سکول کھولن دا فیصلا 15 اگست نُوں کراں گے: مراد راس ……٭رویل نیوز٭

لاہور (نمایندا رویل) پنجاب دے زیر تعلیم مراد راس نے واضح کیتا اے کہ صوبے وچ تعلیمی اداریاں نُوں کھولن دا فیصلا 15 اگست نُوں حالات ویکھ کے کیتا جاوے گا۔ نجی پروگرام وچ خصوصی گلبات کردیاں ہویاں مراد راس دا کہنا سی کہ پنجاب دے سکولاں دے حوالے توں گائیڈ لائن بنا رہے آں۔ اکو دم ساریاں کلاساں نہیں کھولاں گے‘ سکول کھولن دا فیصلا بڑا سوچ سمجھ کے کرنا اے‘ ماسک دے بغیر کوئی بچا سکول داخل نہیں ہووے گا‘ سکول کھولنا بڑا سوکھا اے‘ پر جے خدانخواستا کسے بچے دی جان چلی گئی تے فیر لوک نہیں چھڈن گے۔ اِک کلاس دے اندر 50 بچیاں نُوں بٹھان دی اجازت نہیں دے سکدے‘ اسیں کلاساں نُوں 2 شفٹاں وچ بدل دواں گے‘ اِک کلاس وچ 20 توں 25 بچے ہون گے۔ بچیاں نُوں سکول بریک تے لنچ ویلے اکٹھا نہیں ہون دِتا جاوے گا‘ جہڑیاں کلاساں پہلے ضروری ہون گیاں‘ اوہناں نُوں پہلے کھولیا جاوے گا۔