دو غزلاں

غزلاں /سلیم نجمی

ڈگا ٹھٹھا بھاویں کدھروں بھورا پیار جے لبھے

چھج پتاسے ونڈا مینوں میرا یار جے لبھے

روندی اکھ دے اتھرو سکن مکھ تے ہاسے آون

دکھ ونڈاون والا کوئ نہ کوئی غمخار جے لبھے

ہاسے خشیاں پیار محبتاں جتھے لبھدے ہوون

جندڑی ویچ خریداں انج دا کوئی بزار جے لبھے

جس نال وی جینا مرنا دُکھ سُکھ سانجھا ہووے

دل میں اوہدی جھولی پاواں اوہ دلدار جے لبھے

نہر کنارے بہ کےمیں تے دلبر گلاں کرئیے

سانوں وی کوئی نجمی ہفتا تے اتوار جے لبھے

٭٭٭٭٭

غزل

ہر اِک مُکھ تے نظر ٹکائی پِھرنے آں

جگ دی بھیڑ چ یار کھڑائی پھرنے آں

دائیاں ورگی اکھ اے چندرے لوکاں دی

ہاسے پِچھے غم لکائی پھرنے آں

پیار پچاون دے لئی یار فقیراں دا

لوکاں ساہویں بھیس وٹائی پھرنے آں

لنگھ گیا اے ویلا رانجھے ہیراں دا

ایویں اپنے کن پڑوائی پھرنے آں

پاگل آں ناں تاں تے گھر دے بوہیاں توں

اُچیاں نال یارانے لائی پھرنے آں

ہوندا کُجھ نہیں ساتھوں اَیویں ای

ککڑاں وانگوں کھیہ اُڈائی پھرنےآں

پلے نہیں اے دھیلا فِر وی نجمی جی

لٹھے پاکے ٹور بنائی پھرنےآں

٭٭٭٭٭