شعیب دی ثانیہ مرزاتوں پنجابی وچ ”آئی لو یو“ کہن دی فرمایش،پنجابی صحیح بولو‘نہیں تے پنجاب والے پنجاب وچ وڑن نہیں دین گے: شعیب ملک ……٭رویل نیوز٭

کراچی (نمایندا رویل) پاکستانی آل راؤنڈر شعیب ملک نے سوشل میڈیا اُتے اپنی گھروالی ثانیہ مرزا نُوں پنجابی وچ ”آئی لو یو“ کہن دی فرمایش کر دِتی۔ کرکٹر شعیب ملک نے اپنی گھروالی تے بھارتی ٹینس سٹار ثانیہ مرزا دا سوشل میڈیا اُتے انٹرویو کردیاں ہویاں اوہناں توں کئی دلچسپ سوال کیتے‘ ایس دوران اِک جواب نہ ملن اُتے بطور سزا اوہناں نے ثانیہ مرزا نُوں ایہ مطالبا کر کے مشکل وچ پا دِتا کہ پنجاب وچ آئی لو یو“ کہو۔ٹینس سٹار نے کہیا کہ اسیں تہاڈے نال پیار‘ شعیب ملک نے ٹوک دِتا کہ 10 یاں 12 لوک نہیں‘ شادی نُوں 10 سال ہو گئے‘ اینی جہی اِک لاین وی نہیں سِکھی‘ ایہدے بعد ثانیہ نے دوجی کوشش کردیاں ہویاں کہیا کہ مینوں تہاڈے نال پیار کیتا۔ شعیب ملک نے کہیا کہ پنجابی دی ڈنڈ نہ لوو‘ ثانیہ مرزا نے اِک ہور ناکام کوشش کردیاں ہویاں کہیا کہ مینوں تہاڈے نال عشق کیتا‘ شعیب ملک نے کہیا بس کرو‘ تہانوں پنجاب والے وڑن نہیں دین گے‘ ایہدے بعد آل راؤنڈر نے آپ ای دَسیا کہ مینوں تہاڈے نال محبت اے کہو‘ جہدے بعد ثانیہ مرزا نے ایہ جملا دُہرا دِتا۔