kraamaat@gmail.com
+ +92 333-430-6384


کیہ بکواس اے بھئی۔۔۔؟ ــــ کہانی ــــ-٭رویل٭


رفیق عزیز July 20, 2020


پھُٹدی بہار شروع اے تے نکے نکے پنگھرے گھاہ اتے اک کھٹیاں تے چٹیاں ڈبیاں والا کتا خورے کدھروں آکے میرے کول بہ جاندا اے۔

میرا دھیان سامنے انار کلی دی نکر تے اک لان وچ لگے کتاباں دے میلے تے جاپیندا اے۔۔۔۔۔۔ ’’کیسے خبیث قسم دے انسان نیں، جہڑے حالی تیکر نہیں آئے۔ اتوں سویر دے ساڈھے ست ہوندے نیں پئے۔۔۔۔‘‘میں اَکدیاں ہویاں سوچدا آں ، کیوں جے مینوں اک کتاب دی لوڑ ا ے جہدی مینوں ایتھو ںملن دی امید اے۔

کتا میرے ول ویکھدا اے تے میں اوہدے ول۔ ۔۔۔۔۔۔خورے اوہ میری سیہان کردا پیا اے۔ فوری میرے ذہن وچ اپنے اک بیلی دا لطیفا یا د آجاندا اے :"بھراواں نوں بھرا سیہان ای لیندے نیں۔ ۔۔ "کجھ مسکان میرے بلھاں اُتے کھلر دی اے۔

کولوں سڑک تے لنگھدیاں کاراں تے گڈیاں دا شور مسلسل جاری اے۔ کجھ کاں لان وچ اچی ٹبی تے کسے پوڈرئیے دے ودھے ہوئے ڈگے چاؤلاں دے دانیاں تے چُنجھاں مارہے نیں۔ ایسے دوران اک کنک ونے رنگ دا منڈا کنڈ پچھے اپنا بستا لمکائی میرے کولوں لنگھدا اے ۔۔۔۔نال ای میرے ذہن وچ اپنے نکے بھرا دی سکول جان دی رفتار تے نقش اُبھر پیندا اے:

’’ایہ تے پھیہنا ای اے۔۔۔۔۔‘‘ پر اوہ میری بجائے کتے ول بڑے غور نال ویکھدا اے۔

ایسے دوران میری نظر فیر کتے دے اوہناں والاں تے ٹک جاندی اے جہڑے خورے نِما نِما پانی لگن نال سک کے انج لگدے نیں پئے جویں بالاں دے کھیڈن والے بھالو دے وال نرم نرم تے ہتھاں نال کھلرے پلرے ہوندے نیں۔

کتا سورج ول منہ کر کے دھپ سیکن لگ پیندا اے تے اک دھیان سورج ول ماردا اے:

’’سورج اج تے واہوا سوادی دُھپ دے رہیا اے۔۔۔۔۔‘‘ تے نال ای کتا تھلے لمے پے کے اکھاں بند کرلیندا اے تے اپنے ڈھڈنوں ساہواں نال ہیٹھاں اتانہ کردا اے۔

’’خورے ایہنے وی واہوا ساری چاہ پی لئی اے تے نال ای سگرٹاں وی۔۔۔۔۔۔؟‘‘ ایس خیال دے نال ای میرے ذہن وچ اپنے اک سجن دی حالت گھم جاندی اے جہڑا بہتیاں سگرٹاں تے چاہ پی پی کے گزری راتیں میرے ساہمنے اُلٹیاں کردا پیا سی تے اوہدا ڈھڈوی انج ای اتانہ ، ہیٹھاں ہوندا سی۔

یکدم میری کنڈ پچھوں اک بنداپتھر دی تھڑی تے بہن واسطے کاغذ نال تھڑی نوں صاف کردا اے تے کھرچ کھرچ دی آواز نال کتا اک واری فیر ڈسٹرب ہوکے اوہدے ول دیکھدا اے:

’’کیہ بکواس اے بھئی۔۔۔۔۔۔؟ جھٹ اَرام وی نہیں کرن دیندے۔۔۔۔۔۔‘‘ اوہ اپنے کناں نوں چھِنکا کے کجھ آل دوالے گھمدیاں مکھیاں نوں اڈان دی کوشش کردا اے تے نال ای فیر اپنی دھون تھلے لمی کرلیندا اے۔۔۔۔۔

