بجٹ 2020-21ء تے عوامی توقعات

بجٹ 2020-21ء تے عوامی توقعات

شیخ محمد انور

جون دا مہینا شروع ہو چکا اے چالو مہینے وچ حکومت بجٹ پیش کرے گی، امسال پاکستان تحریک انصاف دی حکومت اپنا دوجا بجٹ پیش کررہی اے بجٹ کویں دا ہووے گا؟ ایس حوالے نال شہری حلقیاں وچ لُکویاں گلاں جاری نیں۔ کرونا وایرس،بے روزگاری تے مہنگائی وچ وادھے دے حوالے نال پریشان حال لوکائی پاکستان تحریک انصاف دی حکومت توں بہت ساریاں امیداں لائے ہوئے اے۔ معاشرے دا ہر طبقا موجودا صورتحال وچ مشکلاں توں دوچار اے۔ عمران خان نے انتخابات توں پہلے الیکشن مہم وچ لوکائی نال بڑے وعدے کیتے سن جو حالے تیکر پورے تے نہیں ہوئے پر لوکائی ہن وی اوہناں ول تک رہے نیں۔ ہر حکومت بجٹ پیش کرکے اوہنوں بہترین بجٹ دا ناں دیندی اے پر عام بندا، دیہاڑی دار مزدور توں لے کے سرکاری ملازم تیکر سبھ مایوسی دا شکار نظر آوندے نیں۔ ملک وچ ایس ویلے سارے حکومتی اقدامات دے باوجود کرونا دا جن بوتل وچ بند ہون دا ناں نہیں لے رہیا۔ ملک وچ کرونا دے کیسز وچ وادھے پاروں پریشان نیں۔ ایس صورتحال وچ مہنگائی وی ودھدی جارہی اے۔ ہر پاسے لفظ مہنگائی نے ہاہاکار مچائی ہوئی اے۔ ایس گل نوں کجھ نہیں سمجھیا جاندا کہ حکومت کس دی اے سگوں ایہ گل اہم سمجھی جاندی اے کہ کس دور حکومت وچ مزدور نوں دو ویلے دی روٹی تے سر لکان لئی کوٹھا میسر اے۔ ایس ویلے لوک محنت مزدوری کرکے جو کما رہے نیں اوہدے وچ اوہناں دا گزارا مشکل نال ای ہوندا اے ملک وچ پچھلے کجھ سال توں عام بندے لئی آمدنی دے وسیلے تے ودھ نہیں رہے اُلٹا مہنگائی تے بے روزگاری وچ ہر لنگھدے دن دے نال وادھا ہورہیا اے کوئی یوٹیلٹی بلز ادا نہیں کرپارہیا تے کسے کول مالک مکان نوں کرایا دین دی گنجایش نہیں، کوئی علاج معالجے توں محروم اے تے کوئی بچیاں دی فیس ادا نہ کرپان پاروں پریشان اے۔ حکومتاں آوندیاں نیں تے اپنا عرصا اقتدار پورا کردیاں نیں تے فیر کسے ہور دی واری آجاندی اے پر غریب بندے دے حالات نہیں بدلدے۔ غریب بندے دی حالت اُنج دی اُنج اے۔ پاکستان جدوں وجود وچ آیا تے اوہنوں طرح طرح دے مسائل دا ساہمنا کرنا پیاتے ایہ سلسلا حالے تیکر جاری اے۔ اج دے دور وچ وی اسیں اوسے دور توں دوچار آں وزیراعظم عمران خان آئے دن اپنی تقریر وچ ریاست مدینہ دا ذکر کردے نیں۔ اوہ ملک وچ ریاست مدینہ دا نظام رایج کرن دے خاہش مند نیں۔ رب کرے اوہناں دا خاب پورا ہووے۔ پر عمران خان صاحب اوہ مدینے دی ای ریاست سی جہدے وچ ابو بکرصدیقؓ نے جدوں اقتدار سنبھالیا تے اوہناں آکھیا سی کہ پتا کرو کہ اک مزدور دی روز دی اجرت توں اوہدے گھر دا بہتر گزارا ہورہیااے تے مینوں منظور اے نہیں تے پہلے مزدور دی اجرت نوں ودھاو۔