اُتے عمل ہویا وی تے نہیں وی‘ لاک ڈاؤن وچ اسیں اسانیاں پیدا کیتیاں تاں جے لوک احتیاط کردیاں ہویاں عید شاپنگ کر سکن‘ شاپس‘ ٹرانسپورٹ تے شہریاں لئی ایس او پیز ساہمنے رکھے گئے۔ اوہناں نے کہیا کہ پچھلے ہفتیاں وچ مشاہدا انتہائی غیر تسلی بخش رہیا‘ افطاری توں پہلے بازاراں تے گلی محلیاں وچ صورتحال ہور وِگڑ جاندی اے‘ جے اسیں احتیاطی تدبیراں نُوں ساہمنے نہ رکھیا تے صورتحال ہور بدترین ہو سکدی اے‘ اسیں کسے نُوں الزام وی نہیں دے سکاں گے‘ کرونا وایرس کھلار نُوں روکن دا بنیادی نقطا سماجی فاصلیاں نُوں برقرار رکھنا اے‘ شاپنگ تے پبلک ٹرانسپورٹ دے حوالے توں ایس او پیز وچ ماسک دا استعمال ضرری متھیا گیا اے‘ کسے وی پرہجوم تھاں یاں پبلک ٹرانسپورٹ اُتے ماسک دا استعمال ہُن ضروری ہو چکیا اے‘ عید دی نماز وچ وی اوہی تدبیراں اپناؤ جہڑیاں رمضان وچ تراویح تے مسیتاں وچ اپنائیاں گئیاں۔ اوہناں نے کہیا کہ بجائے مسیتاں وچ جان دے گھراں وچ عید دی نمازد اکرو‘ جے تُسیں لاک ڈاؤن توں متاثرا لوکاں نُوں جاندے او تے اوہناں دی دل کھول کے مدد کرو۔ اوہناں نے کہیا کہ ایہ عید مختلف عید اے تُسیں اِک دوجے نال گلے نہیں ملنا‘ فاصلا رکھدیاں ہویاں اِک دوجے نُوں عید مبارک کہوو‘ گلے ملنا انفیکشن دے کھلار دا کارن بن سکدا اے‘ بڑی تیزی نال وایرس کھلر سکدا اے