kraamaat@gmail.com
+ +92 333-430-6384
نمائندا رویل
May 30, 2020
پنجابیکا اکیڈمی تے قیمتی گلاں دی رَلت نال سانجھا مشاعرا،صدارت تجمل کلیم ہوراں کیتی۔۔۔رویل نیوز
پنجابیکا اکیڈمی تے قیمتی گلاں دی رَلت نال سانجھا مشاعرا مہان شاعر تجمل کلیم ہوراں دی صدارت وچ ہویا. مجمان پنجابیکا اکیڈمی دے ڈائریکٹر اعظم ملک سن. اُچیچے پروہنے چڑھدے پنجاب توں ڈاکٹر نیتو اروڑا تے مکیش عالم سن.سبھ توں پہلاں مجمان اعظم ملک ہوراں نے اپنا کلام پیش کیتا جو انج سی:
علم دا ناہیں کوئی حساب
ہر بندااک نویں کتاب
خشبو کھلری یاداں دی
سکے ویکھے جدوں گلاب
بھاویں لکھ دلیلاں گھڑ
کئی سوال نیں بناں جواب
کم کسے دے آون لئی
رکھیے نہ کوئی مکھ ثواب
پڑھ کے کافی بلھے دی
کھلے عشق اعظمؔ دے باب
ایس توں مگروں تجمل کلیم ہوراں نے اپنی ایہ شاعری پیش کیتی:
اوہدے بُوہے بند ہندے تے
لوک ضرورت مند ہندے تے
ایہناں کچیاں کھا جانا سی
لفظاں دے جے دند ہندے تے
ہنجواں سبھ کجھ دس دینا سی
تیرے کن وی بند ہندے تے
٭٭٭٭٭
ڈاکٹر نیتو اروڑا نے اپنا کلام سنایا اوہ انج سی:
٭
اوہ سمجھدے ین
میں خطرناک عورت ہاں
عورتاں جو سرخی نہیں لاندیاں
چوڑیاں نہیں پاندیاں
گہنیاں دی تھاں
کتاباں خرید دیاں ہن
جہناں دیاں پرساں وچ
کنگھا شیشا نہیں
کاغذ تے قلماں ہوندیاں
اجہیاں عورتاں خطرناک ہندیاں نیں
٭٭٭٭
مکیش عالم ہوراں نے ایس آن لائن مشاعرے وچ جو کلام سنایا اوہ ایہ سی
ایہ پگڑی بھالدی پھردی ہے
مینوں عہدیاں تائیں تے
میرے پیر ہن ایس تھاں تے
کہ جتھےسر نہیں رہندا
اوہ تیرے دَر تے بیٹھے
پاپ دھون دے کرن حیِلے
میں تینوں سوچ ہی لیندا ہاں
تاں کافر نہیں رہندا
٭٭٭٭٭
ایس مشاعرے نوں پورے جگ وچ وسدیاں پنجابیاں نے سُنیا تے پنجابیکا تے قیمتی گلاں دے ایس جتن نوں سلاہیا وی۔
