kraamaat@gmail.com
+ +92 333-430-6384


پی ٹی آئی دی سرکار نے پی آئی اے نُوں دفن کر دِتا:رکن قومی اسمبلی رانا ثناء اللہ ……٭رویل نیوز٭


نمائندا رویل July 18, 2020


لاہور (نمایندا رویل) پاکستان مسلم لیگ (ن) پنجاب دے صدر تے رکن قومی اسمبلی رانا ثناء اللہ نے وزیراعظم عمران خان تے وزیر ہوا بازی غلام سرور توں مستعفی ہون دا مطالبا کردیاں ہویاں کہیا اے کہ پی ٹی آء دی سرکار نے پی آئی اے نُوں دفن کر دِتا اے‘ حکومت نے پائلٹ دا ملبا (ن) لیگ اُتے پان دی کوشش کیتی پر حکومت اپنی ایس کوشش وچ ناکام رہی۔ ماڈل ٹاؤن وچ پریس کانفرنس نال خطاب کردیاں ہویاں رانا ثناء اللہ نے کہیا کہ کجھ قوتاں نے پاکستان دی لوکائی اُتے ایہو جہے ٹولے نُوں مسلط کر دِتا اے جہنے لوکائی نُوں مایوس کیتا اے تے ایس ٹولے نے لوکائی نُوں مہنگائی تے بحراناں دی دلدل وچ سُٹ دِتا اے۔ اوہناں نے کہیا کہ پی ٹی آئی ملک وچ تکبر‘ انتقام تے نفرت دی پالیسی دے تحت حکمرانی کر رہی اے۔ پی ٹی آئی حکومت دی وجھا توں پاکستانی پائلٹس نُوں شرمندگی دا ساہمنا کرنا پیا اے‘ مختلف سوالاں دا جواب دیندیاں ہویاں رانا ثناء اللہ نے کہیا کہ مافیا ہُن تہاڈے نال تے مافیا دے اِک رکن نُوں تُسیں باہر گھل دِتا اے‘ 2017 وچ انکوایری کمیشن بارے قانون وچ تر میم کیتی گئی سی تے ایس ترمیم دے بعد کھنڈ‘ کنک‘ پٹرول بحراناں دی انکوایری کمیشن دی رپورٹ چھاپنا حکومت دا کم سی‘ اج کھنڈ 90 رُپئے کلو وک رہی اے‘ کھنڈ دی قیمت وچ خُد ساختا وادھے دا ریکارڈ باقاعدا موجود اے‘ اوہناں نے کہیا کہ جدوں مافیا تہاڈے اُتے لائے گا تے مافیا وصول وی کرے گا۔ رانا ثناء اللہ دا کہنا سی کہ پاکستان مسلم لیگ (ن) دی حکومت وچ کھنڈ 53 رُپئے فی کلو سی تے اج 20 کلو آٹے دے تھیلا 1170 رُپئے وچ مل رہیا اے‘ اوہناں نے حکومت نوں خبردار کیتا کہ ملک وچ آٹے دا بحران سر چُک رہیا اے تے ایس بحران نال ملک وچ افرا تفری تے انارکی کھلر سکدی اے‘ حکومت نیب نُوں اپنے گھٹیا مقصداں لئی گھٹیا طریقے نال استعمال کرن دی بجائے اپنی گورننس ول توجا دیوے جو بلکل نہیں اے۔ رانا ثناء اللہ نے نیب اُتے الزام لایا کہ نیب ایم پی ایز نُوں مشورا دے رہیا اے کہ اوہ وزیر اعلا تے وزیراعظم نُوں جا کے ملن‘ اوہناں نے کہیا کہ پاکستان مسلم لیگ (ن) نے نیب دے سارے کیساں نُوں رَد کر دِتا اے کیوں جے نیب حکومت دا ہتھیار بن چُکیا اے۔