kraamaat@gmail.com
+ +92 333-430-6384


ڈولفن پولیس‘ عام پولیس تے جرم توں چھٹکارا---٭رویل کالم٭


نفیس حیدر July 02, 2020


اسیں ہر روز پولیس محکمے دی ناکام کمکاریپولیس ملازماں دی رشوت خوری تے وارداتیاں نال رَلے ہون دیاں خبراں سُندے آں۔ بھتا خوری تے رشوت ورگے گھناونے عمل وچ پنجاب پولیس دے کانسٹیبلز توں لے کے اُتلے درجے دے افسراں تیکر ملوث ہوندے نیں۔ وڈے توں وڈا جرم کرن والے نوں کجھ رُپئے رشوت لے کے چھڈ دِتاجاندا اے۔ اسلام آباد وچ پنجاب پولیس سب انسپکٹر رینک دا بندا 3000 رُپئیا رشوت لیندا پھڑیا گیا تے سوشل میڈیا اُتے بجائے ایہ سوچن تے دُکھ کرن دے کہ رشوت خوری وچ زیادا تر محکما پولیس ای کیوں ملوث پایا جاندا اے؟ سگوں ایہدا مذاق بنا کے ہور ودھا چڑھا کے وکھایا گیا تاں جے پنجاب توں باہر دی لوکائی وی پنجاب پولیس دی شاندار کمکاری توں جانو ہو سکے۔

پہلے توں موجود اہلکاراں دی سودھی تے اوہناں نال ہون والے استحصال بارے سوچن دی بجائے پولیس ڈیپارٹمنٹ وچ دھڑا دھڑ ہور بھرتیاں کیتیاں جارہیاں نیں۔ سگوں فکر کرن دی لوڑ اے پئی محکما پولیس ای کیوں رشوت خوری تے بھتا خوری ورگے بھیڑے عمل وچ ملوث ہوندا اے۔ پولیس ڈیپارٹمنٹ دے مسائل کیہ نیں؟ ایہناں نال ہوون والے استحصال توں جھٹکارا کِویں حاصل کیتا جاسکدا اے؟ ہر تھانے دا اپنا وکھرا قانون اے جہنوں اوتھے دی حدود وچ وسن والے وڈیریاں دی اجارا داری مطابق چلایا جاندا اے۔ کدھرے وی ایہناں دا کوئی رعب دبدبا نہیں تے رہندی سہندی کسر حکومت نے آپے کالی وردی نوں مٹیالے رنگ وچ بدل کے پوری کر دِتی اے۔ ڈولفن سکواڈ دے ناں توں جہڑے کالیاں وردیاں والے وڈیاں موٹر سائیکلاں نسائی پھردے وکھالی دیندے نیں اوہناں دے وی ماڑے ای حال نیں۔

حکومت کوئی وی فورسپراجیکٹ یاں ادارا بناندی اے تے اوہدے وجود دے فایدے تے نقصاناں بارے خوب سوچ وچار کرکے فیراوس فورسپراجیکٹ یاں ادارے نوں قایم کیتا جاندا اے تے ایہ وی پرکھیا جاندا اے کہ ایہ فورس یاں ادارا حکومت نوں مالی یاں اقتصادی پہلو نال فایدا کِویں اپڑائے گا۔ پر وڈیاں موٹر سایکلاں والی ایس ڈولفن پولیس دے وجود دی کوئی وجھا سمجھ نہیں آئی کہ ایہنوں پچھلی حکومت نے کِس خاص مقصد یاں واضح منطق نوں ساہمنے رکھدے ہوئے بنایا یاں ایہ کِویں حکومت نوں مالی یاں اقتصادی طور اُتے فایدا دیوے گی؟ کجھ حکومتی عہدیداراں دا آکھنا اے کہ ایہ کرائم کنٹرول فورس تے طور تے بنائی گئی تے جے ایہ ای من لیا جاوے تاں حالے تیکر ایس محکمے ولوں کوئی ایہو جہیا کارناما ویکھن یاں سُنن وچ نہیں آیا جہدے توں ایہدے وجود نوں سراہیا جاوے تے کرائم کنٹرول فورس من کے اُچے لمے جواناں دے کھاتے وچ اپنے بجٹ دا وڈا حصا ضائع کردِتا جاوے۔ کرائم کنٹرول فورس دے ناں توں ایہ ڈولفن اہلکار بغیر کسے وجھا دے تھاں تھاں گلی محلے دیاں نُکراں اُتے کھلوتے ڈیوٹی ٹائم پورا ہون دا انتظار کر رہے ہوندے نیں۔ جدید اسلحے توں لیس 2,2 موٹر سایکلاں اُتے 4,4 اہلکاراں دے قافلے اکثر پڑھیارناں دے سکولزکالجز تے شاپنگ سنٹرزدے باہر کھلوتے اپنیاں ذمے داریاں دا احسن طریقے نال وکھالا کردے وکھالی دیندے نیں۔ ایس ای ذمے دار فورس وچوں اِک اہلکار نوں کجھ دیہاڑے پہلاں شالیمار روڈ اُتے عام راہی کولوں چپیڑاں تے گھسُن کھاندے ویکھیا گیا تے پچھن اُتے واضح ہویا پئی ڈولفن سکواڈ دا اہلکار اوس عام جاندے راہی دی تِیویں نال چھیڑ چھاڑ کر رہیا سی تے بندے دی مزاحمت کرن اُتے شرمندا ہون دی بجائے سگوں اوہ پولیس اہلکار اپنی وردی دے سِر اُتے ہوشیاری وکھان دی کوشش کر رہیا سیجہدے پاروں لوکائی نے اوہدی خوب چھترول کیتی تے اوہ مشکل نال جان بچا کے نسن وچ کامیاب ہوگیا۔ ایس توں پہلاں وی ڈولفن سکواڈ دے اہلکاراں ولوں سوانیاں نال نازیبا حرکتاں کرن دیاں خبراں ویکھن تے سُنن نوں مِلدیاں رہیاں نیں۔ پچھے جہے ایس فورس نے اپنے ایس جدید اسلحے دا استعمال وی کیتا تے سبزا زار دے علاقے وچ ڈولفن سکواڈ دے اہلکاراں نے پاگل بندے نوں قانون دے خلاف حرکت کرن اُتے گولی مار کے کیتا تے اوہنوں جان توں مار دِتا۔ ایس توں وکھ کجھ دن پہلاں لاہور مغلپورے نہر روڈ اُتے ڈولفن سکواڈ دے 4 اہلکار 2 موٹر سایکلاں اُتے ریس بازی تے ون سونے کرتب کردے ہوئے اِک دوجے نال ٹکر ان نال ڈِگ گئے جہدے نتیجے 1 اہلکار واصل تے 3 شدید زخمی ہوئے۔فیر ایس سکواڈ دے اہلکار ہارنز تے خطرا سائرن اُچی اواز وچ وجاندے تے موٹر سایکلاں دوڑاندے اِنج نسدے جاندے نیں جِویں اوہناں کسے وڈے کریمنل نوں پھڑنا ہووے یاں فیر خورے کدھرے اگ بجھان جارہے ہون۔ ایہدے نال نال ڈولفن فورس دے وی رشوت خوری ورگے عمل وچ وی ملوث ہون دیاں خبراں ساہمنے آئیاں نیں۔

