کرونا وایرس کھلرن نال پوری دُنیا دی معیشت نوں نقصان اپڑیا اے پر ترقی پذیر ملک سبھ توں ودھ متاثر ہوئے،پاکستان دیاں برآمدات متاثر ہوئیاں: وزیراعظم عمران خان۔۔۔٭رویل نیوز٭

اسلام آباد (نمایندا رویل) وزیراعظم عمران خان نے کہیا اے کہ عالمی وباء کرونا وایرس دے دوران دنیا دی معیشت اُتے اثرات مرتب ہوئے نیں‘ ترقی یافتا ملک ترقی پذیر ملکاں دی مدد کرن۔ کرونا وایرس تے ایہدے بعد ترقی لئی سرمایا کاری اُتے عالمی ورچوئل اجلاس نال خطاب کردیاں ہویاں وزیراعظم نے کہیا کہ کرونا وایرس پوری دنیا دا مسئلا اے جہدے نال رَل کے نبڑنا پوے گا۔ اوہناں دا کہنا سی کہ کرونا وایرس نال پوری دنیا دی معیشت اُتے بُرے اثرات مرتب ہوئے‘ ایہدے نال پاکستان دیاں برآمدات وی متاثر ہوئیاں۔ اوہناں نے کہیا کہ ترقی پذیر ملک کرونا وایرس نال سبھ توں ودھ متاثر ہوئے‘ ایس لئی ترقی یافتا ملکاں نُوں چاہیدا اے کہ اوہ ترقی پذیر ملکاں دی مدد کرن۔ وزیراعظم عمران خان دا کہنا سی کہ نائیجیریا‘ ایتھوپیا تے مصر نُوں وی ساڈے ورگے مسئلیاں دا ساہمنا اے۔ اجلاس نال خظاب وچ وزیراعظم نے کہیا کہ کرونا دے خلاف جی 20 ملکاں دے اقدامات دا خیر مقدم کردے آں۔ اجلاس دی مجمانی کینیڈا تے جیمیکا دے وزرائے اعظم تے اقوام متحدا دے سیکریٹری جنرل نے کیتی۔ ایس توں وکھ وزیرِاعظم عمران خان نے کہیا اے کہ طیارا دُکھانت دی شفاف تے غیر جانبدار انکوایری تے واقع نال جڑے حقایق نُوں ساہمنے لیان لئی کوئی کسر نہیں چھڈی جاوے گی‘ عید دے موقع اُتے طیارا دُکھانت قوم لئی اِک بہت وڈا دُکھانت اے‘ میں انسانی جاناں دے ضیاع اُتے گوڑھے دُکھ تے افسوس دا اظہار کردا آں تے دُکھ دی ایس گھڑی وچ غمزدا خانداناں ں دے دُکھ وچ رلتی آں‘ ایس افسوسناک واقع دی تحقیقات وچ انصاف دے سارے تقاضے پورے کیتے جان گے‘ حقایق تے تفصیلات توں لوکائی نُوں مکمل طور اُتے اگاہ کیتا جاوے گا‘ سول ایوی ایشن‘ پی آئی اے‘ متعلقا اداریاں تے ہوائی سفر نال جڑے عوامل وچ اصلاحات دے عمل نُوں تیز کیتا جاوے گا۔ ایہناں خیالاں دا اظہار اوہناں نے اپنی صدارت پی آئی اے مسافر طیارا دُکھانت دے حوالے توں اعلا سطح دی بریفنگ دے موقع اُتے کیتا۔ اجلاس وچ وزیرِ ہوا بازی غلام سرور خان‘ وزیر اطلاعات و نشریات سینیٹر شبلی فراز‘ معاون خصوصی برائے اطلاعات لیفٹیننٹ جنرل (ر) عاصم سلیم باجوا‘ معاون خصوصی ڈاکٹر شہباز گل‘ سیکرٹری ہوا بازی ڈویژن حسن ناصر جامی‘ چیف ایگزیکٹو پی آئیا ے ائر مارشل ارشد محمود ملک تے ہور سینئر افسراں نے رلت کیتی۔ وزیرِاعظم عمران خان نُوں طیارا دُکھانت دی تحقیقات‘ حادثے دی شفاف تے غیر جانبدار انکوایری نُوں یقینی بنان لئی ملکی تے غیر ملکی ماہرین دیاں خدمتاں ں حاصل کرن تے ہُن تک دی ٹورا کاری دے حوالے توں تفصیلی بریفنگ دِتی گئی۔ وزیرِاعظم عمران خان نے کہیا کہ انسانی جان دا کوئی نعم البدل نہیں پر حکومت متاثرین نُوں یقین دواندی اے کہ ایس افسوسناک واقع وچ انصاف دے سارے تقاضے پورے کیتے جان گے۔ وزیراعظم نے ہدایت کیتی کہ دُکھانت دی شفاف تے غیر جانبدار انکوایری تے واقع نال جڑے حقایق نُوں ساہمنے لیان لئی کوئی کسر نہ چھڈی جاوے۔ ماضی وچ ملک وچ ہون والے ہوائی حادثیاں اُتے گل کردیاں ہویاں وزیرِاعظم نے ہدایت کیتی کہ ماضی وچ ہو والے سارے دُکھانتاں دیاں رپورٹاں وی ساہمنے لیاندیاں جان تاں جے لوکائی نُوں ایس حوالے توں حقایق توں اگاہی مل سکے۔ وزیراعظم نے ہدایت کیتی کہ شہید ہون والے مسافراں دے خانداناں نُوں ہر ممکنا سہولت تے معاوضے دی ادائیگی دے نال نال اوہناں متاثرین نُوں وی معاوضا اد اکرن لئی پیکج تیار کیتا جاوے جہناں دے گھر یاں املاک ایس دُکھانت نال متاثر ہوئے نیں۔ وزیراعظم نے کہیا کہ ہوائی سفر نُوں محفوظ بنان لئی ضروری اے کہ سول ایوی ایشن‘ پی آئی اے‘ متعلقا اداریاں تے ہوائی سفر نال جڑے عوامل وچ اصلاحات دے عمل نُوں تیز کیتا جاوے۔