kraamaat@gmail.com
+ +92 333-430-6384


کرونا روگیاں تے موتاں وچ تیزی نال وادھا ، چین توں دو کروڑ ماسک منگوان دے معاملے وچ ڈاکٹر ظفر مرزا بے قصور ۔۔۔٭رویل نیوز٭


نمائندا رویل June 15, 2020


لاہور (نیوز ڈیسک) کرونا وایرس نال ہور 81 بندے مَوت دی وادی وچ چلے گئے‘ ہلاکتاں دی مجموعی گنتی 2 ہزار 632 تک پہنچ گئی‘ ہُن تک روگ نال متاثرا 51735 روگی صحتیاب ہو کے گھراں نُوں پرت چکے نیں۔ نیشنل کمانڈ اینڈ اپریشن سینٹر دے مطابق ملک وچ کرونا دے کیسز وچ تیزی نال وادھا ہو رہیا اے‘ 24 گھنٹیاں وچ ریکارڈ 6825 نویں کیسز رپورٹ ہوئے جہدے بعد روگیاں دی مجموعی گنتی 1 لکھ 39 ہزار 230 ہو گئی۔ پنجاب وچ 52691‘ سندھ وچ 51518‘ خیبر پختونخوا وچ 17450 تے بلوچستان چ 8028 روگی علاج ہیٹھ نیں۔ کرونا کیسز دی ودھدی گنتی کارن وزیراعظم عمران خان نے کہیا اے کہ رضا کاراں راہیں ایس او پیز اُتے عمل کراواں گے‘ ایس او پیز اُتے انتظامیا‘ ٹائیگر فورس عملدرآمد کروائے گی‘ ہُن سانوں اسیں سختی کرنی اے‘ کرونا وایرس دا کھلار روکنا اے‘ جے کنسٹرکشن سائٹ اُتے لوک احتیاط نہیں کرن گے تے بند ہو جاوے گی۔ایس توں وکھ فیڈرل انوسٹی گیشن ایجنسی (ایف آئی اے) نے چین توں 2 کروڑ ماسک برآمد کرن دے معاملے اُتے معاون خصوصی ڈاکٹر ظفر مرزا نُوں بے قصور مِتھ دِتا اے‘ ایس سلسلے وچ ینگ فارما سسٹ ایسوسی ایشن ثبوت پیش نہیں کر سکی۔ انکوایری کمیٹی نے تحقیقات روکن دی استدعا وی کر دِتی۔ ایف آئی اے نے پاکستان ینگ فارما ایسوسی ایشن ولوں 25 فروری نُوں گھلی گئی درخاست اُتے مکمل پُن چھان دے بعد اپنی رپورٹ وچ کہیا اے کہ معاون خصوصی ظفر مرزا دا ماسک برآمد کرن لئی پرمت دے اجرا نال تعلق ثابت نہیں ہویا‘ درخاست گزار اپنے الزام بارے کوئی شواہد پیش نہیں کر سکیا۔ ایف آئی اے دا کہنا سی کہ ڈریپ نے 30 جنوری نُوں حفاظتی شیواں دی برآمد اُتے پابندی لائی سی۔ ڈریپ نے ماسک برآمد کرن لئی چینی کمپنیاں نُوں پرمٹ جاری کیتے تے ماسک برآمد کرن دی اجازت قاعدیاں ضابطیاں دے تحت دِتی۔