گُنگے نہیں ساں

ارشاد سندھو

اینے وی تے اَنھے نہیں ساں

جہڑے سانوں سَپ نہ نظریں آئے

جہناں ساڈی جُوہ وچ آ کے

ساڈی سانجھ نوں ڈنگیا

کہڑے کہڑے رنگ وچ ساڈے

تن من وِسّاں گھُلیاں

اینے وی تے بھولے نہیں ساں

جہڑے اوس وگج نوں وی نہ سمجھے

جہدے ہتھوں اِک اِک کر کے

سُفنے ڈِگ پئے ساڈے

کہڑے کہڑے شور تے کلّر

ساڈے مڈھ نوں کھادا

اینے وی تے گُنگے نہیں ساں

جہڑے اپنے حق چ وی نہ بولے

جہڑی گلوں ویلے سانوں

چُپ دے سبق پڑھائے

کہڑی کہڑی رُت دے جندرے

ساڈی جِبھ نوں وجے

٭٭٭٭٭