پاکستان وچ دوائیاں بنان والیاں دا بہت وڈا مافیا اے،  حکومت کوئی کم نہیں کر رہی:چیف جسٹس پاکستان گلزار احمد……٭رویل نیوز٭

اسلام آباد (نمایندا رویل) چیف جسٹس پاکستان گلزار احمد نے ریمارکس دِتے کہ حکومت آپ کجھ کردی نہیں فیصلے ساڈے گلے پا دیندی اے۔ سپریم کورٹ وچ نجی دوائیاں بنان والی کمپنی ولوں قیمتاں وچ وادھے بارے کیس دی سنوائی ہوئی۔ چیف جسٹس نے ریمارکس دِتے کہ پاکستان وچ دوائیاں بنان والیاں دا بہت وڈا مافیا اے‘ کہ وفاقی کابینا نے دوائیاں دیاں قیمتاں بارے کوئی فیصلا کیتا؟۔ ایڈیشنل اٹارنی جنرل نے جواب دِتا کہ معاملا کابینا نہیں سگوں ٹاسک فورس نُوں گھلیا گیا سی۔ جسٹس اعجاز الاحسن نے کہیا کہ لگدا اے ٹاسک فورس فیصلا کرن دی بجائے معاملے اُتے بَہ ای گئی اے۔ چیف جسٹس نے کہیا کہ ڈرگ ریگولیٹری اتھارٹی آکر کیہ کر رہی اے‘ حکومت نُوں پتا ای نہیں کہ کرنا کیہ اے‘ اوہ صرف کاغذی کارروائی کردی اے‘ فیصلا کرن دی ہمت نہیں‘ حکومت آپ کجھ کردی نہیں فیصلے کرن لئی معاملا ساڈے گلے پا دِتا جاندا اے‘ دوائیاں بنان والیاں کمپنیاں ہون یاں خریدار سارے ای غیر یقینی صورتحال وچ رہندے نیں‘ دوائیاں بنان والیاں کمپنیاں خام مال خریداری دے ناں اُتے سارا منافع باہر گھل دیندیاں نیں۔ چیف جسٹس نے کہیا کہ افسوس ہوندا اے کہ حکومت کوئی کم نہیں کر رہی‘ ڈریپ کہندی اے مُٹھی گرم کرو تے سارا کم ہو جاوے گا‘ حکومت آپ فیصلا کردی نہیں بس ہائیکورٹ دے فیصلے چیلنج کردی اے۔ ایڈیشنل اٹارنی جنرل نے دَسیا کہ نجی کمپنی نے باسکو پان نامی دوائی مارکیٹ توں غایب کر رکھی اے‘ دوائی دی قیمت پوری نہ ملے تے مارکیٹ توں غایب کر دِتی جاندی اے‘ نجی کمپنی نے 8 دوائیاں دی قیمت ودھائی‘ ڈریپ نے ایکشن لیا تے سندھ ہائیکورٹ نے حکم امنتاع دے رکھیا اے۔ جسٹس اعجا ز الاحسن نے کہیا کہ ڈریپ ویلے سر فیصلا نہ کرے تے متھی مدت دے بعد اپنے آپ قیمت ودھ جاندی اے۔ نجی کمپنی دے وکیل دوجی عدالت وچ مصروف ہون کارن پیش نہ ہوئے جہدے اُتے سپریم کورٹ نے کیس دی سنوائی پیر تک ملتوی کر دِتی۔