پچھلے 24 گھنٹیاں وچ کرونا وایرس نال 50 بندیاں دی مَوت،نویں کیس گھٹ گئے ……٭رویل نیوز٭

اسلام آباد (نمایندا رویل) پاکستان وچ کرونا وایرس دے کارن 5 ہزار 320 بندے واصل تے 2 لکھ 53 ہزار 604 متاثر ہو چکے نیں جد کہ 1 لکھ 70 ہزار 656 بندیاں ایس بیماری نُوں شکست دِتی۔ نیشنل کمانڈ اینڈ اپریشن سینٹر ولوں جاری آنکڑیاں دے مطابق پچھلے 24 گھنٹیاں وچ کرونا وایرس نال 50 بندیاں دی مَوت واقع ہوئی تے 1 ہزار 979 نویں کیسز رپورٹ ہوئے۔ پچھلے دن 21 ہزار 20 ٹیسٹ کیتے گئے تے ہُن تک مجموعی طور اُتے 16 لکھ 6 ہزار 190 ٹیسٹ کیتے جا چکے نیں۔ سندھ وچ کرونا کیسز دی گنتی 1 لکھ 6 ہزار 622 ہو گئی اے۔ پنجاب 87 ہزار 492‘ خیبر پختونخوا 30 ہزار 747‘ بلوچستان 11 ہزار 192‘ اسلام آباد 14 ہزار 2020‘ ازاد کشمیر 1 ہزار 655‘ گلگت بلتستان وچ 1ہزار 694 کرونا کیسز رپورٹ ہوئے نیں۔ کرونا وایرس کارن پنجاب وچ 2 ہزار 26 مَوتاں رپورٹ ہوئیاں نیں۔ پورے ملک وچ 733 ہسپتالاں وچ کرونا روگیاں لئی سہولتاں نیں تے ایس ویلے 4 ہزار کرونا روگی ہسپتالاں وچ داخل نیں۔ پورے ملک وچ کرونا روگیاں لئی اِک ہزار 820 وینٹی لیٹرز دستیاب نیں تے ایس ویلے 362 کرونا روگی وینٹی لیٹرز اُتے نیں۔ پاکستان وچ کرونا نال صحت یاب بندیاں دی گنتی ایکٹو کیسز توں ودھ اے۔30شہراں وچ ٹریس‘ ٹیسٹ تے اکلاپا حکمت عملی مؤثر طریقے نال کم کر رہی اے۔