kraamaat@gmail.com
+ +92 333-430-6384


غزل/ارشاد سندھو


ارشاد سندھو December 11, 2019


ہاسا وی اِظہار جہیا ای ہوندا اے

اِک قِسم دا پیار جہیا ای ہوندا اے

سجن خالی کولوں ای لنگھ جاون تے

اوہ وی دِن تہوار جہیا ای ہوندا اے

چنا،چن نوں خورے کیہ چا کیتا ای

جد ویکھاں بیمار جہیا ای ہوندا اے

ماڑے تے مزدور دے ای کیوں چاواں دا

گلما تارو تار جہیا ای ہوندا اے

بعضے ویلے تکنا وی کجھ لوکاں دا

دِل دے لئی تلوار جہیا ای ہوندا اے

ہور تے کُجھ نہیں عشق چ زندگی ساری دا

اَیویں بس بُخار جہیا ای ہوندا اے

سندھو ؔ جیکر بندا گل نوں سمجھے تے

وعدا وی اِک بھار جہیا ای ہوندا اے