پنجابی زبان دے سیوک،شاعر ،للیانی پریس کلب دے صدر تے الخدمت مرکز دے چئیر مین  باباعلیم شکیل ہوریں وفات پا گئےــــــ٭رویل نیوز٭

للیانی(نمایندا رویل) للیانی وسدے پنجابی زبان دی سیوا وچ رُجھے شاعر تے پتر کار علیم شکیل ہوریں پھیپھڑیاں دی بیماری وچ مبتلا سن ۔کجھ ای دن پہلاں اوہناں نوں قصور دے ہسپتال وچ داخل کرایا گیا جتھے اوہناں نوں زبردستی گھر گھل دتا گیا اوہناں دی طبعیت نوں مُکھ نہیں رکھیا گیا سی۔پترکاراں نے بابا علیم شکیل دے خلاف اجہیا ورتارا کرن والے ڈاکٹر دے ورودھ وچ احتجاج کیتا پر کجھ نہ ہویا۔ پچھلی رات وی اوہناں دی طبعیت خراب ہوون کر کے ہسپتال لیجایا گیا جتھے اوہ جیون دی بازی ہر گئے۔ آپ دا شعری پراگا"جاگن ساڈے نین" وی چھپ چُکیا اے جہدے وچ بابا علیم شکیل نے اپنی شاعری وچ ماڑے تے لِسے طبقے دی گل کیتی اے ایس دا وکھالا اوہناں دے اپنے جیونوچ وی نظر آندا اے اوہناں نے ہمیشا ظالماں دے خلاف اواز چُکی تے للیانی دے لوکاں دے حقاں لئی جتن وی کیتا۔اوہ پنجابی سیوک تے شاعر وجوں وی دیس تے دُنیا وچ جتھے جتھے پنجابی بولی جاندی سی جانے جاندے سن۔ایہدے نال نال اوہناں دا پنجابی کھوج گڑھ نال وی اوہناں دا گُوڑھا سنبندھ رہیا۔بابا علیم شکیل ہوراں دی وفات تے پنجابی اَدبی حلقیاں وچ غم تے سوگ دی کیفیت اے۔