پی ٹی وی دی سزا لوکائی نُوں نہیں دینی‘ اگلے چھے مہینیاں دے اندر پی ٹی وی دی بہتری دا سفر شروع ہو جاوے گا:عمران خان……٭رویل نیوز٭

اسلام آباد (نمایندا رویل) وفاقی کابینا دے اجلاس وچ کئی وزیراں دے اعتراض اُتے وزیراعظم عمران خان نے پی ٹی وی دی فیس وچ 65 رُپئے دے وادھے دا معاملا مؤخر کر دِتا‘ کابینا ارکان نے کہیا کہ پی ٹی وی نُوں 14 ارب توں ودھ دا کسارا اے پہلے ایہدا حساب لیا جاوے فیر دَسیا جاوے کہ میڈیا ٹیم دی کیہ کمکاری اے۔ تفصیلات مطابق وزیراعظم عمران کان دی صدارت ہیٹھ وفاقی کابینادا اجلاس ہویا‘ اجلاس دوران کئی وزیراں نے پاکستان ٹیلی وژن دی فیس وچ وادھے اُتے اعتراض کیتا‘ وفاقی کابینا وچ وزیراں ولوں اعتراض آن دے بعد پی ٹی وی دی فیس 35 رُپئے توں ودھا کے 100 رُپئے کرن دا معاملا مؤخر کر دِتا گیا۔ وفاقی کابینا دے اجلاس بعد میڈیا نال گلبات کردیاں ہویاں وفاقی وزیر اطلاعات و نشریات دا کہنا سی کہ غلط پراسیکیوشن دی وجھا توں جے تُسیں (اپوزیشن والے) بَری ہو گئے تے فرشتے نہیں ہو سکدے‘ ایہ اوہ لوک نیں جہڑے اج کھلو کے کَہ رہے سن عدالت دا تواریخی فیصلا اے‘ ایہو اوہ لوک نیں جہناں نے اداریاں نُوں ایتھوں تک پہنچایا‘ وکٹری دا نشان بنان والے ای تباہی دے ذمے دار نیں‘ پریس کانفرنس کر کے کہندے نیں کہ نیب زیادتی کر رہی اے‘ ایہو لوک سن جہناں نے نیب قوانین وچ تبدیلی دی راہ وچ رکاوٹاں پائیاں۔ اوہناں نے کہیا کہ وفاقی کابینا نے پاکستان ٹیلی وژن (پی ٹی وی) دی لائسنس فیس وچ وادھے دا معاملا مؤخر کر دِتا اے۔ پی ٹی وی دی سزا لوکائی نُوں نہیں دے رہے‘ اگلے چھے مہینیاں دے اندر پی ٹی وی دی بہتری دا سفر شروع ہو جاوے گا‘ پی ٹی وی وچ لُٹ مار تے آرکائیو وی چوری کیتیاں گئیاں‘ چھیٹی وڈے وڈے ناں پی ٹی وی اُتے کم کردے نظر آن گے۔ وفاقی کابینا نے 13 نکاتی ایجنڈے اُتے غو رکیتا۔ کابینا نے ای سی سی دے 16 جولائی دے فیصلیاں دی توثیق کر دِتی۔ وفاقی کابینا نے تفتیشی اختیاراں لئی ضابطا فوجداری 1898 وچ ترمیم تے ایف اے ٹی ایف بارے کمپنیز ایکٹ تے لائبلٹیز پارٹنر شپ ایکٹ وچ مجوازا ترامیم دی وی منظوری دے دِتی۔ وفاقی کابینا نے انسداد منشیات ایکٹ 1997 وچ ترمیم تے اینٹی منی لانڈرنگ ایکٹ 2020 وچ مجوزا ترمیم دی منظوری دے دِتی۔ وفاقی کابینا نے نیشنل انسٹیٹیوٹ آف ہیلتھ ری آرگنائزیشن ایکٹ 2020 دی وی منظوری دے دِتی۔ سینیٹر شبلی فراز دا کہنا اے کہ وفاقی کابینا دے اجلاس دوران وزیراعظم نے میڈیا مالکان دے بقایا جات دے مسئلے نُوں اِک ہفتے وچ حل کرن دی ہدایت کیتی اے۔ اوہناں نے کہیا کہ آٹے دیاں قیمتاں وچ وادھے بارے وزیراعظم نے متعلقا وزارتاں توں پُچھیا تے آٹے دیاں قیمتاں وچ توازن رکھن دی ہدایت کیتی۔ وفاقی وزیر نے کہیا کہ پاکستان سٹیل سنے ہور ادارے عظمت دے نشان نیں‘ ماضی دیاں حکومتاں ایہناں اداریاں نُوں بہتر کرن دی بجائے تباہی ول لے گئیاں۔ وفاقی وزیر نے ایجنڈے بارے دَسیا کہ کابینا نے کیش مینجمنٹ اینڈ ٹریجریز اینڈ سنگل اکاؤنٹ رولز 2009 دی منظوری دِتی اے جہدے تحت ساریاں وزارتاں‘ ڈویژن تے شعبے دا اِک اکاؤنٹ ہووے گا جہدے وِچوں رقماں جاری کیتیاں جان گیاں۔ اوہناں نے سنگل ٹریجری اکاؤنٹ دی منظوری نُوں وڈا اقدام متھ دِتا۔ سینیٹر شبلی فراز نے دَسیا کہ کابینا نے انسداد منی لانڈرنگ بارے قوانین وچ ترمیم لئی مجوزا بل 2020 دی وی منظوری دِتی جہدے تحت منی لانڈرنگ تے دہشتگرداں دی معاونت دی روک تھام نُوں مؤثر بنانا اے۔ اوہناں نے امید ظاہر کیتی کہ منی لانڈرنگ دے خلاف قوانین نوں ہور سخت بنایا جاوے گا۔ وفاقی وزیر نے دَسیا کہ انسداد دہشتگردی ایکٹ 1997 تے کورٹ آف کرمنل پروسیجر 1898 وچ وی مجوزا ترامیم دی منظوری دِتی گئی۔