kraamaat@gmail.com
+ +92 333-430-6384


پنجاب وچ طوفانی بارشاں دا سلسلا، 20 بندے جان دی بازی ہار گئے……٭رویل نیوز٭


نمائندا رویل July 22, 2020


لاہور (نمایندا رویل) پنجاب دے مختلف شہراں وچ ر بارشاں نے تباہی مچا دِتی‘ چھتاں ڈِگن تے ہور دُکھانت وچ 20 بندے جان دی بازی ہار گئے‘ دُکھانت وچ کئی بندے زخمی وی ہوئے‘ وزیر اعلا پنجاب نے قیمتی جاناں دے ضیاع اُتے دُکھ تے افسوس دا اظہار کیتا اے۔ تفصیلات مطابق پنجاب دے مختلف شہراں وچ طوفانی بارشاں دا سلسلا جاری اے‘ چھتاں ڈِگن دے واقعات وچ کئی بندے واصل ہوگئے‘ تاندلیانوالا دے نیڑے بارش نال گھر دی چھت زمین بوس ہو گئی۔ چھت ڈِگن دے بعد ملبے تھلے آ کے اِک ای خاندان دے 7 بندے واصل ہوئے‘ دُکھانت وچ پنج بندے زخمی وی ہوئے جہناں نُوں ہسپتال منتقل کر دِتا گیا اے‘ علاقے والیاں نے اپنی مدد آپ دے تحت لاشاں تے زخمیاں نُوں ملبے توں کڈھیا۔ فیصل آباد دے دوالی پنڈ وچ وی موسلا دھار بارش دے کارن مکان دی چھت ڈِگ گئی‘ ملبے تھلے آ کے 3 بندے واصل تے 4 زخمی ہو گئے‘ مرن والیاں وچ 2 بھیناں تے بھائی شامل نیں۔ قصور دے مختلف علاقیاں وچ وی طوفانی بارشاں نال 3 چھتاں ڈِ گ گئیاں‘ جہدے نال 2 سوانیاں سنے 3 بندے دَم توڑ گئے۔ ملتان وچ وی دو بندے چھتاں ڈِگن نال زندگی دی بازی ہار گئے۔ اودھر وزیر اعلا پنجاب نے دُکھانتاں وچ قیمتی جاناں دے ضیاع اُتے افسوس دا اظہار کیتا اے‘ عثمان بزدر نے زخمی بندیاں نُوں علاج دیاں بہترین سہولتاں فراہم کرن دی وی ہدایت کیتی اے۔