kraamaat@gmail.com
+ +92 333-430-6384


کرونا متاثرین دی ودھدی گنتی ساڈیاں انفرادی، اجتماعی، سرکاری تے عوامی کوتاہیاں دا نتیجا


شیخ محمد انور June 27, 2020


کرونا متاثرین دی ودھدی گنتی ساڈیاں انفرادی، اجتماعی، سرکاری تے عوامی کوتاہیاں دا نتیجا

شیخ محمد انور

وزیراعظم اسلامی جموریا پاکستان دے مشیر برائے صحت ڈاکٹر ظفر مرزا نے پچھلے دناں اسلام آباد وچ میڈیا نوں بریفنگ دیندے ہوئے اک واری فیر ایس او پیز اتے عمل درآمد لئی لوکاں اتے زور دتا اے۔ کرونا دی وبا ہر لنگھدے دن نال پاکستان وچ ناصرف تیزی نال کھلر رہی اے سگوں لکھاں لوک ایہدے توں متاثر ہوئے نیں تے ہزاراں چلانا کرچکے۔ سادے ملک وچ کرونا وچ کھلار دیاں مختلف وجوہاتاں نیں۔ پہلی وجھا ایہ کہ چین وچ شہر ووہان توں جدوں کرونا دے مختلف ملکاں وچ کھلار تے اوہدے وچ ویکھدے ویکھدے لکھاں لوکاں نوں متاثر کیتاتے ہزاراں لوک ایہدے وچ مبتلا ہو کے جان توں گئے۔ جدوں دنیا ایس عالمگیر وبا نوں سنجیدگی نال لے رہی سی اوس ویلے اسیں اوہدے اتے توجا نہں دتی۔ پی ٹی آئی دی حکومت نے اپنے سیاسی بکھیڑیاں وچ ایس قدر الجھاو دا شکار سی کہ اوہنوں فرصت نہ ملی تے کرونا وچ ہولی ہولی اپنے پنجے گاڑنا شروع ہو گیا۔ دوجے پاسے ایہ جدوں ساڈے ملک وچ لوک باہروں آرہے سن اوس ویلے اسیں غفلت دا مظاہرا کیتا تے لوک آوندے رہے تے اپنی مرضی نال پورے ملک وچ کھلردے رہے۔ جدوں ملک وچ کرونا متاثراں دے صرف کجھ سینکڑے کیس سن تے انسانی ہلاکتاں دی گنتی بہت گھٹ سی اوس ویلے حکومت نے مارچ دے اخیر وچ ملک بھر وچ لاک ڈاون کردتا۔ پر حکومت ایس لاک ڈاون اتے کسے وی سنجیدگی نال عمل درآمد نہ کرا سکی تے مئی وچ لاک ڈاون وچ نرمی پاروں جو صورتحال پیدا ہوئی اوہ سب دے ساہمنے اے۔ یعنی جے انج آکھیا جاوے تے زیادا بہتر ہووے گا کہ جدوں ملک وچ کرونا دے کجھ سو کیس سن اوس ویلے ساڈی لوکائی نے ماسک پائے پر ہن جدوں پاکستان کرونا متاثرا 215 ملکاں دی فہرست وچ 13ویں نمبر اتے اے تے ملک وچ روز 5 ہزار تیکر کرونا دے نویں کیس رپور ٹ ہورہے نیں تے موتاں وچ وی خطرناک حد تیکر وادھا ہوچکا اے تے اسیں لاک ڈاون ختم کردتا اے۔ ساڈے لوکائی نے وی بے احتیاطی دا مظاہرا شروع کررکھیا اے۔ ہن نتیجا وی ساڈے ساہمنے اے۔ ایہدے وچ کوئی شک نہیں کہ ایس معاملے وچ حکومت تے لوکائی دوویں ای قصور وار نیں۔حکومت دا قصور ایہ کہ اوہنوں اپریل تے مئی دے مہینیاں وچ ای لوکائی نوں بھرپور اگاہی فراہم کر دینی چاہیدی سی پر بدقسمتی نال انج نہ ہوسکیا۔ خورے اویس ویلے حکومت آپ بے چینی دا شکار سی کہ کیہ کیتا جاوے۔ جے لوکائی دی گل کیتی جاوے تے جدوں ملک وچ کرونا کھلرنا شروع ہویا یعنی مارچ دے اخیر وچ جدوں کرونا وبا دنیا دے ہور ملکاں وانگ پاکستان وچ وی اپڑ چکی سی تے اوس ویلے توں لے کے ہن تیکر صحیح معنیاں وچ نہ احتیاطی تدبیراں اتے عمل کیتا جاسکیا اے تے نا ای ایس او پیز نوں کسے صورت مدنظر رکھیا جارہیا اے، کرونا دے حوالے نال ہر لنگھدے دن صورتحال گھمبیر ہوندی جارہی اے۔ تسیں بازاراں وچ رش ویکھیو، عوامی مقاماں اتے تے پبلک ٹرانسپورٹ ویکھ لوو ہر تھاں بے احتیاطی نمایاں وکھالی