خان صاحب بدقسمتی کہ پاکستان وچ امیرامیر تر تے غریب غریب تر ہوندا جارہیا اے ہن جد کہ سپریم کورٹ آف پاکستان نے وی آکھیا کہ پاکستان دے سارے اداریاں دیاں تنخاواں نوں یکساں کیتاجاوے تے فیر بہت چنگا موقع اے کہ اک حکم راہیں تسیں ایس ملک دے سارے ملازماں دیاں تنخاہواں نوں یکساں کرن دااعلان کر و انج ملک دے کروڑاں مزدور وی دعا کرن گے تے ایس ملک وچ اک انقلاب دی صورت پیدا ہوجاوے گی۔ میں تہاڈی توجا اک انتہائی اہم مسئلے ول کرانا چاہندا ہاں۔ اکتوبر 2005 وچ اوس ویلے دے وزیراعظم نے ریلوے مزدوراں دیاں گھر والیاں لئی پی ایم پیکج دااعلان کیتا سی پر بعد وچ ایس کم لئی وادھو فنڈز مہیا نہیں کیتے گئے انج ویلا لنگھدا گیا تے 9 فروری 2015 نوں اوس ویلے دے وزیراعظم نے ایس پالیسی اتے نظر ثانی کردے ہوئے ملازمت دوران مرن والے ریلوے ملازماں دے بچیاں دے ویاہ، تعلیم، ہاوس رینٹ تے بیوا نوں پلاٹ لئی سکیل دے حساب نال واجبات دین دا اعلان کیتا پر فیر متعلقا اداریاں نوں وادھو بجٹ تیکر نہ دتاگیا تے انج مزدوراں دیاں بیوا تے یتیم بچیاں دی بے بسی دا مذاق اُڈایا جاندارہیا۔محکما ریلوے راہیں ملک تے قوم دی خدمت کردے ہوئے کنے ای ریلوے ملازم ملازمت دوران مر گئے اوہناں دیاں گھر والیاں نوں حکومت ولوں اعلان کیتے گئے واجبات دے حصول لئی سالا سال دھکے کھان اتے مجبور نیں پر اوہناں دی کسے وی تھاں گل نہیں سُنی جارہی۔ انج دے بہت سارے یتیم بچے تے ریلوے دفتراں دیاں راہداریاں وچ چکر لاندے عام ویکھے جاسکدے نیں جہناں دے پیو ڈیوٹی دوران مر گئے محکمے نے اوہناں نوں ملازمت تے دے دتی پر بدقسمتی نال پی ایم پیکج تحت ایہدے اتے عمل درآمد نہیں کیتا گیا۔ حقیقت ایہ اے کہ پی ایم پیکج تحت پاکستان ریلوے ملازمت دوران مر جان والے ملازماں دیاں بیوا تے یتیم بچیاں دا کئی ارب دا مقروض اے۔وزیراعظم عمران خان توں التجا اے کہ ایس مسئلے اتے فوری توجا دتی جاوے۔ ریلوے تے حالات دے ستائے ایہناں مجبوراں اتے شفقت دا ہتھ رکھدے ہوئے اوہناں نوں اوہناں دے واجبات دی فوری ادائیگی کیتی جاوے۔ ریلوے وچ کنٹریکٹ، ٹی ایل اے تے پی ایم پیکج اتے کم کرن والے یتیم بچیاں نوں مستقل کیتاجاوے۔ حالیا بجٹ دے حوالے توں وی محنت کشاں دی وزیراعظم عمران خان توں استدعا اے کہ حکومت اوہناں دے معاشی استحصال، مہنگائی، بے روزگاری، نجکاری تے کنٹریکٹ سسٹم دے خاتمے راہیں اوہناں نے معاشی تحفظ دتے۔ پچھلے ایڈہاک الاونسز نوں بنیادی تنخا وچ ضم کیتاجاوے۔ بجٹ، تنخاواں تے پنشن وچ 50 فیصد وادھا کیتا جاوے۔ ریٹائرڈ ملازماں دی گریجوٹی، پنشن تے بیوا دے واجبات ادا کیتے جان، ریلوے ملازماں دی پنشن دی ادائیگی وفاقی حکومت اپنے ذمے لوے، سکیل 01 توں 16 دے ملازماں نوں اک وادھو سکیل دتاجاوے۔ ریلوے دے سارے ٹیکنیکل ملازماں نوں ٹیکنیکل الاونس دتاجاوے۔ فیڈرل گورنمنٹ تے صوبائی گورنمنٹ دی ہاوسنگ سکیماں وچ ریلوے ملازماں نوں شامل کیتاجاوے۔ ایہ ایہو جہے مطالبات نیں جہدے اُتے حکومت نوں توجا دین دی لوڑ اے ملک وچ ہر لنگھدے دن دے نال مہنگائی وچ تے وادھا ہوای رہیا اے پر تنخاواں وچ تے وادھا نہیں ہوندا۔ جے کدے ہوندا وی اے تے اوہ وی اونٹھ دے مونہ وچ زیرے برابر ہوندااے۔ جہدے توں عام بندے دیاں معاشی مشکلاں وچ کمی آون دے بجائے وادھا ہوندا اے قومی روزنامیاں دے صفحے آئے روز کسے نہ کسے محنت کش دی بھکھ، فاقیاں تے بے روزگاری دے ہتھوں تنگ آکے خد کشی دیاں خبراں مزین وکھالی دیندے نیں۔ ماضی دیاں حکومتاں دا سب توں وڈا المیا ایہو سی کہ اوہ اپنے اعلان کردا عوامی فلاح دے احکامات اتے عمل درآمدنہ کرا سکیاں۔ امید اے کہ وزیراعظم عمران خان غریب تے یتیم لوکائی دیاں دعاواں ضرور لین گے۔ اوہ اوہناں دے واجبات دی ادائیگی نوں یقینی بنان گے۔ بجٹ دی آمد آمد اے رب نہ کرے کہ ایس واری وی الفاظ دا گورکھ دھندا ہووے کیوں جے پچھلے سال دے بجٹ نوں مایوس کن سی کیوں کہ حکومتی حلقے تنخاواں وچ وادھے دیاں تسلیاں تے دے رہے نیں پر ملک دے موجود حالات تے ملک دی ڈگدی معیشت نوں ویکھدے ہوئے کجھ وی نہیں آکھیا جاسکدا۔ خدا نہ کرے کہ ایس واری وی ملازماں نوں رسوائی ہووے۔ ٹیکسٹاں تے مہنگائی نے ملازماں نوں لیموں وانگ نچوڑ کے رکھ دتا اے۔ ممبران اسمبلی دیاں تنخاواں وچ 100 فیصد وادھا ہوچکا اے انج لگدا اے کہ ایس ملک دی اشرافیا بہت غریب اے ملک وچ ہر پاسے لاقانونیت اے ماضی وچ لوکائی دا مسئلا روٹی، کپڑا تے مکان سی تے اج وی روٹی، روزی، مکان تے سیکیورٹی دا مسئلا لاحق اے۔ اسیں ایٹمی ملک تے ہے واں پر حیرت والی گل اے کہ بجلی تے پانی ساڈے کول نہیں۔ ایہ وی حیرت والی گل اے کہ دنیا بھر وچ لوک ڈیم بنان دا مطالبا کردے نیں پر پاکستان دے سیاستدان ڈیم نہ بنان دا مطالبا کردے نیں کیوں جے آپ تے اوہ کرسٹل نما محلات وچ رہندے نیں پر غریب دی جھگی وچ انرجی سیور وی اوہناں نوں پسند نہیں۔ اسیں وزیراعظم عمران خان توں مطالبا کرنے ہاں کہ بجٹ دے موقع اتے مزدور درست بجٹ پیش کرن تے ریلوے سنے سارے قومی اداریاں دی نجکاری نہ کرن دا اعلان کرن۔ ریولے دی بحالی ملک بھر دے سارے قومی اداریاں تے حکومت لئی فِکر دا لمحا اے۔