میریاں اکھاں کجھ وتھ تے کوار گندل دی کیاری دے آل دوالے کھلرے کجھ کجھ دانیاں نوں چگدیاں چڑیاں نوں ویکھدیاں نیں تے نال ای اوہناں دی چوں چوں دی اواز میرے کناں وچ داخل ہوندی اے جدکہ رکشیاں، سکوٹراں، گڈیاں اتے کاراں دے لنگھن دا شور مسلسل سنائی دے رہیا اے ۔

"ویکھ لے ایہناں دے جری جری جنے پیراں دے پہو نچے نہیں گھسدے جد کہ ساڈیاں ایڈیاں ایڈیاں موٹیاں جتیاں کدی نہ کدی گھس ای جاندیاں نیں۔۔۔۔۔"میرے نال بیٹھا بندا اپنی گھسی جتی دی اڈی ول ویکھدیاں تے کتے دے پیر دے مخصوص شکل وچ بنے پوٹیاں ول ویکھدیاں مینوں آکھدا اے تے کتا فیرساڈے ول دھون چک کے دیکھدا اے:

"یار پوری رات میں جاگدیاں کڈھی اے۔۔۔۔۔۔ دو منٹ تے مینوں اکھ لالین دیو۔۔۔۔۔ حالی رات نو ں میں فیر جاگنا اے۔"

اوہدیاں اکھاں نے مینوں کہیا تے فیر اوہنے اکھاں میٹ کے دھون نوں لما کرلیا۔ ایسے ویلے دو کڑیاں یونیورسٹی جان والیاں اپنی اچی اڈی والیاں جتیاں دی کھڑپ کھڑپ نال اوہدی نیندر خراب کردیندیاں نیں تے اوہ اک ناگواری دی کیفیت تے نیندر نال بھریاں اکھاں نال اوہناں ول دیکھدا اے۔

مینوں فورن اپنی ساری رات جہڑی کہ میں کوئی پناہ نہ ہون پاروں کدی ایدھر تے کدھی اودھر اوارا گھمدیاں گزاری اتے میریاں اکھاں نوں نیندر دی طلب یاد آجاندی اے تے نال ای حالی تیکر نیندر نال بھریاں اکھاں وچ کجھ کجھ پیڑ جہی محسوس ہوندی اے۔

میرا دھیان کتے دے گل وچ بدھی رسی تے پیندا اے تے مینوں انسانی بچیاں تے کجھ غصاآجاندا اے۔

"نرے حرامی نیں۔۔۔۔۔۔" میں سوچداآں۔

ایسے ویلے دو تن منڈے اک پاسے توں اُچی اُچی رولا پاندے آندے نیں:

"اوہ بیٹھا ای۔۔۔۔۔۔ اوہ بیٹھا ای۔۔۔۔۔۔" میں دھون گھما کے اوہناں ول ویکھداں آں۔ ایسے ویلے میرے ذہن وچ اپنے اک متر دی تصویر تے بلکل ایویں دا لہجا گھم جاندا اے جہدے کولوں گزری راتیں مینوں پتا لگدا اے کہ میری فلانی کہانی چوری دی کہانی اے تے ایہدے نال رلدی ملدی کہانی فلا نے لکھاری اینے ورھے پہلوں لکھ دتی سی۔

نال ای مینوں اندروں ٹُٹ بھج دی کیفیت ودھدی محسوس ہوندی اے تے ایسے کتے دے بھونکن دی ااَواز میرے کناں وچ داخل ہوندی اے:

"کیہ بکواس اے بھئی۔۔۔۔۔۔۔۔۔۔۔؟ مینوں جھٹ کُو تے اارام کرلین دیو۔۔۔۔۔۔۔۔۔۔"پر منڈے اوہدے پچھے لگ جاندے نیں تے اوہ پوچھل دبا کے اک پاسے نکل جاندا اے۔ مینوں آخری وارانج لگدا اے جویں میرے کناں دے بہت کول جہی کر کے کسے آکھیا ہووے "کیہ بکواس اے بھئی۔۔۔۔۔۔۔۔۔۔۔؟"تے میں ٹٹُے دل نال اک پاسے نوں ٹرپیندا آں۔

٭٭٭٭٭