kraamaat@gmail.com
+ +92 333-430-6384


مہنگائی تے حکومتی رٹ ـــــــــ٭رویل کالم٭


شیخ محمد انور July 08, 2020


ملک وچ اک واری فیر مہنگائی دا جن بوتل توں باہر آچکیا اے۔ کھان پین دیاں شیواں تے پیٹرولیم مصنوعات دی قیمت وچ وادھے پاروں لوک پریشان نیں۔ ملک وچ نایز منافع خورمافیا لوکائی نوں دو دو ہتھاں نال لٹن وچ مصروف نیں۔ تے متعلقا ادارے چپ تماشائی دا کردار ادا کررہے نیں۔ وفاقی شماریات دے ادارے نے اعتراف کیتا کہ موجودا حکومت دے دوجے سال وچ پہلے سال توں پہلے زیادا شرح توں مہنگائی وچ وادھا ہویا اے۔ وفاقی ادارا شماریات دی دستاویزات مطابق 30 جون نوں ختم ہون والے پچھلے مالی سال وچ اوسط مہنگائی 10.74 فیصد رہی اے۔ جو پہلے 8 سال دی مہنگائی دی بلند ترین سطح اے جد کہ ایہدے پچھلے مالی سال وچ اوسط مہنگائی دی شرح 6.80 فیصد سی۔ وفاقی ادارے دی رپورٹ مطابق اک سال وچ آٹے دا 20کلو دا تھیلا 204 رپئے مہنگا ہویا تے ایہدی قیمت 844 تون ودھ کے 1048 تیکر اپڑ گئی۔ رپورٹ وچ دسیا گیا کہ اک سال وچ چینی 8 رُپئے مہنگی ہو کے 80 رپئے کل تے دال ماش دی فی کلو قیمت وچ 68 رپئے وادھا ہویا اے۔ وفاقی شماریات دے ادارے مطابق مالی سال 2019-20 وچ ٹماٹر، مرچ، کُکڑی، آنڈے، دودھ تے گھیو دیاں قیمتاں وچ وی وادھا ہویا۔ رپورٹ مطابق اک سال دوران نکا گوشت 80 رپئے تے وڈا 41 رپئے مہنگا ہویا۔ ایس توں وکھ آنڈے فی درجن 20 رپئے مہنگے ہوئے۔ ملک وچ ہر بندا مہنگائی دی وجھا توں مسایل توں دوچار اے۔ ہن تے نوبت ایتھے تیکر اپڑ گئی کہ اک ای جنس دا ریٹ اج ہور تے کل ہور ہوندا اے۔ پر فیر وی لوڈ شیڈنگ جاری اے۔ نان بائیاں روٹی تے نان دی قیمت وچ اک واری فیر وادھے دا اعلان کیتا اے۔ حکومت پنجاب دے سستے آٹے دی فراہمی دے اعلان دے نال ای آٹا نایاب ہوگیا اے۔ جہدے پاروں شہری مہنگے دام آٹا خریدن اتے مجبور نیں جد کہ فلور ملز ایسویسی ایشن نے الزام لایا کہ حکومت نے وعدے پیراں ہیٹھ رولے نیں۔ آٹے دی فراہمی تے قیمت بحران نوں 1 مہینے توں ودھ دا عرصا ہون نوں اے تے سستا آٹا نایاب ہون پارون ہر تھاں مہنگا ای دستیاب اے۔ کابینا نے 20 کلو آٹے دے تھیلے دی قیمت 850 متھی جد کہ فلور ملز نوں سرکاری گوداماں توں کنک 1475 فی من دین دی وی منظوری دتی۔ نویں پالیسی کاغذاں وچ تے تیار اے۔ پر مارکیٹ وچ آٹے دے مہنگے دام اُنج دے اُنج برقرار نیں۔ دکانداراں دا آکھنا اے کہ فلور ملز توں نویں قیمت اتے آٹا نہیں آیا۔ سستا آٹا ملے گا تے سستا ویچ دوواں گے۔ شہریاں دا آکھنا اے کہ حکومت نے نویں قیمت متھی تے مارکیٹ وچ سستا آٹا فراہم وی کرے۔ ایہناں حالات وچ عام بندا سوچن اتے مجبور اے کہ حکومتی رٹ کتھے اے۔ خورے ایس گل دا جواب کسے کول نہیں۔ وزیراعظم کسے مسئلے اتے نوٹس لیندے نیں تے اوہو شے مہنگی ہوجاندی اے۔ وزیراعظم جس شے دا نوٹس لین اگلے دیہاڑے اوہ شے مارکیٹ وچ نایاب ہوجاندی اے۔ جے ملک وچ گڈ گورننس تے حکومتی رٹ برقرار ہوندی تے خورے اج ملک دی ایہو جہی حالت نہ ہوندی۔ سادے حکمران خورے گد گورننس دا مطلب کجھ ہور سمجھ بیٹھے نیں۔ اوہو کچہریاں دا فرسودا نظام جہدے تھت مجسٹریٹ توں مہنگائی کنٹرول کرن دا کم لیا جاندا اے جو چھاپے ماردے نیں ریٹ لسٹ چیک کردے نیں تے فیر کجھ ہزار جرمانا کر کے رپورٹ بنا کے گھل دیندے نیں جو مطمین ہو کے ایس رپورٹ نوں گڈ گورننس دی مہر لوان لئی اگے گھل دیندے نیں۔ انگریز وی خوب کم کرگیااوہ بیوروکریسی ورثے وچ عطا کرگیا۔ سانوں جو قابو نہیں کرسکے۔ بیوروکریسی نوں دو کم آوندے نیں اک دورا دوجا چھاپا۔ ایہو کارن اے سانوں پچھلے 71 سال توں مہنگائی دے جن نوں کسے وی صورت قابو نہیں کرسکے۔ ملک وچ حکومتاں تے بدلدیاں نیں پر مہنگائی اتے قابو اپن دا طریقا کسے وی صورت بدل نہیں سکیا۔ تبدیلی سرکار دے ناں اتے تحریک انصاف اقتدار وچ آئی پر ایس تبدیلی نے لوکاں نوں بدحال کرکے رکھ دتا تے ملک وچ مسایل گھٹ ہون دی بجائے ودھے نیں۔ وزیراعظم عمران خان تے اوہناں دی کابینا نوں ہن ایہ گل من لینی چاہیدی اے کہ اوہناں توں بہت ساریاں غلطیاں تے کوتاہیاں ہوئیاں نیں جہدی سزا وچارے لوکائی ہن مسایل دی چکی وچ پس کے بھگت رہے نیں۔ حقیقت اے کہ ماضی دیاں پالیسیاں حالے تیکر چل رہیاں نیں۔ اصل وچ جدوں تیکر پارلیمنٹ وچ پرانے چہرے موجود نیں اودوں تیکر لوکائی نوں ریلیف فراہم کرنا خاب ای رہوے گا۔ عمران خان تے جو وعدے کر کے اقتدار وچ آئے سن اوہ وعدے پورے کرکے لوکائی دا اعتماد بحال کرن۔ اعتماد دی بحالی کھان پین دیاں شیواں دیاں قیمتاں وچ کمی کر کے ہووے گی۔ ایس لئی لوکائی نوں ریلیف فراہم کرن وچ اپنیاں ساریاں توانائیاں صرف کرن۔ ایہ اوہ طریقا اے جہدے اتے عمل کرکے یقینن حالات وچ تبدیلی آوے گی۔ لوکائی اک عرصے توں حالات بدلن دا انتظار کررہے نیں۔ ایس لئی وزیراعظم عمران خان نوں مایوس نہ کرن۔ ایہ حقیقت اے کہ پی ٹی آئی دے دور اقتدار وچ آون بعد اوہدے مالی تے اقتصادی پالیسیاں دے حوالے نال چکے گئے کئی اقدامات دے نتیجے وچ ایہدی ابتدا دے آغاز وچ ای لوکائی تے سرکاری ملازماں نوں جویں مہنگائی دے جھٹکے لائے گئے نیں ماضی وچ اوہدی مثال کدرے نہیں ملدی۔ انج معاشرے نوں وزیراعظم بار بار ریاست مدینہ دی طرز اتے حکومت بنان دا اظہار کردے نیں اوہ حکومتی پالیسیاں تے اقدامات دے نتیجے اپني چنگے مستقبل توں مایوس ہون والی قوم د ے اضطراب دی عکاسی کردا اے۔ بے شک عمران خان تے اوہدی کابینا دے ارکان چنگے حالات لئی لوکائی نوں تے سرکاری ملازماں نوں صبر کرن دی تلقین کردے وی نظر آوندے نیں پر دوجے پاسے حکومتی ارکان تے اپوزیشن ارکان اپنیاں تنخاواں تے 100فیصد ودھا لیندے نیں پر سرکاری ملازماں نوں تاریخ وچ پہلی واری تنخا وچ وادھے توں محروم رکھیا گیا اے۔ دن بدن ملازم تے لوکائی مہنگائی دے ہتھوں پریشانی وچ متبلا نیں تے انج محسوس ہوندا اے جویں لوکائی تے ملازماں دی چپ کسے طوفان دی پیش خیما اے انج محسوس ہوندا اے کہ مہنگائی دا سونامی سب کجھ روڑھ کے لے جاوے گا تے حکومتی اقدامات پاروں اوہناں دے وزیراں وی اپنی حکومت دا دفاع نہیں کرپانا۔ آئی ایم ایف نے حکومت نوں بلکلجکڑ لیا اے حکومت نوں آئی ایم ایف توں چھٹکارا پان لئی کوشش کرنی ہووے گی۔ ایہ حقیقت اے کہ حکومت نے لوکائی تے ملازماں اتے مسلسل بھار پان والیاں پالیسیاں توں کنارا کشی نہ کیتی، اوہناں نوں ریلیف دین لئی اقدامات نہ چکے تے حکومت لئی بہت ازمایشاں سامنے آون گیاں۔