وزارت صحت عدالت تے عام لوکائی دے نال کھیڈ بند کرے:چیف جسٹس اسلام آباد ہائیکورٹ۔۔۔٭رویل نیوز٭

اسلام آباد (نمایندا رویل) چیف جسٹس اسلام آباد ہائیکورٹ جسٹس اطہر من اللہ نے کہیا اے کہ وزارت صحت‘ عدالت تے عام لوکائی دے نال کھیڈ رہی اے۔ جمعرات نُوں اسلام آباد ہائیکورٹ وچ کرونا وایرس دے کارن ڈاکٹر ز دے زیر التوا کیسز بارے آرڈر جاری نہ کرن بارے کیس دی سنوائی ہوئی۔ وکیل درخاست گزار نے کہیا کہ وزارت صحت وچ سیکشن افسر سبھ توں اُتے اے‘ اوہی سارے معاملات چلاندا اے۔ چیف جسٹس اسلام آباد ہائیکورٹ جسٹس اطہر من اللہ نے آرڈر جاری نہ کرن اُتے وزارت صحت اُتے برہمی دا اظہار کردیاں ہویاں سیکرٹری صحت نُوں 12 جون نُوں عدالت وچ پیش ہون دا حکم دِتا۔ چیف جسٹس اطہر من اللہ نے ریمارکس دِتے کہ ایس ویلے ڈاکٹرز نے اپنیاں زندگیاں داء اُتے لائیاں ہوئیاں نیں‘ تُسیں کرونا دی صورتحال وچ ڈاکٹراں نُوں کیوں ڈسٹرب کر رہے او۔ اوہناں نے کہیا کہ وزارت صحت عدالت تے عام لوکائی دے نال کھیڈ کھیڈ رہی اے‘ کرونا وایرس دی صورتحال تے غیر معمولی حالات وچ وی وزارت صحت دا رویا غیر سنجیدا اے۔ چیف جسٹس اسلام آباد ہائیکورٹ نے ریمارکس دِتے کہ ڈاکٹرز کرونا نال لڑن والے فرنٹ لائن سپاہی نیں‘ ساری دنیا اپنے ڈاکٹراں نُوں سلیوٹ کر رہی اے‘ ایتھے وزارت صحت ڈاکٹراں نُوں عدالتاں دے چکر لان اُتے مجبور کر رہی اے۔ نمایندا پمز ہسپتال نے کہیا کہ مینوں وی کجھ کہن دا موقع دِتا جاوے جہدے اُتے اطہر من اللہ نے کہیا کہ ایہ تہاڈا نہیں‘ وزارت صحت دا قصور اے۔ چیف جسٹس نے کہیا کہ عدالت نے ڈاکٹراں دے کیسز وچ فیصلا دین توں گریز کیتا تاں جے اوہ ڈسٹرب نہ ہون۔