kraamaat@gmail.com
+ +92 333-430-6384


پٹرول‘ کنک‘ کھنڈ دی تھوڑ کر کے مافیا نُوں نوازیا گیا، حکومت نے لوکائی نال کیتا اِک وعداوی وفا نہیں کیتا: خواجا آصف  ……٭رویل نیوز٭


نمائندا رویل July 08, 2020


اسلام آباد (نمایندا رویل) پاکستان مسلم لیگ (ن) نے کہیا اے کہ حکومتی اگوائی وچ مافیا پَل رہیا اے۔ حکومت نُوں اپنیاں صفاں وچ سارے حاجی تے ہور جماعتاں وچ کرپشن نظر آندی اے۔ بجلی وادھو ماترا وچ اے پرہر دن مہنگی ہوندی جا رہی اے‘ لوکائی نُوں 2 سال وچ دوزخ وچ سُٹ دِتا گیا اے‘ حکومت نے اِک وعدا وی وفا نہیں کیتا‘ سارے منصوبیاں دا افتتاح کر کے کریڈٹ لیا جا رہیا اے۔ موجودا حکومت دے بہودا الزاماں نے سی پیک نُوں متنازع بنا دِتا اے۔ حکومتی نا اہلی دی وجھا توں معیشت تباہ تے سارے منصوبیاں نُوں تہس نہس کر دِتا گیا‘ انتظامیی مشینری نُوں کھڈونا بنا دِتا گیا۔ منگل نُوں اسلام آباد وچ میڈیا نال گلبات کردیاں ہویاں مسلم لیگ (ن) دے آگو خواجا آصف نے کہیا کہ جدوں اسیں بجلی دے منصوبے لا رہے ساں تے اوس ویلے موجدا وزیراعظم کنٹینر اُتے چڑھ کے بجلی دے بل ساڑ رہے سن۔ اج ایہ کہڑے مونہ نال کَہ رہے نیں کہ سی پیک پاکستان دا مستقبل ا ے‘ اج ہر تھاں جا کے ساڈے لائے منصوبیاں دا افتتاح کر رہے نیں تے کریڈٹ اپنے کھاتے وچ پا رہے نیں۔ پاکستان دی 70 سالا تواریخ وچ جنے منصوبے نواز شریف دور وچ لگے اینے کسے دور وچ نہیں لگے‘ کے پی کے وچ ایہناں دی 5 سال حکومت رہی‘ ایہناں نے اِک وی منصوبا نہیں لایا جے لایا ہووے تے وکھان۔ اوہناں نے کہیا کہ صنعتاں تے گھراں نُوں وادھو بجلی ہون دے باوجود مہنگی بجلی دِتی جا رہی اے اج ساڈا گردشی قرضا 2100 ارب رُپئے ہو گیا اے موجودا حکومت نے سرکلر ڈیڈ نُوں ڈبل کر دِتا اے۔ خواجا آصف نے کہیا کہ لوکائی چنگی طرحاں جاندی اے کہ موجودا وزیراعظم موصوف اقتدار توں پہلے کنٹینر اُتے چڑھ کے کیہ کہندے سن تے اج کیہ کَہ رہے نیں۔ حکومت نے لوکائی نال کیتا اِک وعداوی وفا نہیں کیتا۔ پٹرول‘ کنک‘ کھنڈ دی تھوڑ کر کے مافیا نُوں نوازیا گیا ایہناں نُوں شرم نہیں آندی میں ایہ دعوے نال کہندا آں اج حکومتی اگوائی وچ مافیا پَل رہیا اے۔ اوہناں نے کہیا کہ حکومت نے اپنیاں صفاں وچ سارے کرپٹ بندیاں نُوں حاجی سمجھ لیا اے تے دوجیاں دیاں صفاں وچ سارے کرپٹ نظر آ رہے نیں۔ دھرنیاں وچ ساڈا ڈیڈھ سال ضایع کروا دِتا گیا۔ لوکائی نُوں 2 سال وچ دوزخ وچ سُٹ دِتا گیا۔ تحریک انصاف دے شروع کیتے گئے منصوبے اج مقبرے بنے ہوئے نیں۔ ایس موقع اُتے لیگی آگو احسن اقبال دا کہنا سی کہ موجودا حکومت نے سارے منصوبیاں نُوں تہس نہس کر دِتا‘ نا اہل حکومت دی وجھا توں ساڈی معیشت تباہ ہو گئی‘ فوڈ سیکیورٹی ساڈا 2025 دا منصوبا سی‘ حکومت 2 سال توں کسے وی ترقیاتی پلان دے بغیر کم کر رہی اے‘ اج نیپال‘ بنگلا دیش‘ سری لنکا تے افغانستان دی معیشت ساڈے توں اگے نکل گئی اے‘ ناتجربا کار تے نا اہل حکومت دی وجھا توں ساڈا مستقبل تباہ ہو رہیا اے‘ حکومت نے ساڈے منصوبیاں نُوں سواہ وچ رلا دِتا اے۔پاکستان دی 70 سالا تواریخ وچ انج نہیں ہویا کہ کنک دی فصل مارکیٹ وچ آئے تے آٹے دا بحران پیدا ہو جاوے۔ حکومت نے انتظامی مشینری نُوں کھڈونا‘ گھر دی لونڈی بنا دِتا اے۔ اوہناں نے کہیا کہ 6 مہینیاں وچ کامرس سیکرٹری‘ ایف بی آر وچ 5 چیئرمین‘ ہائر ایجوکیشن کمیشن وچ صرف 2 سال وچ 10 سیکرٹری تبدیل کر دِتے نیں۔ اوہناں نے کہیا کہ حکومت نے ہائر ایجوکیشن کمیشن اُتے حملا کیتا اے اوہناں دے فنڈز بند کر دِتے نیں تے ایچ ای سی عملے نُوں مجبورن کڈھن اُتے مجبور کیتا جا رہیا اے۔ چیف جسٹس توں اپیل اے ایچ ای سی اُتے حملے دا نوٹس لیا جاوے۔