kraamaat@gmail.com
+ +92 333-430-6384


(پتنگے/سجاد حیدر(خلاصہ


خاص لیکھ June 29, 2020


سبق”پتنگے “یاں ”ریڈار کہانی“ دا خلاصہ اپنے لفظاں وچ لکھو۔ 10

جواب:

پتنگے(سجاد حیدر)

خلاصہ:

رحمت خاں جو ہیڈ کانسٹیبل اے اوہ اپنے انسپکٹر نوں گشت دے دوران بچیاں دے اغوا دے شک وچ پھڑے ملزم مجیداللہ بارے دسدا اے۔ مجید اللہ روز گول باغ وچ جا کے بالاں نوں غباریاں وچ ہوا بھر بھر کے مُفت ونڈدا اے پر اَج جدوں اوہ پرانی انارکلی دے محلے وچوں ناجی ناں دے اک بال نوں زبردستی گود وچ چُکنا چاہندا اے تاں مائی رَولا پا دیندی اے۔رحمت اوس نوں بالاں دے اغواء دے شُبھے وچ پھڑ لیاندا اے۔انسپکٹر جدوں پچھ گچھ شروع کردا اے تے پُلس دا روایتی انداز ویکھ کے مجید اللہ وی ایویں ای اونٹھ، گھوڑے تے لومڑی دی کہانی سنان بہ جاندا اے۔ جدوں مجید دی تلاشی لئی جاندی اے اوس کولوں کجھ کاغذات تے عام جہے سگرٹ نکلدے نیں۔ اوہ اپنے بارے دسدا اے کہ ا وہ اسکول ٹیچر اے تے اوہدی تعلیم بی۔ اے، بی ٹی اے۔ ایسے ویلے اظہر نامی رپورٹر اخبار واسطے خبر بناؤن لئی آجاندا اے۔ مجید اللہ دی منہ بولی ماں مائی کرماں والی وی انسپکٹر کول آ جاندی اے۔ اوہدا سگّا پُتر صفدر فوت ہو چُکیا اے۔پاکستان بنن توں مگروں اوہ ہجرت کر کے ایتھے آئی تاں بے سہارا سی جس نوں مجید اللہ نے اپنی ماں بنا لیا تے اوہدی خدمت کرن لگا۔ اوہ منتاں ترلے کردی اے کہ اوہدے بے قصور پتر نوں پُلس چھڈ دیوے۔ تھانیدار مجید اللہ دے ماضی تے حال بارے سوال کردا اے۔ مائی اوس نوں دسدی اے کہ اوہ اوہدا سگا پتر نہیں۔ سنتالی دی ونڈ دے دوران جدوں اوہ لُٹی پُٹی لاہور دے ٹیشن اتے بیٹھی ہوئی سی تاں اوہ اوس نوں اپنے گھر لے آیا تے مائی نوں اوہدے وچ اپنا سگا پتر صفدر دکھائی دیون لگ پیا۔مائی تھانیدار نوں دسن لگی کہ صفدر ست جماعتاں پڑھن مگروں بجاجی دی ہٹی تے نوکر ہویا تاں سکول جا ندی ثریا دے عشق وچ گرفتار ہو گیا۔ ثریا اوہنوں کسے بَلا وانگوں چِنبڑ گئی، اوہ اوہنوں دیکھنا ای اپنی حیاتی بنا بیٹھا۔ ماپیاں کڑی ویاہ کے جلندھر گھل دتی تے صفدر جویں جھَلا ہوگیا۔ فیر اِک دیہاڑے اوہ گھروں بن ٹھن کے نکلیا تے فیرکدے نہیں پرتیا۔ثریا دا ویاہ مجید نال ہویا سی تے جدوں تحریک پاکستان دے جلسیاں وچ شرکت کرن پاروں مجید نوں قید ہوئی تاں صفدر گھر دے باہر پہرے دار بن کے بیٹھ گیا۔مجید جلندھر تعلیم السلام ہائی سکول وچ پڑھاندا سی تے اوس دا پُتر نجیب اللہ عرفناجی سی۔ناجی صفدر نوں فقیر بابا آکھن لگا کیوں جے بُوہے دے باہرجھُگی پا بیٹھا گھر دی راکھی کر رہیا سی تے اوس ویلے ہر پاسے لُٹ مار تے قتل و غارت ہو رہی سی۔

ثریا دی ایہ ضد سی کہ جدوں تک اوس دا گھر والا نہیں آجاندا اوہ ایہ گھر چھڈ کے کدھرے وی نہیں جاوے گی۔پر ایس ونڈ دے فساداں وچ ثریا تے ناجی نوں شہید کر دِتا۔مائی کرماں والی کول صفدر دے وچھڑن دی خبر نہیں اے اوہ اج وی صفدر نوں اُڈیک رہی اے۔

ایس دوران مجید دے وکیل دوست سعید ہوریں وی آجاندے نیں۔ اوہ مجید اللہ دے بارے اخبار وچ خبر پڑھ کے اوہدی ضمانت کروان آئے نیں۔مجید نوں جدوں انسپکٹر ساہمنے لیا جا ندا اے تاں اوہ دسدا کہ اوہنوں اپنے پتر ناجی نال انتاں دا پیار سی۔ اوہ اکثر رات نوں کمپنی باغ جا کے بہ جاندا تے بالاں نوں غبارے پھوک پھوک کے دیندا۔ جس نال اوہدے دل نوں سکون آندا۔ گڈو نوں مائی کولوں کھوہن بارے اوسنے دسیا کہ گڈو اوہنوں سگواں ناجی لگدا سی۔ایس لئی وی اوہ مائی کولوں گڈو نوں منگ رہیا سی۔ گڈو نوں مائی نے نہ دتا تے مجید اوس نوں پھڑن لگا تاں مائی نے رولا پا دتا جس کرکے پُلس والے اوس نوں بردا فروش سمجھ کے پھڑ لیا۔ انسپکٹر نوں اوہدی گل وچ سچائی جاپی تے اوس نے تحریک دے وڈے کارکن نوں بے قصور جاندیاں ہویاں اوہنوں چھڈن تے گھرگھل دین لئی من گیا۔جاندیاں ہویاں اوہناں مجید کولوں پُچھیا کہ ہُن آزادی دی تحریک واسطے قربان ہون والے پتنگے کتھے نیں؟مجید نے جواب وچ آکھیا کہ جویں پتنگے برسات وچ نکلدے نیں ایسے طرحاں جدوں کدے مُلک تے اوکھا ویلا آیا تاں ایہ پتنگے ہر شہر وچوںاپنی جان قُربان کرن لئی آ جان گے ۔