kraamaat@gmail.com
+ +92 333-430-6384


دُھوں مار گئے بندے دا المیا ـــــــ ٭رویل ٭


علی انور احمد July 17, 2020


خاوند مُڑھکو مُڑھکی ہویا باہروں آیا۔

کمرے وچ چھت آلا پکھا ایسراں ہولی ہولی چلدا پیا سی جسراں اوہ بُڈھا ٹُردا اے جہدے گٹے گوڈے رہ گئے ہوون۔وچ وچ اوہ انج اَواز کڈھدا جِنج پِیڑ نال پُرچیا اوہ بندا جہڑا بتھیرا ضبط کردا اے پر فیر وی اوہدی مَٹھی جہی چِیک نکل ای جاندی اے۔

"گرمی تاں اخیر کیتی کھَلی اے“ ہولی جہی آکھدیاں جویں خُد نوں ای سُناندا پیا ہووے،اوہنے چھیتی نال مُڑھکے 'چ گڑچ پِنڈے نال چنبڑیا جھگا لاہیا تے وگاہ کے پرانہ ماریا۔کمرے وچ مُڑھکے نال بُسے پِنڈے دی بُو کھلر گئی۔بیوی نے بے پسندی نال مونہ دوجے پاسے کر لیا۔

"توبا توبا اج تاں حشر تپیا کھلوتا اے۔لگدا اے سورج لوہاراں گھروں چڑھیا اے" بُڑ بُڑاندیاں گرمی پاروں سَتے ہوئے نے فُوں فُوں کر کے سِینے تے ڈِھڈ اُتے پھُوکاں ماردے ہویاں اُپر پکھے ول ویکھیا تے بیوی کولوں پُچھن لگا”ایہ پکھا بس اینا ای چلدا اے؟"

چروکنی شوگر آلے معدے وچوں بُو آلی ہواڑ اُٹھی تے جدوں مونہ تھانی باہر نکلی تاں مونہ تے ہلکے پِیلے مَیلے دنداں دی بسیاندھ وی اوہدے نال رل گئی۔بیو ی تھوڑا دور سی ایس پاروں اوہ زیادا متاثر نہ ہوئی فیر وی اوہنے کراہت نال نک مونہ وٹیا تے اِک نظر رُوں رُوں کردے پکھے نوں ویکھیا۔

"تینوں …… نہیں …… پتا" اوہنے بڑا چِتھ کے آکھیا۔

اوہدے لُوں لُوں وچوں بے نیازی تے لا پرواہی چھلکدی سی۔اکھاں وچوں اُ کتاہٹ،بے پسندی تے بیزاری ڈھلکاں ماردی سی تے اوہدی واج وچوں روہ ٹپکدا سی۔

خاوند نے نہیں محسوسیا یاں فیر اوہ عادی ہویا کھلوتا سی۔

"ہاں پتا اے،اصلوں مُردا پکھا اے، نہ کماں دا"

"نہیں خیر اصلوں مُردا پکھا تاں نہیں اے" ہُن بیوی نے اپنے سائیں ول نہیں ویکھیا۔اوہ رُوں رُوں کردے پکھے نوں ویکھدی سی۔اگوں اوہ چُپ رہیا تے چروکنے دَمے دے مریض وانگوں ہونکدے پکھے نوں ویکھدا رہیا۔

بیوی نے ایہ سُنن لئی کہ اوہ کیہ آکھدا اے کجھ چِر اُڈیکیا۔جدوں اوہ چھہ ای مار گیا تے پانی پیون لئی کسے دھوتے ہوئے بھانڈے دی بھال وچ اکھاں گھماون لگ پیا تاں بیوی تِکھیاں کٹِیلیاں نظراں نال اوہنوں تکدی دُبارا بولی،

"ایویں نالوں تاں واہوا اے۔اصلوں دُھوں تاں نہیں مار گیا۔چلدا تاں ہے بھاویں تھوڑا تھوڑا ای چلدا اے۔"