یارہویں جماعت واسطے سوال جواب ۔سبق "اَن ڈِٹھے روگ"/ناصر بلوچ

اَن ڈِٹھے روگ/ڈاکٹر ناصر بلوچ

1۔سبق ”ان ڈِٹھے روگ“ کس دی لکھت اے؟

ج۔ایہ کہانی ڈاکٹر ناصر بلوچ ہوراں نے لکھی اے۔

2۔ڈاکٹر ناصر بلوچ دیاں کتاباں دے ناں لکھو؟

ج۔سِیتیاں اکھاں والے۔جھوٹھا سچا کوئی نہ۔پتناں تے سدّ

3۔ڈاکٹر ناصر بلوچ دا تعارف کرواؤ؟

ج۔ آپ دا اصل ناں ناصر عباس بلوچ اے پر اَدبی دُنیا وچ ڈاکٹر ناصر بلوچ دے ناں نال مشہور نیں۔آپ موضع تیتری تحصیل نور پور ضلع خوشاب وچ پیدا ہوئے۔

4۔رحما کِتھوں دا رہن والا سی؟

ج۔رحما پِنڈ کسّووال دا رہن والا سی جو دولت کماون شہر ٹُر جاندا اے۔

5۔رحمے دے خاندان بارے تُسیں کیہ جاندے او؟

ج۔رحمے دی بیوی دا ناں بختاں سی۔رحمے دے دو پُتر بالا تے شاہو سن تے دو دھیاں وی سی جہدے وچوں اِک دِھی پینو دا ذکر ایس کہانی وچ ملدا اے۔

6۔رحمے دے دوست اوس نوں کیہ مشورہ دیندے رہندے سن؟

ج۔رحمے دے دوست خوشیا تے سردار محمد اوس نوں شہر جا کے دولت کماون دا مشورہ دیندے رہندے سن۔

7۔بالا تے شاہو کتھے نوکری کردے سن؟

ج۔بالا تے شاہو لُوماں تے کم کردے سن۔

8۔بختاں نوں کیہ فکر سی؟

ج۔بختاں نوں اپنے گھر دے ہر فرد دی فکر سی اوہ جدوں شہر وچ آ کے سبھ دے رنگ پِیلے پیندی ویکھدی اے تاں فکر کرن لگدی اے۔

9۔بختاں نوں کیوں پِنڈ چیتے آندا اے؟

ج۔بختاں نوں ایس لئی پِنڈ چیتے آندا اے کہ اوتھے کھُلی ہوا تے روشنی سی تے سارے رشتے دار اں وچ پیار دا جذبہ نظر آندا سی تے ہر کوئی دُکھ سُکھ ونڈدا رہندا سی۔

10۔رحمے نوں تاپ چڑھیاں کِنے دِن ہو چُکے سن؟

ج۔22 دِن

11۔ رحمے نوں کہڑی بیماری سی؟ ج۔ رحمے نوں ہڈیاں دا کینسر سی تے ایہ بیماری اخیرلی منزل تے سی۔

12۔ڈاکٹر دے اسسٹنٹ دا کیہ ناں سی؟

ج۔بشیر

13۔ماحول دی آلودگی نال کہڑیاں بیماریاں پھیلدیاں نیں؟

ج۔کینسر،ہیپا ٹائٹس،پھیپھڑیاں تے گُردیاں دی خرابی،چڑ چڑاپن تے ہور کئی نفسیاتی روگ ماحول دی آلودگی دا کارن نیں۔

14۔ڈاکٹر باری کول آن کیوں کھلوتا؟

ج۔ رحمے دی گھر والی بختاں نوں جائے نماز تے بیٹھیاں دُعا منگدیاں ویکھ کے ڈاکٹر نوں اپنی ماں دی یاد آ گئی تے اوہ ایسے ای یاد وچ گواچیا باری کول آن کھلوتا تے شہر وچ ودھدے ہوئے انھیرے نوں ویکھن لگا۔

15۔بالے دی کہڑی واج ڈاکٹر دے کنیں (کناں وچ) پے رہی سی؟

ج۔بالے نے جدوں پریشان جہیا ہو کے آکھیا سی”ڈاکٹر جی پردیس وچ ر ب تے تہاڈے توں وکھ ساڈی بانہ پھڑن والا کوئی نہیں جے،ساڈے ابّے دا دھیان رکھنا“ ایہ واج ڈاکٹر دے کناں وچ پے رہی سی۔

16۔ماحول دی آلودگی دے کیہ کارن نیں؟

ج۔شہر دیاں سنگھنیاں آبادیاں،پٹرول تے ڈیزل دا دُھواں،رنگ روغن دے کارخانے،فیکٹریان وچ زہریلے کیمیکل دی ورتوں وغیرہ ایہ سبھ ماحول آلودہ کر رہیاں نیں۔

17۔ سبق ”اَن ڈِٹھے روگ“ کس بارے اے؟

ج۔ایہ سبق فضائی آلودگی بارے دھاتاں دے نال جویں بیماریاں ودھ رہیاں نیں تے آلودگی وی ایس نوں وی موضوع بنایا گیا اے۔

18۔رحمے نوں ہڈیاں دا کینسر کویں ہویا؟

ج۔رحما جس فیکٹری وچ کم کردا سی اوتھے زہریلی گیساں تے انسانی صحت واسطے خطرناک دھاتاں ورتیاں جاندیا ں سن،ایہناں دے وچ کم کردیاں اوس نوں ہڈیاں دا کینسر ہو گیا۔

19۔ڈاکٹر نے رحمے نوں پِنڈاں تے شہراں دی زندگی بارے کیہ آکھیا؟ ج۔ ڈاکٹر ہوراں نے آکھیا کہ پِنڈاں وچ خوراک بے شک بُہتی چنگی نہ لبھے لیکن تازہ ہوا،پانی تے روشنی خالص لبھ جاندے نیں جد کہ شہراں وچ ایہ کدھرے وی نہیں لبھدا سگوں ہر پاسے ماحول آلودہ اے۔

20۔ سبق ”ان ڈِٹھے روگ“ کس روگ دی نشاندہی کردا اے؟

ج۔ایہ سبق ماحول دی آلودگی تے اوہدے نال ہوون والیاں بیماریاں دی نشاندہی کردا اے۔

٭٭٭٭٭