دیندی اے۔ کوئی نہر وچ نہا رہیا اے کوئی گلی وچ کرکٹ کھیڈن وچ مصروف اے تے کوئی بغیر وجھا گھروں باہر اوارا گردی کررہیا اے۔ ساڈے ملک وچ اک پاسے ہسپتالاں وچ کرونا دے روگیاں پاروں تھاں گھٹ پے گئی اے تے دوجے پاسے ساڈی لوکائی دا ایہ رویا لمحا فکریا اے۔

تاریخ گواہ اے کہ دنیا دے جن ملکاں دے لوکاں اپنی حکومت دی گل منی، ایس او پیز اتے من و عن عمل کیتا، اوہ لوک ایس وایرس توں جان چھڈان وچ کامیاب رہے تے جن ملکاں غلطیاں کیتیاں اوہ ناصرف کرونا وچ وادھا کر سکے سگوں انسانی ہلاکتاں وچ وی وادھا ہویا۔ افسوس دی گل اے کہ جس تیزی نال پاکستان وچ کرونا ساہمنے آرہیا اے ایس لحاظ نال پاکستان دنیا دے 3 ملکاں دی فہرست وچ شامل ہو چکا اے۔ ساڈے لوک ہن وی جے طریقا کار نہ بدلن گے تے اوہ دن دور نہیں جدوں اسیں ترکی تے جرمنی نوں وی پچھے چھڈاں گے۔ ملک وچ لاک ڈاون ناگزیر سی یاں اوہدی لوڑ نہیں سی۔ ہن ایس بحث توں نکل آونا چاہیدا اے کیوں کہ نہ صرف صحیح معنیاں وچ لاک ڈاون کرسکے تے نہ لاک ڈاون دے دوران ایس او پیز اتے عملدرآمد کرا سکے۔ ہن تے اگے دی سوچن دی لوڑ اے کہ آون والے ویلے وچ کیہ اقدامات کرنے نیں۔ کرونا وبا توں کویں ملک تے قوم دی جان چھڈانی اے۔ حقیقت ایہ اے کہ لاک ڈاون ختم کر کے نہ معیشت بچا سکے تے نہ ای لوکائی کرونا توں بچ سکے۔ وزیراعظم ایس ویلے کئی محاذاں اتے لڑ رہے نیں۔ اک پاسے اوہ اپوزیشن نال جنگ وجدل کررہے نیں تے دوجے پاسے کرونا نال جنگ

جاری اے۔ کرونا پاروں ملک وچ جو معاشی، بحران پیدا ہویا اوہ وی اک اہم مسئلا اے۔ کرونا نے اپنیاں ساریاں حشر سامانیاں نال بلاامتیاز ساری دنیا نوں اپنی لویٹ وچ لے رکھیا اے۔ ایس صورتحال وچ پاکستانی قوم دا رویا افسوسناک اے۔ پاکستان وچ کرونا خلاف جنگ وچ ڈاکٹرز، پیرامیڈیکل سٹاف، پولیس، ریلوے ملازم تے فوج جویں خدمتاں انجام دے رہے نیں اوہ تحسین جوگ نیں۔

حکومت نوں چاہیدا اے کہ اوہ پولیس، ٹریفک وارڈن، ریلوے ملازم، ڈاکٹرز تے پیرا میڈیکل سٹاف لئی خصوصی الاونش دا اہتمام کرے۔ جدوں توں کرونا نے پاکستان دا رُخ کیتا اے پولیس دے جوان، ڈاکٹرز، ریلوے ملازم تے پیرامیڈیکل سٹاف ہر اول دستے دے طورے تے اپنیاں خدمتاں انجام دے رہے نیں۔ کرونانال پاکستان وچ ہن تیکر کئی ڈاکٹرز تے پولیس ملازم جان دی بازی ہار چکے نیں ایہ ایہو جہے لوک نیں جہناں ایس مشکل ویلے وچ قوم دی خدمت لئی اپنی جان تیکر دی پرواہ نہ کیتی۔ پوری قوم نوں اپنے ایہناں جانثاراں اتے فخر اے۔ حکومت نوں چاہیدا اے کہ جو ملزم کرونا وبا دوران ڈیوٹی سرانجام دیندے چلانا کر گئے اوہناں لئی سپیشل پیکج دا اعلان کرے۔

٭٭٭٭٭