سابق وزیر اعلا پنجاب شہباز شریف ہوراں اپنے دورِ حکومت دوران بے شمار چنگے اقدام کیتے جہناں نوں نظر انداز نہیں کیتا جا سکدا پر ترکی دے تعاون نال بنائی جان والی ایس ڈولفن سکواڈ نوں کِس مقصد لئی بنایا گیاہُن تیکر ایہدی کوئی سمجھ نہیں آرہی۔ موجوداحکومت نوں چاہیدا اے کہ اوہ ایہو جہیاں غیر ضروری فورسز نوں یاں تے مُکا دین یاں فیر کسے ہور مقصد واسطے استعمال وچ لے آون۔

تھانے وچ موجود اہلکار جہڑا ایس ایچ اوہ دے طور تے اپنیاں ذمے داریاں سر انجام دے رہیا ہوندا اے تھانے وچ اوہ وچارا 24 گھنٹے دا ملازم ہوندا اے۔ لمے ویلے تیکر ڈیوٹی کرن والا ایس ایچ او اپنے کم نوں بہتر طریقے نال انجام نہیں دیندا جہڑا پولیس ڈیپارٹمنٹ دی ناکامی دا کارن بندا اے۔ سابقا وزیر اعلا پنجاب میاں شہباز شریف نے ہر تھانے وچ دو دو ایس ایچ او تعینات کرن دا فیصلا کیتا سی تاں جے محکما پولیس ڈیپارٹمنٹ وچ کجھ بہتری آسکے پر ایس اقدام نوں لاگو کرن وچ دیری ہوئی تے حالے تیکر ایہدے اُتے عملدرآمد نہیں کرایا جا سکیا۔ موجودا حکومت نوں چاہیدا اے کہ اوہ شہباز شریف دے ایس اقدام نوں توڑ اپڑانتاں جے ن لیگ دی آگو مریم اورنگزیب دی آکھی ہوئی گل وی سچی ہو جاوے گی کہ تحریک انصاف سارے مسلم لیگ ن دے چالو / نامکمل پراجیکٹس پورے کر کے اپنا ناں بنائی جارہی اے تے دوجا محکما پولیس دی وگڑدی صورتحال نوں وی بہتر بنایا جا سکدا اے۔

انتظامیا نوں چاہیدا اے کہ پنجاب پولیس ڈیپارٹمنٹ دی بہتری لئی کردار ادا کرے تاں جے ایہنوں تباہی توں بچایا جا سکے۔ ایس گل وچ کوئی شک نہیں کہ جے محکما پولیس بہتر ہو جاوے تے ملک وچ بہت سارے معاملات ٹھیک ہو سکدے نیں۔ایہدے پاروں رشوت خوریبھتا خوری تے جاگیرداری نظام توں چھٹکارا حاصل کیتا جا سکدے اے تے خُش گوار ماحول ساڈے ہسدے وسدے پنجاب تے ملکِ پاکستان دا ضامن بن سکدا اے۔