کیہ لاہور وچ 7 لکھ کرونا دے روگی ہو گئے؟

کیہ لاہور وچ 7 لکھ کرونا دے روگی ہو گئے؟

دُنیا وچ کرونا نال جنگ جتن ول دھیا ن دتا جا رہیا اے۔

اسیں ایہ منن لئی ای تیار نہیں کہ کرونا کجھ ہے وی۔

کیوں جے اج تک اسیں کسے نوں کجھ سمجھیا ای نہیں ،نہ اپنے جیون نوں تے نہ لوکاں دے جیون نوں۔

مارکیٹاں کھلھ گئیاں کاروباراں لئی سارے کھیتر ای کھول دتے گئے نیں۔بازاراں وچ رش ودھ گیا۔لوکاں نے اپنیاں دفتراں وچ جانا شروع کر دتا اے ہور تے ہور ترقیاتی منصوبیاں دے افتتاح وی ہو رہے نیں۔۔۔

لاہوریاں نوں زندا دل آکھیا جاندا اے،کیوں؟ ایس دا جواب اجکل بھرے بازاراں توں مل جاندا اے جدوں روز دو توں تِن ہزار لوکی کرونا دے روگی ہو رہے نیں تاں اوہ بازاراں وچ خریداری کر رہے نیں،جمگٹھے لگے نیں گلیاں محلے بھرے ہوئے نیں تے جدوں کسے نوں کہہ دو کہ احتیاط کرو تاں اگوں جواب آندا اے:

"جہڑی رات قبر وچ آنی،اوہ آنی ای اے"

اوہناں کدے سوچیا ای نہیں

کہڑی رات قبر وچ آنی اے؟۔۔۔

علاج کرن والے ڈاکٹراں نے اپنا جیون دا ء تے لایا ہویا اے،کئی ڈاکٹر ،کرونا وایرس دے روگیاں دا علاج کردیاں اپنا جیون ہار گئے ہوئے نیں۔

ہیلتھ ڈیپارٹمنٹ ولوں وڈی رپورٹ دا انکشاف ہو یا اے جو پنجاب سرکار نوں پندرھاں مئی نوں پیش کیتی گئی جہدے وچ وڈے وڈے انکشاف کرونا روگیاں دی تعداد دے حوالے نال کیتا گیا اے۔ایس رپورٹ نال سخت لاک ڈاؤن لان دی بینتی کیتی گئی سی۔سوچن والی گل تے ایہ وی اے کہ رپورٹاں چُھپائیاں کیوں جارہیاں نیں پندرھاں مئی نوں جہڑی رپورٹ پنجاب سرکار نوں پیش کیتی گئی سی اوس مطابق چھے لکھ توں ودھ کرونا دے روگی لاہور وچ ہو چکے نیں۔ایس وچ اندازے نال روگیاں دی تعداد دا اندازا لایا گیا اے۔

انج کرونا نہیں جانا، تے فیر کنج کرونا جانا اے؟ کیہ سبھ مل کے اک مہینے واسطے احتیاطی تدبیراں نہیں کر سکدے؟ تہانوں جان کے خُشی نہیں ہونی اے یاں دُکھ لگنا اے کہ لوکائی دا روّیا ای نہیں کہ ایس نوں گھلیا جاوے کیوں جے لوکائی دا ورتارا وی تاں سرکاراں ورگا ہو گیا اے۔جدوں پنج لوکاں دی مر ہوئی سی تاں اوس ویلے 24 گھنٹیاں دا لاک ڈاؤن سی تے راتاں نوں دس وجے اذاناں وی ہو رہیاں سن پر عملی طور تے جو کم ہو رہیا سی اوہ صفر ای سی۔ہُن جدوں روز دو یاں تِن ہزار نویں روگی آ رہے نیں تاں 24 گھنٹیاں دا لاک ڈاؤن دا خاتما کر دتا گیا۔

سیکرٹری ہیلتھ ولوں وڈی رپورٹ پندرھاں مئی نوں جہڑی رپورٹ پیش کیتی گئی اوہدے وچ پنج لکھ روگی دسے گئے نیں تے ایہ تعداد ودھدی رہی اے۔ایہدے وچ عید دے دیہاڑاں وچ 24 گھنٹیاں وچ ای لوکاں نے مل جُل کے جیون گزاریا اے تے اپنے گھراں نوں وایرس لے گئے نیں تے اک دن وچ ای لاہور وچ ست لکھ توں ودھ کرونا دے روگی ہو گئے ہونےنیں۔

دیس نوں اللہ توکل چھڈیا گیا اے جس کر کے لاہور شہر دا کوئی علاقا کرونا توں بچیا نہیں اے۔اوہناں لوکاں دی عقل نوں وی ست سلاماں جو کہہ رہے نیں کہ کرونا تے ہے ای نہیں!کاروباری طبقا اپنے کم نوں رو رہیا اے،عید دی وجھا توں ایہ سبھ ہویا تے حالے ہور عذاب نوں ودھایا جا رہیا اے۔

لوکائی نے ان پڑھتا دا ثبوت دتا اے تے امیراں غریباں دے رولے وچ پے کے سبھ نال دُشمنی نبھائی جا رہی اے تے ہن صرف ہفتے اتوار نوں کرونا پاروں لاک ڈاؤن ہوئے گا جس نال فیر اک ہاسے تے ٹھٹھے دا ماحول پیدا کیتا گیا۔جہڑا اندازا 7 لکھ دا لایا جا رہیا اے اوہ روز دی دس فیصد دے وادھے نال ودھ رہیا اے۔ایس ویلے حالات ایہ نیں کہ کرونا بارے گلاں ہو رہیاں نیں لوکاں دا جیون خطرے وچ اے تے فیر وی دو فیصد توں ودھ ابادی ودھدی ہوئی موت نوں منن لئی تیار ای نہیں ہو رہی۔۔۔۔۔۔۔۔۔۔۔۔۔ چھے لکھ توں ودھ والی رپورٹ ویکھ کے فیصلا کیتا گیا اے کہ صرف ہفتا اتوار نوں لاک ڈاؤن کیتا جاوے گا باقی دناں وچ کرونا نال لڑیا جاوے گا پر سوچن تے سمجھن والی گل اے کہ لڑے گا کون؟

٭٭٭٭٭