kraamaat@gmail.com
+ +92 333-430-6384


اُس دن عید کراں گا


ارشاد سندھو May 23, 2020


"اُس دِن عید کراں گا"

ارشاد سندھو

جِہڑے دِن وی اس دھرتی تے

چِڑیاں دا ڈر لتھا

گُگھیاں دے نہ آنڈے پیتے

کال کلوٹے کاواں

جِہڑے دِن وی چُکنے چھڈے

اِلّاں بوٹ نمانے

جد نہ شاہ ممولھے کھوہی

کنگنی کونجاں کولوں

جِس دِن دُھپاں ہس کے دِتی

چھاواں نوں مزدوری

جِہڑے دِن نہ واواں دِتے

ماڑے رُکھ نوں دھکے

جہڑے دِن نہ پُھل مدھیچے

جگ دے پیراں تھلے

جہڑے دِن نہ داجاں کُھونے

رُتاں بُڈھیاں ہوئیاں

کچے کوٹھے نہ ڈھاون دی

بدلاں نے سونہہ کھادی

جِس دِن چیکاں سُن کے انبراں

کَنیں روں نہ پائی

جہڑے دِن وی سورج لتھا

سِدھیاں سِدھیاں کر کے

جہڑے دِن وی چھڈ دِتی توں

چنا ہیرا پھیری

رَج کے تیری دِید کراں گاں

میں وی اُس دِن عید کراں گاں

٭٭٭٭٭